Bulaale
oo ka Baaqsaday in uu waajaho dood dhex mari
lahayd isaga iyo Mucaaridka
“Dooddaas annagu waannu tagnay,
laakiin waxa ka baaqday xisbiga talada haya ee UDUB, sababta ay uga
baaqdeena ma garanayo” Muuse Biixi Cabdi
“Waxaan u malaynayaa qolada UDUB
inay daba-ka-warwar qabaan… oo inay fagarayaasha yimadaan way ka
baqayaan”
Xasan Xuseen Maxamed (Codyare)
Xisbiyada mucaaradka ee
KULMIYE iyo UCID
ayaa markii horreysay ka hadlay sababta uu xisbiga talada haya ee
UDUB uga baaqday inuu ka qaybgalo dood ku saabsanayd hawlaha
diiwaagelinta iyo doorashooyinka oo ay isaga horimanayeen saddexda
xisbi qaran.
Doodan oo ay soo qabanqaabisay hay’adda Horumarinta Dimuqraadiyadda
ee IRI oo beryahanba hawlo la xidhiidha xoojinta dimuqraadiyadda ka
waday Somaliland, ayaa la doonayey in lagu lafo-guro, isla markaana
qiimayn lagu sameeyo aragtida dhinacyada hawlaha doorashooyinku
khuseeyaan sida ugu habboon ee lagu hirgelin karo Diiwaangelinta iyo
doorashooyin xor iyo xalaal ah. Waxa qorshuhu ahaa inay ka qabsoonto
maalintii bisha Ramadaan ugu dambaysay ee Isniintii toddobaadkan
huteelka Maansoor ee magaalada Hargeysa. Waxaana doodaas lagu
casuumay oo hore waraaqo loogu geeyey masuuliyiin sarsare oo ka
tirsan saddexda xisbi, kuwaas oo kala ahaa xisbiga UDUB oo uu
matalayey Xoghayaha Guud Mr. Maxamed Ismaaciil Bullaale, UCID oo uu
ka socday Guddoomiye-ku-xigeenka kowaad Mr. Aadan Maxamed Mire (Waqaf)
iyo KULMIYE oo matalayey Guddoomiye-ku-xigeenka kowaad Mr. Muuse
Biixi Cabdi.
Haseyeeshee waxa kulankii doodaas loo qorsheeyey uu noqday mid aanay
waxba ka jirin, kadib markii Xoghayaha Guud ee xisbiga UDUB uu ka
maquurtay inuu ka soo qaybgalo, isla markaana uu kaalintiisii u soo
igmaday Mr. Cumar Jaamac oo ka tirsan xafiiska siyaasadda ee
xisbigaas, balse labada Guddoomiye-ku-xigeen ee matalayey labada
xisbi mucaarad, ayaa diiday inay ka qaybgalaan dood uu ka maqan
yahay xubintii lagu soo martiqaaday ee la heerka ahaa, iyaga oo ku
dooday in xisbiga UDUB uu meel kaga dhacayo baratakoolka iyo
nidaamka dawladnimo, isla markaana aannu Mr. Cumar Jaamac ahayn nin
la heer ah xagga mansabka iyo siyaasadda toona.
“Haddii aannu imanayn Bullaale oo ah ninkii la soo martiqaaday ee
nala heerka ahaa kama qaybgalayno dooda, haddii kale kursiga UDUB ha
bannaanaado ama haloo dhigo ama sidaa halagu joojiyo.” Hadalkaas
waxa ka midaysnaa labada Guddoomiye-ku-xigeen ee xisbiyada
mucaaradka ah.
Muddo badan markii doodaasi socotay, ayaa madaxdii hay’adda kulanka
soo qabanqaabisay iyo xubnaha xisbiyada kale matalayey isku
afgarteen in telefoon lagula hadlo Xoghayaha UDUB Mr. Bullaale, si
loogu qanciyo inuu dooda ka soo qaybgalo. Hase ahaatee waxa dadkii
goobtaas joogay layaab ku noqotay markii Xoghayuhu si cad u diiday
inuu kulankaas yimaado.
Haddaba, si aannu wax uga ogaano sababta uu xisbiga UDUB uga baaqday
dooddaas, ayaanu xalay isku daynay in aannu la xidhiidhno Xoghayaha
Guud ee xisbiga Mr. Bullaale, balse way noo suurtogali wayday in
aannu helno, haseyeeshee waxa uu wargeyska Jamhuuriya la xidhiidhay
masuuliyiinta xisbiyada mucaaradka ee UCID iyo KULMIYE oo iyaguna
dooddaas ka qaybgalayey.
Guddoomiye-ku-xigeenka koowaad ee xisbiga KULMIYE Md. Muuse Biixi
Cabdi oo aannu arrintaa wax ka waydiinay, ayaa yidhi; “Dooddaas
annagu waannu tagnay, laakiin waxa ka baaqday xisbiga talada haya ee
UDUB, sababta ay uga baaqdeena ma garanayo, mar kale ayaana doodda
inay qabsoonto la muddeeyey, walina nalooma yeedhin.”
Guddoomiye-ku-xigeenka koowaad ee xisbiga UCID Md. Aadan Mire Waqaf
oo dooddaas ka qaybgalayey oo aannu la xidhiidhnay ayaanu isagana
waynay, balse Afhayeenka xisbiga UCID Xasan Xuseen Maxamed (Codyare)
oo aannu sababta ay UDUB dooddaas uga baaqatay wax ka waydiinay,
ayaa sheegay in xisbiga UDUB ay ku dhacday kalsooni-darro, kadib
markii xafladdii xidhitaanka Jaamacadda Hargeysa lagu oriyey, sidaa
darteedna ay ka baaqanayaan in goobaha munaasibadaha ah haddii ay
tagaan lagu qayliyo.
“Doodda wax adagi kumuu jirin ee ajanduhu wuxuu ahaa in lagaga hadlo
hawlaha diiwaangelin iyo doorashooyinka, laakiin waxaan u malaynayaa
qolada UDUB inay daba-ka-warwar qabaan oo waatii Jaamacadda laga
qaylyey, sidaa darteedna inay fagaarayaasha yimaaddana ayey ka
baqayaan,” ayuu yidhi Codyare.
Murankaas markii la isku mari waayey waxa la go’aansaday in dooda
dib loo dhigo oo la qabto habbeenimadii maalintaas oo noqonaysa
habbeenkii ciidda ee salaasadii 9:00 fiidnimo, iyada oo
masuuliyiinta hay’addu ku qanciyeen labada Guddoomiye-ku-xigeen Mr.
Muuse Biixi iyo Mr. Waqaf in ay mar labaad warqad u qorayaan
Xoghayaha UDUB, si uu uga soo qaybgalo doodaas. Haseyeeshee Mr.
Bullaale markii labaadna kulankaas dooda ahaa kamuu soo qaybgelin,
waxaanay taasi mar kale dhalisay in uu bilowdo marunkii markii hore
oo kale, kadibna waxay go’aan ku gaadheen in saddexda xibiba laga
joogiyo doodaas oo ay ka qaybgalaan oo keliya ururrada bulshada iyo
Komishanka Doorashooyinka.
Jamhuuriya Online
|