Al-Jaabiri Oo La
Sheegay Inuu Xoolihii ka dejiyay Ereteriya
Afhayeenka guddiga ganacsatada
xoolaha nool ee Somaliland oo ka soo horjeeday heshiiskii ay
xukuumadda Somaliland la gashay ganacasade Saleban Al-Jaabiri, ayaa
sheegay in Ganacsade Al-jaabiri uu xoolihii uu ka qaaday Berbera ka
dejiyay dalka Ereteriya.
Afhayeenka guddiga ganacsatada Mr. Cabdiraxmaan Maxamed Xuseen, oo
xalay u waramay Geeska Afrika, ayaa sheegay in Saleban Al-jaabiri ay
ujeedadiisu ahayd inuu xoolaha Somaliland ku haysto kooto, “Wuxuu
bilaabay in Xoolihii uu ka qaatay Berbera uu geeyo Eleteriya.
Eleteriya oo sida aynu ognahay cilaaqaadka xaga dawladda iyo xaga
shacabkaba ay shaki ka qabaan oo xataa arrimahan Soomaaliya iyada
loo tiriyo dhibaatooyinkeeda, Maantana nasiib darro labaad ayaa
xoolihii Somaliland ku dhacday oo Ereteriya ay ku sheegatay xoolihii
Berbera laga raray in ay iyadu leedahay oo lagu caafimaadinayo
Maxjar Eleteriya ku yaala, oo iyadoo xoolihii lagu qoray in ay
Eleteriya leedahay uu Sucuudiga u dhoofinayo, oo Al-jaabiri labadii
markab ee u dambeeyay oo midna Al-iimaan la yidhaahdo midna Jaarlo
la yidhaahdo wuxuu geeyay Eleteriya, arrintaas oo run ahaantii aanu
aad uga xumaanay oo wixii xukuumaddu sheegaysay iyo wixii uu isagu
sheegayayba ay noqonayso in ummaddana la majaro habaabinayay, isna
been uu sheegayay wax uu ugu maqan yahayna aanay jirin.” Ayuu yidhi
Afhayeenkani, waxaanu intaas raaciyay, “Markaa iminka waxaa nagu
maqaalo ah in markab dambe oo iminka Al-jaabiri rarayay oo Al-barako
la yidhaahdo ay xoolihiisii taagan yihiin oo Madaxwaynuhu xanibay,
arrintaas oo Madaxwaynuhu ka cadhooday arrintaa qarsoodiga ah ee
ninkii warka laga sugayay uu noqday nin Ereteriya u galay, in kasta
oo aanaan la xidhiidhin, wararka na soo gaadhayaana waxay sheegayaan
in arrintaa xukuumaddu aad ugu kacsan tahay.”
Ugu dambayn, waxa uu Afhayeenku yidhi, “Markaa anagu ummadda reer
Somaliland waxaanu u sheegaynaa siddeed kun oo qof oo xoolaha ka
ganacsanayay iyo intii dhaqaale ku qabtay dalkaba, dee waa la
ogyahay in laba nin uun loo xidhay, ujeedo been ah oo aan sal iyo
raad lahayna loogu xidhay oo Sucuudi baan soo furayaa ku
andacoonayay tiina la waayay, in ay been ahayd uun bay arrintaasi
markhaati ka tahay.”
Source: Wargeyska Geeska Afrika
|