|
Dhibaatada
Aduunyadu
Midhaa sida dhimbiilbay
Dhac dhac iyo ur badantoo
Dhaxan iyo Kulayl iyo
Dhado iyo dabayl iyo
Dhulka iyo Cirkoo kale
Amba dhuubni iyo xoog
Dhabta Ubad mid saaroo
Dhacdhasada Caruurtiyo
Midaan abid wax dhalinoo
Dhegihiisu Aabiyo
Waalidnimo ka dheertoo
Dhunkashu la ceeb tahay
Naxariisna meel dhigay
Iyaguba dhismaha guud
Dhererkiyo laxaadkiyo
Dhalashada sidoodaba
Dhabtii waa ragee garo.
*****
Kawnkuna dhamaantii
Waa laba is dhinac yaal
Dheeli kama fogaatoo
Ma dhamaato abidkeed
Dhan markaad ka eegtana
Nin dhur sugay Aduunyada
Toban dhawri jiray beri
Marna uma dhamaatee
Sagaal baa la dhiiboo
Kii kale ma soo dhicin
Waa la kala dhantaaloo
Kolay dhaawac weeyoo
Waanay dhimantahee garo.
*****
Dharaar kii ku saaciday
Marbuu Gacanta dhiibtaa
Dhamal Reerka wada yaal
Marbuu dhinac barwaaqada
Dhabar lala arooriyo
Dhalintoo cawaysiyo
Daantada Habeenkii
Cadalool la dheelaa
Dhanka kalena waayaha
Dhallaankoo haraadiyo
Dhulkoo wada abaariyo
Xoolohoo dhamaadiyo
Qaylo dhaantu badataa
Waana sheeko dheeroo
Lagu dhigay Quraankoo
Dhab loo wada arkee garo.
*****
Nin macaan dhadhamiyoo
Hadba dharag la seexdoo
Dhacadiid u jiifoo
Waxa dhacay aduunyada
Dheel dheel la yaab iyo
Dhallanteed la tahayoo
Dhiishaa dhaansanaayiyo
Ninka gaajo dhacayee
Sunta dhuuni moodee
Inuu cuno dhunkaal iyo
Intu geed qadhaadh dhalo
Dhadhamana ka maqantoo
Dhabarkiyo xanjaadkiyo
Mergiyadu is dhaafeen
Iyagaba Rag wada dhaha.
*****
Ninka dhaqay Horweynkee
Geela kiisa dhalay iyo
Inta keentay dhaystiyo
Dhaqayadiyo gaankiyo
Aarankuba is dhaafeen
Iyo kaan dhalaalkaba
Dhalaankiisu aragbee
Dhiilkii ka madhanyee
Qaraamaad in loo dhigo
Dhegtu taagantahayee
Dhawaqeeda raagsaday
Hada wada dhashee garo.
*****
Dhacdadeed Aduunyadu
Meela kuma dhamaatoo
Nimco lama dhamaystoo
Kolay waa habeen dhaxe
Ninka dhawrsan waayee
Lugba meel intuu dhigay
Sheekada is dhaafshee
Dhayal mooday noloshoow
Intay kaa dhabacatee
Kaa dheeryay waayuhu
Qaar kalay dhankoodii
Dhabarkeeda saartoo
La daalaa dhacaayoo
U dhamaatayee garo.
Bal aan soo dhaweeyoo
Soo dhameeyo weedhiyo
Dhambaalkiyo warkeedee
Dharaartii dagaalkii
Dhibicdiyo rasaastii
Markii laysu soo dhacay
Maalintii la dhaatee
Raggii dheenta shubi jiray
Dhudi yaa lahaa iyo
Caanaheeda yaa dhamay
Nin dhegaystay Heesaha
Amba dheehday Gabayada
Raggu sibiq dhaqaaqee
Wacdaraha la dhigayee
La deg dhabay Cadaawaha
Taasuba dhacdee garo.
*****
Inkastooy dhibteediyo
Dhimashada Nin doorkiyo
Ragga kii dhaqaaqiyo
Halyeeyada dhab iyo sooc
Tolkay uga dhamaadeen
Dhirbaaxadu halkeedii
Dhabanada ka muuqdaan
Dhulkii waa xorooboo
Gobanimo dhadhaminoo
Faqash waa dhamaatee
Maxaa looga dhaadhacy?
*****
Wax dhintiyo wax dhaawaca
Dhallaan wada agooma ah
Waayeel la dhaafoo
Dhibta iyo xumaantiyo
Dheef waxy ku nooshay
Barray dhaami doontaa
Rajadeed la wada dhigay
Dhibanaha ninkii dhibay
Intuu dhoosha ka cadayn
Dariiqyada ku dhaafaan
Iyo qaar dhan iyo maan
Intuu dheeman iyo luul
Dhigtayee shisheeyaha
Dhaqashada fogaystee
Wax dhegaysi ugu jecel
Dheeshiyo ciyaartiyo
Waxaad tahay Wadani dhab ah.
*****
Ana dheelimaadkiyo
Dhalandhoolka socodkiyo
Dhibanaha warkiisiyo
Dhakafaarka Koosoow
Waxaan meesha ugu dhigay
Amba Gabayga dhiigiyo
Ilmo dhibic ka leedahay
Waxaan dhawrayaa wali
Umaddoo dhamaantood
Dhirbaaxada Cadaawaha
Dhallin iyo waxgaradkii
Iska dhaadi waayeen.
*****
Waxaan dhawrayaa wali
Arrimahan is dhaafiyo
Hawlahan la kala dhigay
Lugta Luqunta dhaaftee
Runtan meel la dhigayee
Laysu dhiibay Beentiyo
Dhaqan wada xumaadiyo
Xaqan layska dhinac maray.
*****
Waxaan dhawrayaa wali
Ciddan dhaanka raacdee
Dhoofka wali ku maqanee
Toban saniyo toban kale
Iyo tiro wax dheertahay
Sahankoodu dheel iyo
Dhalanteed carruur iyo
Sheega ma dhaaftiyo
Dhaqaaq joogsi Koosoow
Misna dhabarku muuqdee
Dhuumaalaysi iyo ceeb
Sheekadii u dhalan rogay.
*****
Allihii dhamayee
Dhidbee aduunyada
Dhab ahaana jirayoow
Adigaan dharaar
Amarkaad dhigtiyo
Dheh waxaad tidhaa
Cidi dhaafi karin
Adigaan wax dhalin
Misna aan la dhalin
Ubad iyo Dhallaan
Adaan dhalin intaba
Dhamays baad tahoo
Wixii aad dhehdana
Dhib yaraan aduu
Isha dhibiq sugmaa.
*****
Ragaygii dhintiyo
Dumarkii dhamaan
Intaan ciid la dhigin
Lafuhuna dhamoow
Dhoobantahay cidlada
Intii dhaawacee
Dhaqaaqii ka tagay
Dhamaantood Janada
Dhul barwaaqo iyo
Meel ay dhibtii
Isku dhaafiyaan
Xumaantana ka dhaaf
Wax ku soo dhiciyo
Dhibtii soo martay
wali dheelintaa.
*****
Allihii dhidbee
Dhulkii Hooyaday
Dhalashiyo halkaan
Dhallaanimo ku koray
Dhaqaaq iyo halkaan
Dhacadiid ku gama’
Dhaadashada lahaa
Waxaan ogay Dhamoow
Dhibta haysatiyo
Dhaqaalaha yaroo
Ka dhaqaaq yidhaa
Wax la dhaafsadee
Adaa dhawrayoo
Waxa dhacay arkee
Naga Qabo Dhunkaal.
*****
|
