Berbera oo la ceeryoosan dadka ku soo qulqulaya iyo Tirada Hordhaca ee Isdiiwan galisay

diiwaangelinta codbixiyeyaasha doorashooyinka ayaa maalintii saddexaad si habsi ah uga socata Gobolka Saaxil, iyada oo dadweynaha u dhashay Gobol Saaxil-na ay si weyn ugu qulqulayaan deegaannada ay ka soo jeedaan si ay isaga diiwaangeliyaan.

Waxaanna shalay ilaa xalay magaalada Berbera laga dareemayey dad xad-dhaaf ah oo soo buux dhaafiyey goobaha diiwaangelin, kuwaas deegaannada gobollada Somaliland iyo deegaannada ka baxsan Saaxil laga soo daad-guraynayo baabuurta yaryar iyo gawaadhida xamuulka, iyada oo magaalada laga dareemayo cidhiidhi, isla markaana ay xalay dadku markii ay meel ay seexdaan waayeen ay qaarkood gogooshooda dhigteen gidaarrada, kuwaas oo intooda badanna ka yimi magaalooyinka Hargeysa iyo Burco.

Waxayna dadku shalay safaf dhaadheer u galeen goobaha diiwaangelinta oo ahaa qaar gacan fudayd badani ka muuqatay, taas oo sababtay in dad badani goob kasta iska diiwaangeliyaan iyada oo aanay wax cilado ah oo la taaban karaa soo bixin, iyada oo la filayo in maalmaha soo socda tirada dadku ay soo badato.

Inkasta oo markii Salaasadii dorraad hawshu diiwaangelintu ka bilaabantay Gobolka Saaxil gacan culays jiray oo aan dad badan la diiwaangelin, laakiin hawsha diiwaangelintu waxay shalay ku socotay si dardar cusubi ka muuqato, dadkuna ay safaf dhaadheer ugu jiray inay is diiwaangeliyaan.

Inkasta oo aan si rasmi ah loo ogeyn tirada dhabta ah ee 106 goobood ee Gobolka Saaxil iska diiwaangelisay, haddana xogaha laga soo ururiyey qaar ka mid ah goobaha codbixinta magaalada Berbera ayaa waxay shegayaan in tirada ugu yare e shalay lagu diiwaangeliyey goobuhu ay tahay ilaa 90 qof, halka meelaha qaar la diiwaangaliyey dad gaadhaya 183, 175, 171, 160, 175, 124, 150, 134, 175 qof tiradaas oo laga soo ururiyey 10 goobood oo ka mid ah 16 ka goob-diiwaangelineed ee magaalada Berbera, inasta oo aan tirade goobkasta iska diiwaangelisay aana si rasmi ah loo xaqiijin karin ayaa haddana celceliska dadka shalay iska diiwaangeliyey magaalada Berbera waxa lagu qiyaasi karaa 2,550 qof.

Masuuliyiinta Komishanka Doorashooyinka oo aannu xalay la xidhiidhnay si aannu wax uga waydiino tirada ilaa hadda is diiwaangelisay aanay noo suurtogalin in aannu xog dhab ah ka helno, iyaga oo oo masuuliyiiintaas ka gaabsaday in tirada dhabta ah ee is diiwaangelisay la ogaan doono maalmaha soo socda, maadaama deegaannada Gobolka Saaxil ee hawsha diiwaangelintu ka socoto ay aad u kala durugsan yihiin oo aanay suurtogal ahayn in lawada ogaado tirada iska diiwaangelisay.

Waxa kale oo aan iyadana la ogayn tirada dadka Salaasadii dorraad is diiwaangelisay iyo tirada dadka iska diiwaangaliyey deegaannada Gobolka Saaxil ee ka baxsan magaalada Bebera, balse sida wararku xusayaan in Gobolka Saaxil ay dad badani iska diiwaangelin doonaan, haddii hawshu u socoto sida loogu talogalay oo aanay wax cilado ahi iman.

Dhinaca kale, waxa jira dad ajaanib ah oo isku dayey inay iska diiwaangeliyaan Berbera, kuwaas oo hawlwadeennada diiwaangelintu qabteen, dadkaas oo ahaa laba qof mid Oromo ah iyo mid Soomaalida koonfurta ah, waxa lagu kala qabtay laba goob-diiwaangelineed, kadib markii la arkay in aanay muwaadiniin ahayn.

Togdheernews