Waraysi Khaas Ah
Xildhibaan Maxamed Nuur Carraale (Duur)
“Rayaale
Iyo Axmed Yaasiin Waxa Kaliya Ee U Hadhay Waa Inay Dadka Iibiyaan”
"Xildhibaanadii
La Soo Doortay Markay Tallaabo Kale Oo Ay Qaadaan Garan Waayeen, Qof
Kastaaba Mooraal Xumadiisa Gaarka Ah Ayuu La Hoos Jiifsaday
Gurigiisa"
Waraysi Khaas Ah Xildhibaan Maxamed Nuur
Carraale (Duur)
Mudane Maxamed Nuur Caraalle (Duur),
oo ka tirsan Golaha Wakiilada Soma liland, ayaa sheegay in
Mudaneyaashii aqalkaasi ay niyad-jab la jiifaan Gury ahooda,
halka qaar kalena ay dibadaha u baxeen markii xukuumaddu ay ku
dhaqmi wayday shuruucdii iyo soo jeedimahoodii, waxaanu xukuumadda
ku eedeeyay inay dhamaysay khayraadkii badda isla markaana ay
xiligan bilow day inay iibiso guryihii ay ka tageen
Ingiriiskii iyo Siyaad Barre.
Mudane Duur, oo ka mid ahaa Mudaneyaashii laga soo doortay Gobolka
Saaxil, kana soo baxay Xisbiga UDUB, wuxuu sidaasi ku sheegay
waraysi khaas ah oo uu xalay siiyay Weriyaha Shabakada Wararka ee
Ramaas News, Cumar Maxamed Faarax, kaas oo uu Mudanuhu kaga hadlay
arrimo badan oo ay ka mid yihiin xaaladda siyaasadeed ee dalka iyo
mustaqbalka Golahooda Wakiilada, waxaanu wareysigaasi u dhacay sidan:
S: Waxaa dhacda in aanay Mudaneyaasha Golihiinu ka soo xaadirin
intooda badani Golaha oo fadhiyadiinii ay u baaqdaan Kooram la’aan,
Maxaa Golihii la soo doortay ku dhacay?
J: Golaha Wakiilada Somaliland ee la soo doortay wuxuu ka niyad
jabay, oo uu quus ka joogaa hawshii uu gacanta ku hayay oo ay waxba
ka fuli waayeen. Golaha la soo doortay Mudane kastaa ma uu doonayn
in 82-ka Mudane qol la iskugu xareeyo oo ay dhexdooda ka noqoto
shimbirayahow heesa. Waxayse doonayeen inay tallada qarankan qayb ka
ahaadaan, oo ay wax ku yeeshaan, taasina way beenowday. Ummaddii way
rajo beeshay goleyaashii qarankuna way rajo beeleen, rajo-beelkaas
dalka ka muuqda ayaa Golahana saameyn ku leh, sababtuna waxa weeye
Goluhu wuxuu soo saaraa shuruuc, shuruucda uu soo saarana laguma
dhaqmo. Waxa kale oo Goluhu uu tallo ka soo saaraa arrin u muuqatay
oo uu yidhaahdaa inta uu go’aan Gole ku soo saaro sidaasi hala yeelo,
Goluhu waaqica iyo duruufta dalka wixii aragti ah ee uu ka jeediyo
iyadana laguma dhaqmo. Markaa qof kasta waxa u muuqatay ayaan is
leeyahay, maadaama oo go’aamadooda mid sharci ah iyo mid tallo soo
jeedin ah midna soconaynin niyad jab ayay Mudaneyaashii la soo
doortay ku keentay markay tallaabo kale oo ay qaadaan garan waayeen,
ama tallo kale oo wax la iska weydiiyay oo la iskugu yimid ay
waayeen ayuu qof kastaaba mooraal xumadiisa gaarka ah la hoos
jiifsaday Gurigiisa. Markaa qaar dhoofay oo dibadda ku maqan iyo
qaar Magaalada jooga oo aan danaynayn waxa Golaha ka socda ayay
noqdeen.
S: Mudaneyaal ayaan fikiradaadaasi aan qabin oo aaminsan in
Mudaneyaashii mucaaridka ah oo ka faa’iidaysanaya shirgudoonka oo
mucaarid ahi ay Golaha Wakiilada qasayaan, Arrintaasi maxaa ka jira?
J: Taasi ma jirto oo Saxaafadduba markhaati bay ka tahay, Golihii
imika wuxuu marayaa inaan la iskuguba iman, wax qas ah iyo wax
dhibaato ah oo haba yaraatee ka dhacayna ma jirto. Doodaasina ma aha
mid caqli ku salaysan. Goluhu qas uma xidhmine’e wuxuu u xidhmay
karti darro, waxqabadkiisii iyo wixii uu soo jeediyay oo socon
waayay iyo mooraal xumo ayuu u xidhmay. Mooralka ayaa Mudaneyaasha
ka dhintay, waxaana ka dhintay hankii ay filayeen inay dalka wax
kaga qabtaan. Goluhu dhalinyaro ayuu u badan yahay, dadka
dhalinyarada ahna dhammaan hankooda waxa ku jira inay wax qabtaan,
oo ummaddii soo dooratay ay raad wanaagsan uga tagaan, taasna
Xukuumadda ayaa ka fara-maroojisay.
S: Markaa ma mooraal xumadaas aad sheegtay ayaad ku sii jiraysaan,
mise xal kale iyo inaad meesha banaysaan ayaad soo bandhigaysaan?
J: Mayee xal kale ayaanu samaynaynaayoo xalkaasi oo ah hal qodob,
goluhu si uu u shaqeeyo fursadda xiligan taallaa waa dalkii wakhti
doorasho ayuu ku jiraa markaa, waa in Xildhibaanadu ay fursadaasi ka
faa’iideeyaan, si uu u yimaado isbedel siyaasiya oo dalka ka dhaca
oo la rido xukuumaddan Golaha fadhiisisay.
S: Waxa jirtay in Mudaneyaal badan oo Xisbiga UDUB ahi ay fadhigii
Golaha ee maanta (shalay) ay iman waayeen, iyadoo la sheegay inay
diidanaayeen mooshin ay wadeen Mudaneyaasha mucaaridku, muxuu ahaa
mooshinkaasi yaase waday?
J: Waxay ka shakiyeen hal Qodob oo ah, waxaynu ognahay in xisbiyadu
ay heshiis gaadheen markii afar jeer oo hore muddo kordhin la
sameeyay in aan mar dambe muddo kordhin la samayn, oo doorashaduna
ku dhacdo 29-ka bisha September ee foodda inagu soo haya. Waxa
muuqata ifafaale ah inaanay doorashadu ku qabsoomayn 29-ka Bisha
September, haddii korodhsiimadii heshiis laga galay, oo aanay
doorasho qabsoomayn soo ma aha in Goleyaashu ay ka fikiraan haddii
wakhtigaasi doorasho dhici waydo wixii dalka lagu badbaadin lahaa.
S: Mooshinkan oo aad wax ka saxeexday, Golaha miyaad horgeyseen?
J: Haa shirgudoonka ayaa gacanta ku haya wax kalena ma aha ee waa
maxaa la yeelayaa oo looga wareegayaa haddii ay doorashadu
wakhtigaasi ku qabsoomi waydo.
S: Waxaad tahay Mudane ka soo baxay xisbiga UDUB, sidan aad u
hadlaysaana waa luqadii mucaaridka, dadkii UDUB-nimo kugu doortay
maxaad ku qancinaysaa?
J: Dadkii ii coddeeyay waa run oo waxay iigu codeeyeen Xisbiga UDUB,
laakiin waxa la dooranayay waxay ahayd qofka ee may ahayn Xisbiga,
dadku shalay magacii UDUB ee aan ku tartamayay may dooran ee Aniga
ayay I doorteen. Anigaa la I eegayaa waxaan qabto, waxa aan dadka u
idhaahdo iyo sida aan ummadda u metelo masuuliyadda I saaran. Shalay
markii la doortay Daahir Rayaale Kaahin iyo Axmed Yuusuf Yaasiin,
UDUB lama doorane’e labadaasi shakhsi ayaa Madaxweyne iyo Ku Xigeen
loo doortay. Go’aan qaadashadaydu waxay maanta ku salaysan tahay
labadii qof ee shalay la doortay, dadkii ma ugu adeegeen sidii
ummaddu rabtay, waxaan markaa iskugu jawaabay markii aan su’aashaas
is weydiiyay maya. Maadaama oo aanay shacbigii ugu adeegin sidii la
rabay waxaan aaminsan nahay in la bedelo labadaasi qof oo laba qof
oo ka tayo roon kana tayo badan loo dhiibo. Xukuumadda maanta
dhisani waxaan aaminsan nahay Badda wixii ku jiray inay dhammaysay,
dabadeed imika ay bilowday ama badhtanka kaga jirto inay daarihii
Ingiriiskii ka tegay iyo dhulkii Siyaad Barre ka tegay ay iibisay.
Arrintu markay halkaasi marayso waxa uu damiirku I farayaa inaan
sidaan loogu hiilin karin. Waxa keliya ee hadhay haddii aan laga
qaban Daahir Rayaale iyo Axmed Yuusuf Yaasiin dalka waa inay dadka
iibiyaan, Aniguna taasi inay dhacdo ugu hiilin maayo.
Haatuf
|