La
dagaalan Argagaxiso mise ku deg deg iyo talax tag koox gaar ah
Marookaaniyiin
Akhri oo adba garta naq
!!!
Todobaadkii la soo dhaafay
maalintii Khamiistii ee ay bishu ahayd 12/ 03/2009, ayaa maamulka
iyo hayadaha ka shaqeeya nabadsugida magaalo madaxda dalka Holland
ee Amsterdam, ay dukaan wayn oo magaciisa la yidhaa lKEA iyo
dhismo-yaal badanoo ku gadaamanba dadkii ku jiray ka qaxiyeen oo
dibada uga saareen, jid-goyana weliba ku sameeeyeen oo diideen inay
cidi u soo dhawaato madashaasi, kuna soo daabuleen baabuur
gaashaaman oo qalab iyo ciidanka waxa qarxa burburiya iyo booliisba
ka buuxaan, kuwaas oo iyaguna markiiba ka hawlgalay goobtaasi, kana
baadhay walxaha qarxa oo la sheegay in meeshaasi lagu qariyay oo la
dhigay!.
Dhanka kale waxa ay ciidamada booliiska ah ee dhar-cadu iyaguna ku
qamaameen guryo cayiman oo sida ay sheegeen ay ku nool yihiin dad
lagu tuhunsan yahay inay iyagu ka danbeeyeen falkani argagaxiso (
waa siday iyagu yidhaahdeene ), waxana ay soo xidhxidheen oo jeelka
u taxaabeen, saacadu markay ahayd laba iyo tobankii duhurnimo,
qofkii ugu horeeyay, iyaga oo kii u danbeeyayna, dad 7 qof ah oo loo
haystay arintan ay soo qabteen lixdii galabnimo, dadkaasi oo ahaa 6
rag ah 1 qof oo haween ahaa, da' dooduna ay ahayd inta u dhaxaysa
19-jir iyo 64 jir, oo dhamaantooda ka soo jeeda dal ku yaal
waqooyiga Afrika oo la yidhaa Marooko.
Intaa ka dibna waxa shir jaraa-id oo ay ka soo qayb galeen dhamaan
qaybaha war-is-gaadhsiinta ee maqalka ( radio ) iyo muuqaalkaba ( tv
) leh ee dalkan Holland qabtay, madaxda sedexda waaxood ee ugu
awooda badan Magaalo madaxda oo kala ah, 1- Gudoomiyaha magaalo
madaxda, mudane Job Kohin, -2- hogaanka sare ee ciidanka Booliska ee
waaxda gobolka Noord-holland, mudane Bernard Welten iyo -3- Madax
sare oo cadaalada ah, mudane Herman Bolmaar, oo ka warbixiyay sida
ay uga hawlgaleen dhacdadan naxdinta iyo argagaxaba leh, iyaga oo
bartaa ka magac dhabay cida looga shakisan yahay inay ka danbeeyaan
falkan oo ay yidhaahdeen waa dad ka soo jeeda isir ahaan dalka la
yidhaa Marooko..
Waxa markiiba ay war-is-gadhsisinta bilowday inay si balaadhan u
baahiso arintii, oo uu taasi ay keentay inuu dhasho dareen farta
lagu fiiqayo guud ahaan dadkii ajaanibka ah, gaar ahaana dadka
Marookaanka ah oo inta badan aan wax fiican laga sheegin siday
doontaba ha ku timaado ( ha jirto ama yaanay jirini ), waxa war-is-gaadhsiintu
iyaga oo buunbuuninaya ay isku xidhay oo ay isku nudeen arintan iyo
dhacdooyin hore oo ay qaar ka mid ahi ka dhaceen dalal kale, sida
dalka Isbaanishka ( spain ) iyaga oo yidhi, mid ka mid ah todobada
qof ee la xidhay ayaa cashiiro ku lahaa dad 2004-tii ku qarxiyay
Tareen, magaalo madaxda Isbaanishka ee Madrid, oo dabadeed
nafatoodana qarxiyay si aan loo qaban, arintaasi oo hada ay ka soo
wareegtay shan gu' .
Warwar iyo walaac ayaa dadka Marookaanka iyo Muslinka kaleba leh ee
dalkan ku dhaqan arintani ku abuurtay, waxana markiiba caloolyaw
badan keenay sida aan sinayn ee dhinaca u dheelisan ee war-is-gaadhsiintu
falkan u tabinayso, taasoo xasuuso hore iyo sooyaal ku taxnaa
eedaymo falal argagaxiso, iyo aargoosi la soo kulmay dadka Muslinka
ah ee ku dhaqan Holland dib u soo noolaysay. Isku soo duuboo waxa
dadkii oo dhegtu u taagan tahay oo leh toloow maxaa soo yeedhi iyo
maxaa ay arini ku danbayn ee gabalku idiinku dhici, soo baxay warar
sheegaya in Booliiskii iyo ciidamadii Burburinta walxaha qarxaa
waxba ka waayeen madashii fara madhana kala soo noqdeen, mar qudha
ayaa arintaasi ku noqotay warwarkii iyo walaacii aloosmay, biyo
dhinbiil dab ah lagu shubay oo darenkii kacsanaa bakhtiisay!!!.
Dabadeedna waxa ka soo baxay dadkii Marookaanka iyo Muslinka kale
iyo waliba dadka daneeya samo ku wada noolaanshaha neeff qaboow,
waxana mar kaliya bilaabmay in war-is-gaadhsiintii ay ku jeedsato
dawladii oo la waydiiyo, waxa keenay inay arin aan dhab ahayn oon si
fiican loo lafo gurin dibada loola soo cararo oo weliba dadka qaarna
lagu SHAABADEEYO eed aan jirin!!! Waxay taasi keentay oo sandulaysay
in Booliiska, maamulka magaalada iyo cadaaaladu ay sheegaan isha ay
ka heleen warka iyo sida ay ugu qanceen xogahii uu warkaasi
xanbaarsanaa, ishaasi oo ay ku sheegeen,Telefoon laaga soo diray
magaalo madaxda dalka Biljamka ee Brussels, iyaga oo raaciyay in
qofka soo diray warkaasina ahaa ruux Dumara!. Waxana isla markiiba
xoriyadoodii loo sooceliyay dhamaan dadkii la xidhay ee 7-da qof
ahaa.
Waxa ay arintii ku soo gabagabeeyeen inay baadhitaan ku wadaan
qofkii soo diray telefoonka oo ay ka gun-gaadhi doonaan waxa keenay
inay waxaan jirin gudbiso, waxana ay waji gabax ku noqotay arintan
dhicisoowday dhamaan dadkii arinta gacaanta ku lahaa, oo hada isku
dayaya inay si kasta oo ay ku soo celin karaan kalsoonidoodii
dhaawacantayba sameeyaan. Dhanka kale waxa ay eedaasi beenowday u
noqotay dadka Marookaanka ah, arin ay ku garnaqsan karaan oo weliba
ay raali galina ku dalbana karaan, mida kale si kastaaba badane
hadiiba ay tanoo kale dhacda aayahana, keenaysa in loo buub reebi
dooni oon si fudud farta loogu fiiqi doonin, dhinaca kale dadka
maskaxda furan leh, xagooda waxa durba ka soo baxaya dhawaaqyo
badanoo dawlada ku boorinaya inay xaal mariso dadka Marookaanka ah
ee dhibanaha arintan ku noqday guud ahaan iyo gaar ahaanba.
Gabogabo, sida aad adba akhristoow ogtahay maaha wax ugub ah oo
cusub dhacdadani ( eedayn aan cadayn loo helin ) iyo kuwa
sawaabiyaaba, waxana ay ka mid tahay waxyaabaha ku soo kordhay
dunida intii ka danbaysay qaraxii daarahii dhaadheeraa ee Maraykanka
11/09/2001.Waana cabsiyaha iyo kala fogaanshaha beryahanba ka
dhexjira dadyowga kala isirka ama diinta ah ee dalalka qaar ku wada
nool, waxana hubaal ah in sida hada ay wax u socdaan nin guul-leh
noqonayn nina guul-darayste, ee aynu dhamaanteen dhibane wada
noqonayno naca iyo xumaantuna ina wada saamayn doonto, mana aha sida
kali ah een ku sandulaysanahay inaynu u qaabayno nolosheeno, waxa
hubanti ah inay jiraan siyaalo kale oo ka wanaagsan oon ku wada
noolaan karo, oon ahayn kala sooc iyo kala qoqob ku salaysan ''
anaga iyo idinka ama aniga iyo adiga '' , ee ah '' inaga '' oo ay
dhab tahay inay inoogu badin lahayd. Wacnaan lahaydaa aduunkanoo loo
walaaloobaa ku wada noolaaanshahiisa !
Somaliland
ha jirto oo ha joogto.
Qoraagii Weynaa:Cali
Cumar Xasan |
|