Gabiley iyo Gu'yaal Tegey
Qaybtii Toddobaad:
Akhristayaasha sharafta leh ee taxanahan ku xidhanow, marka aad
salaanta Islaamka ee qiimaha leh aad guddoontaan kadib; qaybtii
lixaad ee qormadan waxaynu ku soo qaadanay, dhawr su'aalood oo aynu
qaarkood ka soo jawaabney- qaarna qabyo innaga ahaayeen.
Haddaba, inta aynaan gudagelin dulucda qaybtan toddobaad; aynu ka
jawaabno su'aashii innoo hadhsanayd oo ahayd; degaanka iskuulka laga
dhisay iyo sida uu ahaa.
Dixidoo agtiisoo
durduradu agmarayaan
dacalkaa galbeedkana
buuro dayr la moodiyo
Damalladu hadheeyeen
Indhahaa ku dararoo
dareenkaa godlanayee
Timacadde nin daawaday
Dalxiis woogu filan yahay!
Iskuulka Timacadde wuxu ku yaallaa, halkii uu ahaan jirey iskuulkii
caanka ahaa ee loo yaqaaney Qalax.Waxa uu dugsigan oo hooy (boarding
) ahaa magaalada Gabiley u jirey illaa dhawr kiloomitir oo dhinaca
woqooyi ah. Goobta iskuulkan laga dhisay, waa meel dooxa Laagbarako
saarnayd. Dhismuhu wuxu ahaa hal dhisme oo is-haysta ( one compound)
oo ka koobnaa: siddeed fasal (classes), laba shaybaadh, dhawr
xafiis, suuliyo, istoodho iyo wixii la mid ah. Dhismahani wuxu
markii hore lahayn jirey, hal irrid ( albaab) oo weyn oo laga soo
galo - lagana baxo. Waxa uu dhismuhu lahaa barandayaal dhaadheer oo
la maro, beero dhexda ku yaalley oo dusha ka furnaa laguna beeri
jirey ubax iyo hadhuudh, iyo qaybo kale oo badan oo beryihii dambe
lagu kodhiyey!
Haddii aynu si kooban u soo ururinno, degaanka iskuulku ku yaalley
iyo qaabka uu u dhisnaaba; waxay ahaayeen cajiib!!
Hal xilli (semester) kadibna waxa Timacadde soo galay, fasalkii
labaad oo isna taariikhdiisa lahaa. Fasalkan labaad oo iskuulka soo
galay dhammaadkii 1976kii - tiro ahaanna aad u yaraa- wuxu soo
kordhiyey laba taariikhood oo iskuulku yeeshay! Labad taariikhood oo
kala ahaa:
Gabadhii ugu horraysay taariikhda Timacadde gabadh soo gasha oo
kooxdan ka mid ahayd- gabadhaasi oo ahayd: Ifraax C/raxmaan Cumar
Xaashi
Iyo dhacdada kale oo ahayd, ardaygii ugu horreeyey ee iskuulka
Timacadde dheey ( day) ku dhigta oo fasalkaa labaad ka mid ahaa.
Ardaygaasi oo ahaa: C/llaahi Maxamed Cumar!
Waxa iyana xusid mudan, in labadaa fasal (the two first groups) ee
ugu horreeyey oo tiro ahaan aad u koobnaa; deganaan jireen muddo
sanad iyo wax ah, afar fasal oo ka mid ahaa siddeed qol ee uu
iskuulku markii hore ka koobnaa!
Waxana la yaab lahayd oo xusiddeeda mudan, in aannu afar fasalna
seexan jirney; afarta kalana aannu wax ku dhigan jirnay- oo marka
keliya ee aannu dhismaha ka baxnaa ahaan jirtey, marka aannu wax soo
cunayno- markaasi oo aannu tegi jirney madbakhii Qalax oo wax la
noogu Karin jirey!
Inta aynu qaybo kale oo qormadan ah ku kulmi doonno, ammaano Allah
iyo kulanti dambe idam Allah.
Wa bilaahi At-towfiiq
C/llaahi Maxamed Cumar
Email:
timacadde56@hotmail.com
|