“Beeshii
ka baxda shuruudaha dalka waa in la mariyaa tii nala soo mariyay mid
ka daran anaguna waanu eegaynaynaa uun”
Suldaan Maxamed Suldaan C/qaadir
Suldaan Maxamed Suldaan C/qaadir,
oo ka mid ah madax dhaqameedka Somaliland, ayaa ku beeqay in la
adkeeyo nabadgelyada dalka, waxaanu sheegay in cidii ka hortimaada
shuruucda Somaliland tallaabo adag laga qaadi doono.
Suldaan Maxamed Suldaan C/qaadir wuxuu sidaasi ku sheegay shir
jaraa’id oo uu maanta ku qabtay magaalada Hargeysa, wuxuu xisbiyada
mucaaridka ah u soo jeediyay in ay ka noqdaan mawqifka ay ku
daadifeeyeen go’aankii aqalka odayaashu ay 28-kii bishii hore March
muddo lix bilood ah ugu kordhiyeen madaxweynaha Somaliland Md.
Daahir Rayaale Kaahin iyo ku xigeenka Md. Axmed Yuusuf Yaasiin,
waxaanu yidhi “Wadanku xeer iyo shuruuc buu leeyahay shalayto intii
aanu gaadhin go’aanka muddo kordhinta xisbi kastaa wuxuu lahaa waanu
ku kalsoon nahay go’aanka ay gaadheen golaha guurtidu in haddana
laga daba hadlo anigu waxaan u arkaa arrin fool xumo ah, waayo kee
ayaanu rumaysanaa labadan hadal kan dambe ee ay ku deedifeynayaan
iyo kii ay ku taageerayeenba.”
Suldaan Maxamed Suldaan C/qaadir wuxuu sheegay in beeshiisa ay
sagaashameedyadii isugu tageen 11 beelood oo degan Somaliland,
waxaanu yidhi “Anagana waad og-tihiin oo qaranka Somaliland mar
baanu beel ahaan ka Turkiyoownay 11 beelood oo reer Somaliland ah
ayaa naga soo horjeestay oo yidhi shuruucdii iyo dastuurkii
beeshaasi way ka baxday. Waa kii dagaalkii sokeeye siddii ku dhacay
anaga weli tii uur xumadeedii nagamuu bixin.”
Suldaan Maxamed wuxuu digniin u jeediyay cidii la timaada ficil ka
dhan ah nabadgelyada iyo shuruucda dalka, waxaanu yidhi “Haddii ay
tii oo kale timaadana oo la arko cid diidan shuruucda iyo dastuurka
dalka u yaalla, anaga sidii la isugu keeyo tagay ayaanu ka filaynaa
beelaha Somaliland beeshii ka baxda shuruucda dalka u taala, inaan
la aamusine’e tii nala mariyay mid ka daran la soo mariyo, anaguna
waanu eegaynaa uun.”
Suldaan ku wuxuu sheegay in shacbiga Somaliland cidii ay doorteen
uun baa go’aanka kama dambaysta ah yeelanaysa.
“Wixii nabad lagu waayo xabad lagu heli maayo, ummaddan meel ay ka
qaxdo iyo meel ay u qaxdo midna ma jirto. Cidii isku dayda inay
ummadda qixiso waxaan ugu dhaaranaynaa in aanaan ka gacan la’aanayn.
Dadku way ka middeysan yihiin wixii nabadgalyada khalkhal iyo khatar
ku keenaya,” ayuu intaasi raaciyay suldaan Maxamed Suldaan C/qaadir.
Dhinaca kale cuqaal iyo hoggaamiye dhaqameedyo kale oo ka soo jeeda
gobolka Hargeysa, ayaa ku baaqay in nabadgelyada dalka wixii khatar
gelinaya dhinac loogu soo wada jeesto.
Ramaasnews
|