Cali Warancadde oo Jamhuuriya uga Warramay Boolis la Wareegay Xarunta Dhexe ee Xisbiga UDUB

Daahir Rayaale oo si degdeg ah dalka u imanaya + magacyada xubno loo xulay soo dhaway ntiisa + qalab laga qaatay xarunta UDUB ee Hargeysa

“Go’aanka Guddoomiyaha UDUB Ninka ku qanci waayaa isagaa cirka roob ku og…. furayaas hiina annagaa ayaa beddelnay si loo ilaaliyo hantida xafiiska dhexdiisa taal”

Hargeysa (TNN)- Wasiirkii hore ee Duulista Hawada, isla markaana hore u sheegay inuu u sharraxan yahay madaxweynenimada xisbiga UDUB dhexdiisa Md. Cali Maxamed Waranca dde, ayaa ka hadlay sababaha keenay in ciidamo boolis ah la wareegaan shalay xarunta d hexe ee xisbiga mucaaradka ah ee UDUB ku leeyahay caasimadda Hargeysa.

Md. Cali Maxamed Warancadde oo Jamhuuriya khadka telefoonka kula xidhiidhay xalay si wax looga weydiiyo sababaha ciidammada boolisku u tageen xarunta dhexe ee xisbigooda, waxa uu sheegay inay iyagu u yeedheen bilayska si ay u ilaaliyaan ammaanka xarunta UDB iyo qalabka hoos yaalba.

“Ciidan boolis ah oo la wareegay xarunta UDUB ma jiraan ee waa ciidan ammaanka ilaalina ya oo annagu aannu u yeedhanay, sababtuna waxa weeye waxa xafiiska UDUB laga qaatay qalab, si markaa xarunta ammaankeeda loo ilaaliyo oo marka laga maqan yahay aanay cid u iman ayaannu ciidanka u keenay, laakiin wax khilaaf ah oo jiraa ma jiraan.”

Md. Cali Warancadde oo la weydiiyey inuu faahfaahin ka bixiyo nooca qalabka laga qaatay xafiiska UDUB iyo sababta ay furayaashii hore uga beddeleen xaruntooda, waxa uu yidhi; “Qalabka la qaatay waa kombuyutarro iyo qalab kale oo xafiis, furayaashiina annagaa ayaa beddelnay si loo ilaaliyo hantida xafiiska dhexdiisa taal, xafiiska furayaasha laga beddelayn a waa xafiiska xoghayaha guud oo uu hadda ku sime ka yahay Cabdixaliim Maxamed Muuse, laakiin xafiisyadii kale waa sidoodii o

o wax furayaal ah oo laga beddelay ma jiraan.”

Waxa kaloo uu sheegay in madaxweynihii hore ee Somaliland, ahna Guddoomiyaha xisbiga UDUB Md. Daahir Rayaale Kaahin uu dalka iman doono 5 February 2012, isagoo ku eedeeyey Ku-simaha Guddoomiyaha UDUB Md. Axmed Yuusuf Yaasiin inuu ku guuldarraystay inuu xisbiga si daacad ah u hoggaamiyo muddadii Rayaale dalka ka maqnaa.

Mar la su’aalay inay dhinacoodu ku qanci doonaan haddii Guddoomiyaha UDUB markuu dalka yimaad uu soo saaro go’aan lagu xallinayo khilaafka xisbiga ka dhex taagan, waxa uu ku jawaabay; “Go’aanka Guddoomiyaha UDUB ninka ku qanci waayaa isagaa cirka roob ku og, xisbiguna guddoomiye qudha ayuu leeyahay oo ah Daahir Rayaale Kaahin, markaa wixii guddoomiyuhu xal u arko waa lagu qancayaa.”

Dhinaca kale, qoraal ka soo baxay xisbiga UDUB oo nuqul ka mid ah Jamhuuriya helay ayaa lagu shaaciyey magacyada guddi qabanqaabo oo loo xilsaaray soo dhowaynta Daahir Rayaale Kaahin oo la sheegay inuu dalka ku soo laaban doono horraanta bisha February ee foodda innagu soo haysa.

Guddiga qabanqaabada soo dhoweynta Daahir Rayaale oo uu guddoomiye u yahay Mr. Cismaan Cabdillaahi Cigaal (Hindi) waxay magacyadoodu kala yihiin; Cali Maxamed Warancadde, Axmed Maxamed Ciise, Maxamuud Cabdi Faarax (Malow), Axmed Xaaji Daahir Cilmi, Keyse Cali Geeddi iyo Samsam Maxamed Cige.
 

source:jam