Cukuse: Wasiir Geel Aanu lahayn Oo Dayacan Raacaya: Faallo Wariye:
SCC (Kalshaale)
Kala nasiib iyo Maalmo wanaagsan Wasiirro badan oo soo maray
Wasaaradda Warfaafinta iyo Wacyi-gelinta Somaliland, taasoo ah
Hay’ad muhiimad weyn ugu fadhida qaranka, una dhiganta Wasaaradda
difaaca dalka
Mid Ideecad cusub keena, mid Telefishan soo kordhiya iyo mid dib u
habayn ku sameeya qaybaha kala duwan ee ay Wasaaraddu ka
koobantahayba, ma jiro Wasiir waxqabad la’aan kaga tegay Xafiiska
ugu sareeya ee wasaaraddaasi laga maamulo, balse waxa isweydiin
badani ka taagantahay sababta ay u noqotay Wasaarada ugu wasiir
bedelka badan tan iyo markii xukuumadda Madaxweyne Siilaanyo talada
la wareegtay.
Sida aan hore u sheegay Wasaaraddani waa wasaaradda labaad ee awooda
difaaca siyaasada Qaranka iyo Xuduudaha waddanka qayb laxaad leh
kaga jirta, waxaana ka hawl-gala Boqolaal Askari oo aan qori dhacaya
sidan, balsehaysta hub ugu filan difaaca Naftooda iyo danaha
aragtiyaha siyaasadeed ee lagu shubo.
Waxa kale oo Wasaaraddan magac ahaan u hoos yimaada Boqolaal Askari
oo Falaago ah oo aan ka amar qaadan Taliye qaybeedyada ay Wasaaraddu
leedahay iyo Taliyaha guud toona, kuwaasoo Daacad u ah tobanaan
Hogaamiye oo aan iyaga laftoodu lahayn aragti iyo ujeedo qudha oo ay
ku midaysanyihiin, balse marka mid ka mid ah la soo weeraro isugu
Habar-wacda Gar iyo Gar-daroba in la difaaco.
Marka la yimaado Boqolaalka Hawl-wadeen ee isugu jira Wariyayaasha,
Farsamo yaqaanada iyo xirfadlayaasha kale ee ku jira shaqaalaha
Wasaaraddan oo ah kuwa aan ku sheegay askarta iyo Madaxda Laamaha
kala duwan ee Wasaaradda oo aan ku tilmaamay Taliye qaybeedyada,
dhawr boqol oo Suxufi oo ka hawl-gala Hay’ada gaarka loo leeyahay ee
Warbaahinta ayaa ah kuwa aan Falaagada hogaamiyeyaasha taabacsan ku
sheegay.
Waxaanan sidaasi u leenahay waa Dad ay ka dhaxayso isku tiirsanaan
aan Naxariis badan iyo is-taakulayn hoose oo dhaqaale, talo-wadaag
Rigli ah iyo is-toosin dhexdooda ahi ka dhaxayn, balse bah-wadaag ku
inay iska wada difaacaan weerar kasta oo ka yimaada cid ka baxsan
Xayndaabka ay ku wada jiraan, siiba dhanka dawlada.
Isu geynta labada tiro ee ay ka koobanyihiin labada dhinac, ayaa
hadii la mideeyo noqonaysa awood aan cidi is-hortaagi Karin oo Af
iyo Aadin aan Dagaal ahayn ku difaaci kara danaha qaranka iyo Dadka
ay adeegayaasha u yihiin, laakiinse wali ma muuqdo qorshe
siyaasadeed iyo Qawniin lagu uruurinayo Xirfadlayaashaasi oo taabo
gal noqon kara, waxaase laga yaabaa inay dhacaan isku dayo aan guul
badan laga gaadhin oo ka yimaada kuwa danayna ka faa’idaysiga Muruqa
iyo Maskaxda dadkaasi.
Ugu yaraan saddex nooc oo ka mid ah hay’ada Warbaahineed ee Caalamka
ka jira, ayaa ah kuwa ilaa hada fursadda u haysta inay dalka ka
hawl-galaan, iyagoo qaarkood haysta sharci u sahlaya shaqada ay
hayaan, lagulana Xistaabtami karo, balse Warbaahinta ONLINE-ka ayaan
ilaa hada loo dejin sharci iyo nidaam saxa oo ay dalka kaga
shaqeeyaan, kaasoo ka difaacaya guluf kasta oo kaga yimaada dhinac
kale.
Waxa jira Boqolaal Website oo Somaliland uga shaqeeya qaab muxali ah
ama waxa afka qalaad lagu yidhaahdo (Local Media), kuwaasoo u baahan
in loo dejiyo Qawniin waafaqsan Dastuurka waddanka iyo Xeerka
Saxaafadda oo lagu maamulo sidaTelefishinada iyo wargeysyada dalka
loogu sameeyay sharciga.
Waxa kale oo jira ismaandhaaf mudo soo jiitamayay oo ka dhex abuuran
guud ahaan qaybta laysku yidhaahdo Saxaafadda iyo Dawlada, kaasoo
salka ku haya Xeerka Saxaafadda oo aanay dawladu la dhacsanayn ilaa
hada qaabka uu u samaysanyahay, damaanada uu siiyay Wariyaha,
daruurina ay tahay in dib u eegis iyo sixid lagu sameeyo oo meesha
laga saaro yooyootanka soo noqnoqday.
Sidaasoo ay tahay, 25 Bishii June waxa madaxweyne Axmed Siilaanyo
Wasaaradda aynu kor ku soo sheegnay u magacaabay Khabiir in badan ku
soo dhex jiray Warbaahinta oo waayo aragnimo ku filan iyo war hayn
door ah u leh xaqiiqada biyo kama dhibcaanka ah ee waayaha bahda
Warfaafinta, kaasoo xilka loo magacaabay aanu lama filaan ku noqon
Kooxda ay isku xirfadda yihiin, balse qaar badan oo ka mid ahi ay
muddo dheer naawilayeen magacaabistiisa, maadaama ka mid ahaa
Warfidiyeenadii Isbedel doonka Kulmiye halganka u soo galay.
Wasiir Cabdilaahi Maxamed Daahir Cukuse oo ah Masuulka Wasaaraddan
loo dhiibay,laguna tilmaami karo wasiirkii ugu nasiibka
badnaa,maadaama uu la wareegay Wasaarad wax badan laga qabtay, ayaa
maalmahan kulamo la yeelanayay qaybaha kala duwan ee Warfidiyeenada
ka hawl-gala warbaahinta madaxbanaan, waxaanu Maanta shirkii ugu
dambeeyay la yeeshay qayb ka mid ah kuwa ka hawl-gala Warbaahinta
ONLINE-ka.
Kulamada uu u furay Bahdii uu ka tirsanaan jiray oo aan ahayn kuwii
ugu horeeyay, hase ahaatee uu markii uu Af-hayeenka madaxtooyada
ahaaba dhici jiray, ayaan dood kooban iyo aragti isdhaafsi mooyaane
wax kale aanay ka soo bixin, inkasta oo sida la sheegay laysku
waafaqay in la sii wado kulamada noocan ah.
Arintan ayaa u muuqata dariiq cusub iyo qorshe hor leh oo uu
Wasiirkani doonayo inuu ku soo kordhiyo xidhiidhka ka dhexeeya
Dawlada iyo bahda Saxaafadda oo aan wanaag badan iyo colaad la
sheegaa ka dhaxayn balse hadana mar walba isku diidan waxyaabo aanay
Sakaaro ka biirsan, taasoo hadii ay dhacdo, kuna guulaysto
baal-dahab ah ka geli doonta taabo gelinta nidaam saxa oo ay
Warbaahintu ku shaqayso, kaasoo ka tayo iyo tamar wanaagsan qaabkay
iminka wax yihiin.
Waxa xaqiiqo ah hadii Wasiirka iyo dhamaan dhinacyada ay arintani
khusaysaa wadiiqo cusub oo ku dhisan turxaan la’aan iyo tuhun la’aan
isla jeexaan inay taasi dayac tirayso baylah badan oo maanta ka
muuqata labada dhanba, taasoo boqolkiiba todobaatan (70%) ka dayacan
Warbaahinta madaxabanaan, isla markaana u baahan inay la garabsadaan
cid kasta oo wax kala qaban karta.
Laakiinse hadii uu yoolkiisu noqdo aynu dhamaaanteen Sacabka u
garaacno xukuumadda talada haysa , waxna lama dhaliili karo, sida ka
dhacda dalalka jaarka la ah Somaliland ee aan u debecsanayn xoriyada
Saxaafadda,ama dhinac kale hadii aynu ka eegno Warbaahintu iska
dhego tirto doodad Cukuse ee aynu meel wax isla dhigno, taasi waxay
ka dhigantahay (ka Dar oo Dibi dhal), Wasiirkuna waxa uu raacaaya
Geel aanu lahayne oo dayacan.
Wariye: Saleban Cabdi cali (Kalshaale)
Curad1986@hotmail.com
|