Arday Ka Qalin Jabisay
Jaamacada Burco oo Shahaadooyin La siiyey
Munaasibad balaadhan oo loogu
talo galay in lago soo afjaro waxbarasho socotay muddo hal sano ah,
oo shahaadooyin lagu siinayey 60 Arday oo qalin jabisay Jaamacada
Burco ayaa habeenkii xalay lagu qabtay xarun ay leedahay Jaamacadano
oo ku taala badhtamaha Magaalada Burco.
Munaasibadan oo ay soo qaban
qaabiyeen Maamulka Jaamacada waxaa loogu talo galay in ilaa 60 Arday
oo afartan ka midi ay baranayeen Aqoontoa IT (Information
Technology) labaatan kalena loo tababaray luqada loo sameeyo
dhamaystirkii wadada waxbarashada.
Gudoomiyaha Jaamacada Burco Prof C/salaam Yaasiin oo munaasibadan
qalin jabinta ka hadlay ayaa waxaa uu sheegay in ujeedada loogu talo
galay fursadan gaabgaaban ee ay bixinayso jaamacada ay ugu muhiimsan
tahay inay dhisaan dadka ay ku kala go’oday waxbarashada iyo weliba
inay soo saaraan dad leh xirfado cusub.
Gudoomiyaha waxaa uu cadeeyey inay aqoontu tahay mida hagaysa qofka
ayna ku xidhan tahay heerka nololeed ee qofku, taasi oo uu xusay
inay dhalinyarada dhisaan mustaqbalkooda.
“ Hantida waa loo waayaa, laakiin cilmiga lama waayo ee qalbigaaga
iyo caqligaaga ayuu la socdaa” ayuu yidhi.
Gudoomiyaha waxaa kale oo uu ugu baaqay Ganacsatada Somaliland inay
dhiirigeliyaan oo ay kaga shaqaysiiyaan aqoonta kana faa’iidaystaan
aqoonta dadka wax ka bartay Jaamacada.
Sidoo kalena Xasan Maxamed Dalmar oo ka mida Maamulka Jaamacada ayaa
soo dhoweeyey dedaalka ardayda kuna tilmaamay kuwo u baahan in la
taageero, waxaanu ardaydaasi gebagebadii la siiyey shahaadooyinkii
ay mutaysteen.
Dufcada ardayda Jaamacada oo noqon doonta dufcadii 4aad, ee ka soo
baxda Jaamacada ayaa waxay ka qalin jabisay xarun loogu magac daray
Adeega Bulshada, oo ay Jaamacada Burco ku leedahay badhtamaha
Magaalada.
Siciid Axmed Raage
Burco, Somaliland
|