Guddoomiyaha KULMIYE
oo ku canaantay dawladda Somaliland iInaanay
Kenya Siin muhiimaddii ay lahayd
Guddoomiyaha xisbiga mucaaridka
ah ee KULMIYE Md. Axmed Maxamed Maxamuud (Siilaanyo) iyo weftigii uu
hoggaaminayay
ee socdaalka ugu maqnaa dalka Kenya, ayaa shalay dalka dib ugu soo
laabtay, waxaana madaarka Egal International Airport ee magaalada
Hargeysa loogu soo dhaweeyay si ballaadhan.
Guddoomiyaha KULMIYE oo ay soo dhaweyntiisa ka qeybqaateen boqolaal
ka mid ah taageereyaasha xisbigiisa oo watay gaadiid aad u fara
badan, waxana madaxda soo dhaweysay ka mid ahaa
Guddoomiye-ku-xigeenmadiisa, Xogahayaha Guud ee KULMIYE,
Guddoomiye-ku-xigeenka labaad ee Golaha Wakiillada iyo xildhibaanno
aad u tiro badan oo ka mid ah mudanayaasha Golaha Wakiillada kaga
jira KULMIYE.
Md. Axmed-Siilaanyo oo qolka nashashada ee madaarka ugu warramayey
saxaafadda ayaa ka warbixiyay natiijadii socdaalkiisa, waxaanu yidhi;
“Farxad weyn ayay ii tahay inaan maanta halkan dalkaygii ku soo
noqdo, muddo ayaa safar ugu maqnaa dalka Kenya magaalada Nairobi,
halkaas oo aan anniga, Cabdiraxmaan Cabdiqaadir [Guddoomiye-ku-xigeenka
labaad ee KULMIYE] iyo xaaskaygu booqasho shakhsi ah u tagnay,
annaga oo halkaas naloogu soo dhaweeyay si aad iyo aad nooga
farxisay. Qiimo iyo qadarin aanaan marna gudin karin naloogu soo
dhaweeyay. Halkaas waxaan ugu tagnay marka ugu horeysa dadweyne aad
iyo aad u fara badan oo reer Somaliland ka soo jeeda oo reer Kenya
ah oo danneeya oo qalbiga aad ugu haya Somaliland iyo aayaheeda oo
jecel in wax u qabsoomaan oo wax u hagaagaan."
Waxa kale oo aad ugu hambalyeeyay jaaliyadda Somaliland ee dalka
Kenya sidii ay u soo dhaweeyeen weftigiisa, waxaanu yidhi; "Dadkaas
waxaanu aad iyo aad u bogaadinaynaa sharafta iyo qiimaha ay nagu soo
dhaweeyeen."
Md Siilaanyo oo ka warramayey masuuliyiintii uu kula kulmay dalka
Kenya waxa uu yidhi; "Waxa kale oo muddadii aanu dalkaa Kenya
joognay aanu kula kulanay masuuliyiin fara badan oo ka tirsan dalkaa
oo uu Madaxweyne-ku-xigeenku uu ugu horeeyo oo Wasiirro leh iyo
masuuliyiin kale ayaanu la kulanay.
Waxa kale oo aannu la kulanay safaarado ka mid yihiin Safaaradda
Maraykanka, waxaanu la kulanay ninka Dhiinka u ah safaaradaha EU-da
,ahna safiirka Yuslafaakiya ah, waxa kale oo la kulanay safaaradaha
afrikaanka qaar ka mid ah sida safiirka Ruwanda oo kale. Waxaanu la
kulanay Qaramada Midoobay ninka wakiilka ka ah Xoghayaha Guud. Waxa
kale oo aanu la kulanay deeq bixiyeyaasha maamula doorashooyinkeena,
hay’adaha ka shaqeeya sida IRI oo kale oo aanu kala hadalnay wixii
khusaynayay hawlaheena la xidhiidha geeddi-socodka dimuqraadiyadeena."
"Iska dhaaf marka laga yimaado dadweynaha aadka u xiisaynaya ee
arrimaha Somaliland oo caadifad wanaagsana u haya, dunidu diyaar
ayay u tahay ama u xiisaynaysaa aayaha Somaliland waxay ku sugan
tahay qiimo weyna u leh xasiloonida iyo degenaanshaha ay ku sugan
tahay, waxay aad u xiisaynayaan doorashooyinka soo socda iyo
mustaqbalka aynu leenahay intaba, "ayuu raaciyay Guddoomiyaha
KULMIYE.
Md. Siilaanyo waxa kale oo uu sheegay in aanay xukuumadda Somaliland
muhiimaddii Kenya lahayd siin, isagoo arrintaas ka hadlayeyna waxa
uu yidhi; "Waxaanu aad ula yaabnay oo runtii markaanu Kenya tagnay
dareenkeedu aad noogu xooggaystay ahmiyadda Kenya leedahay ama
xarakada Afrika oo dhan ka socota ha noqoto nabadeyntii Somaaliya,
ta Geeska Afrika iyo Afrikaba doorka ay ka ciyaarto dawladooda iyo
madaxdoodu, arrimaha Soomaaliya iyo mandaqadda oo halkaas door
laxaad leh ku leh xiisaha la innoogu qabo iyo sida ahmiyaddii ay
lahayd oo haddaynu Somaliland nahay aynaa siin dalka Kenya, innagoo
intaas oo dhan u dagaalamaynay inaynu ictiraaf helno oo Afrika ina
qiimayso oo dalalka mandaqaddu ina qiimeeyaan. Warka laga hayaa
dalkeenna iyo siyaasadihiisa markaad eegto runtii aad buu u yar
yahay, markaa annagu waxaannu la soo noqonay kollay iyo kollayba
dareenkaa fiican oo keliya maahee ahmiyadda ay leedahay inaan halkaa
ka muuqano. Waxaan xsuustaa mar dalka laftiisa doodo ka dhici jireen
oo la odhan jiray in sida Nairobi oo kale xafiisyo ka furano, waynu
leenahay nin danaheena ilaasha oo safaarad ku magacaaban, xafiis ma
leh, wax uu ku shaqeeyo ma leh cid ka war qabtaana ma jirto."
"Waxyaabaha aannu la kulanay waxa ugu yaabka badnaa markaannu
Madaxweyne-ku-xigeenka Kenya la joognay, in xataa dawladda Kenya
aanay ka war-qabin oo Wasiir Khaarjiyaheena weli u haystaan Edna
tahay. Markaa annagu waxaannu isweydiinaynay qolyahan maalin walba
innaga taga ee sii socda ee soo socda miyayna hudheelladaba dhaafin
ayaan isidhi, waayo halkaas cid ka taqaanna maanu arag," ayuu yidhi
Md. Axmed Siilaanyo.
Guddoomiyaha KULMIYE wuxuu mar kale ammaan ballaadhan u jeediyay
dhallinyarada, ragga, haweenka jaaliyadda Somaliland ee dalka Kenya
oo uu xusay in weftigiisa si weyn oo niyad-sami leh u soo dhaweeyeen.
"Waxa kale oo aan halkan jecelahay inaan mahadnaq ballaadhan oo kal
iyo laab ah uga soo jeedino jaaliyadda Somaliland ee Kenya ,
ballanna waanu u soo qaadnay inaynu dedaal geli doono oo aynaan
Kenya iminka iyo mustaqbalkaba oo meeshaasi ka maarmin oo aynu ka
muuqano."
Intaaska dib weriyeyaasha shirkaa jaraa'id ka qeybgalay waxa ay
guddoomiyaha xisbiga KULMIYE weydiiyeen su'aalo dhinacyo kala duwan
taabanaya, su’aalahaas iyo jawaabihii Axmed-Siilaanyo ka bixiyeyna
waxay u dhaceen sidan:
Su’aal: Guddoomiye, dhawaan waxa shabakadaha internet-ka ee laga
xukumo madaxtooyada lagu faafiyay warar sheegaya inaad la kulantay
Ra’iisal-wasaaraha Soomaaliya oo aad ka dalbatay inaad
Ra’iisal-wasaare u noqoto Soomaaliya, arrimahaa maxaa ka jira?
Jawaab: Waxay muujinaysaa xilkasnimo darrada ay dawladu leedahay
ayay muujinaysaa, wax ka jiri kara iyo wax ka jiraa midna ma jiro,
waxaasi waa ishaacad, hadii ay jirto annigu ma maqal oo ma ogiye,
waa wax aan waxba ka jirin oo iska diciif ah. Oo muujinaya inaanay
wax ay ka warqabaan iyo wax ay la socdaan toona jirin.
S: Waxaad sheegtay in dawladda Kenya ay weli u haystaan in Marwo
Edna Aadan ay tahay wasiirka Arrimaha dibedda, waxaana jiray in
wefti Madaxweynaha iyo wasiiro ahaa ay hore u tageen, arrintaas
sidaa loo rumaysan karaa?
J: Annagu waxaanu idiin sheegnay wixii aanu aragnay intii idinka
maqnayn, waxaanuna ka maqalay Madaxweyne-ku-xigeenka Kenya afkiisa.
S: Diblamaasiyiintii aad la kulanteen maxay idiinka ballanqaadeen?
J: Ballanqaadka waxyaabaha aanu ka codsanaynay ee ugu waaweynaa
waxaa ka mid ah, markaanu arrimaha qaranka iyo marxaladaha jira kala
hadalno, waxaanu kala hadlanay in culayska nalala saaro horumarinta
dalka iyo geeddi-socodka dimuqraadiyadda.
Waa tii Qaramada Midoobay qiimayntii ay soo saartay kaalinta afraad
la innagala dhigay, taas aad iyo aad ayaan ugala hadalnay in
maadaama wakhtigii doorashooyinku soo dhaw yihiin in loo baahan
yahay joogitaanka goob joogeyaasha caalamiga ah, kollayba waxay
balan naga qaadeen in arrintaasi aanay wax saamayn ah ku yeelan
doonin, runtiina ad iyo aad ayay u xiisaynayeen doorashooyinka soo
socda.
S: Maxaad Raila Odinga ka wada hadasheen?
J: Ayaan-darro Raila Odinga Ra’iisal-wasaaraha Kenya lamaanu kulmin,
waa la ii sheegay in warkaasi soo baxay, dedaalkii iyo niyaddii
aannu u haynay inaanu la kulano, balse arrintaasi farsamo ahaan ayey
u suurtogeli weyday ee waxaanu isaragnay Madaxweyne-ku-xigeenka.
TogdheerNews
|