BBC-du Xaal ha siiso
dadka Gobta ah ee reer Somaliland!
BBC-da in aanay jirin beryahan
danbe, dhawaaqyadii ay dhegtu ku raaxaysan jirtay iyo barnaamijyadii
diirin jiray maanka waa laga wada haqab la' yahay, in afkii
Somaaliga ahaa ee dhawaaqa iyo dhihidaba dhadhanka wanaagsan lahaa
ku amuumoobay kuna foolxumaadayna waa marag ma doon, in ragii raga
ahaa ka huleeleyna waa la yaqiinsan yahay, inay had iyo jeer ku
dhiiranayd buunbuuninta xumaanta Somaliland waan uga baranay, waxase
wax aan la qaadin karin ah inay isku dirto dadka reer Somaliland iyo
dadka kale ee af-ka Somaliga ku hadla, ama Soomaalida ah ee hada
martida ku ah Dalka Jamhuuriyada Diimuqraadiga ah ee Somaliland.
BBC-du necbaanshaha iyo ceebaynta ay had iyo jeer la daba joogto
Somaliland waxa uu gaadhay halkii ugu danbaysay intii ka danbaysay
qaraxyadii Hargysa ka dhacay, bal si fiican u dhuux warkan hoosta
aan ku soo qoray!. Maanta oo ay bishu tahay 9./11/2008, oo ah maalin
Axad ah, warkii duhurnimo ee saacadu markay ahayd '' labadii''
afrikada bari, waxa u qaadan waa ahayd Warkaasoo uu akhriyay nin
magaciisa ku sheegay in la yidhaa Axmed.....?. oo War hor dhac ah oo
ku saabsan sida dadka ka soo qaxay Koonfur ( somaliya) ee jooga
Somaliland loo ugaadhsanayo, ka dib qaraxyadii ka dhacay Hargaysa!!.
Waxa uu yidhi ninkaasi ( weriye Axmed) isaga oo cod dhiifaysan ku
ladhaya akhriska Warka hadaladan aan sida ay yihiin u soo min-guuriyay,-
U fiirso. Warkii 1400, Afrikada bari.
Wariya Amed...( BBC): Dadka reer Koonfureedka ah ee ku soo qaxay
dalka la baxay Somaliland, waxa soo wajahday dhibaato cusub oo xaga
amaankooda la xiriirta, intii ka danbaysay qaraxyadii ka dhacaay
Hargaysa waxa si is daba jooga xabsiyada loogu gurayaa dadka reer
koonfureedka ah, iyaga oon loo Aaboyeelin! rag iyo dumar! caruur iyo
ciroole! caame iyo culimo. Way dhacdaa in dadka qaar la sii daayo ka
dib marka laga shaki baxao, ama waji gabax loo arko in marka horeba
la soo qabtay, Laakiin hadiiba aad reer Koonfureed tahay Somaliland
aad maanta ku nooshahay, waxad bar tilmaameed u tahay in lagu xidho!!
waxana muuqata in dadka reer Somaliland qaarkood ay si kale u
qaateen, hadaladii ay madaxdoodu u sheegeen ee ahaa, soo sheega
waxii aad ka shakidaan! waxa maanta u danbaysay la xidhay, gabadh
magaceeda la yidhaa Ayaan.....
Akhriste hadaba waa Cajiibe, warkaasi ma yahay mid jira? jawaabta
cid kastaa garanaysa ah, inaan reer Koonfureed la ugaadhsanayaa
jirin oo si gooni ah loo rabaa, ama jeel ku yaal Somaliland laga
buxiyay, ee ma yahay ninka warkaa akhriayaa ama qoray nin u qalma
inuu noqdo wariye Idaacad laga filayay ama lagu yaqaan
dhexdhexaadnimo ka shaqayn kara? Ta kale,-
Akhristooy, hadaladaasi ma yihiin hadalo qabta, dadka reer
Somaliland ee sida walaaltinimada iyo maxabada hagar la' aanta ah u
soo dhaweeyay dadkii ka soo qaxay Somaliya (ex-koonfur), ee
abaalkoodiina loogu guday in la qarxiyo madaxtooyadii Somaliland,
iyo Hyadihii kale ee martida dalka Somaliland ku ahaa si dalka looga
eryo, iyada oo weliba si badheedh ah loo dilay, dad aan waxba
galabsan oo tiradoodu ka badan tahay 23 qof , la dhaawacayna intaa
in ka badan, inaga oo weliba og waxii ina soo maray shalay!!
Waxa la yaab leh, ma ku daray ninkan wariye isku sheega ahi sida
dadka dadkoodii nolosha ku gubteen ee ay ku dhinteen qaraxyadaasi
dareenkoodu yahay, marka uu weliba been aan jirin afuufayo!! ma ku
darsaday ninkan makarafoonka aan dabarka lahayn afka ku camcaminayaa,
in waxan u sheegayaa yahay xadhig iyo tuhun dadka laga shakiyo ah
cida ay doonaanba ha ahaadaane lana wada ogyahay oon wax qarsooni
jirin hada?
BBC-du inay siinad baxday waa la iska wada ogaa, inse ay heerkan
gaadhayso oo ay ka hoos marayso idaacadihii Beelaha ee ay nimankan
hada u badan Makarafoonka BBC-du xidhiidhka la lahaayeen, maan
moodayn! Wariyuhu Made ama xad iyo xeer ayaa joojinaya marka madashu
leedahay Dhaqan haboon oo gar qaate ah, waxase hubaal ah inaanay
Qaybtan BBC-somali service hada waxbaba ku hakanayn oo ay dabar iyo
seetaba goosatay!
Ninkoow ( weriye Axmed) waa inad Xaal adiga iyo Idaacada BBC-duba
Siisaan, dadka reer Somaliland ee Gobta ah, ee aad xumaan aan qaban
marmainayso.
Somaliland Ha Jirto
oo ha Joogto
Cali Cumar Xasan
|