Guddoomiyaha Maxkamadda Sare oo sheegay in Qaranku ku dhismayo
sharciga oo la isku xakmeeyo
Guddoomiyaha Maxkamada sare ee Somaliland Yuusuf Ismaaciil Cali ayaa
sheegay in qaranku ku..........
Hargeysa (TNN) - Guddoomiyaha Maxkamada sare ee Somaliland Yuusuf
Ismaaciil Cali ayaa sheegay in qaranku ku dhismayo sharciga oo la
isku xukumo iyo in sharciga loo fahmo inuu yahay ka ugu sareeya.
Yuusuf Ismaaciil Cali, waxa uu tallooyin u jeediyay ciidamada
booliska iyo xafiiska xeer ilaalinta qaranka, waxaanu u soo jeediyay
in marka ay qof muwaadin ah dambi ku soo oogayaan ama ay soo
xidhayaan maraan dariiqa sharcigu ogol yahay, balse aanay si jacbur
ah awood ugu addeegsadaan.
Guddoomiyaha Maxkamada sare oo maanta ka hadlayey shir ka furmay
Magaaladda Hargeysa, ayaa sidoo kale sheegay in xeerka ciqaabta guud
uu qabanayo qof kasta, isla-markaana aanu xitaa ka baxnayn
Madaxwaynuhu.
Yuusuf Ismaaciil Cali, waxa uu ciidamada booliska ugu baaqay inay
waaran u qaataan soo qabashada wariyayaasha haddii kiis ka gallo,
isaga oo xusay in sharafta saxaafadu dhowran tahay.
Yuusuf Ismaaciil Cali, oo arimahaa ka hadlayaana waxa uu yidhi
“Waxaan leeyahay qarankeenu waxa uu ku dhismayaa sharciga oo la isku
xukumo, sharciga oo aynu ogolaano in sharcigu noqdo ka ugu sareeya
ee aynu ka wada dambayno, xeer ilaaliyow ha dhibsanin haddii lagu
yidhaahdo kiiska aad soo oogtay cadayntani kuma fila ee cadayn kale
keen, haddii aanad hayna la noqo, ha u qaadan in adiga lagu caayey
ama xafiiskaaga wax laga sheegay, u qaado caddaaladii oo laguu
tilmaamay oo ku qanac”
Guddoomiyaha oo la hadlaya booliska ayaa yidhi “Boolisow marka lagu
yidhaahdo maxaad qofkan u soo qabatay markaad xaakinka hor-keento,
haddii aanad waxba ka qorin dhib-banaha ama isagu (dhibbana) aanu
sheegayn maaha in xabsiga lagula ordo”
Yuusuf Ismaaciil Cali, waxa uu tallo u jeediyay xeer ilaaliyaasha
qaranka “Xaakimow adiguna ha is odhanin awoodbaad leedahee waxaad
doonto samee, marka Waaran qabasho ah lagaa soo dalbado u soo saar
haddii ay dhamaystiran yihiin shuruudihii waaranka lagu soo
saarayey”ayuu yidhi waxaanu intaa ku daray “Qof aan dambi galin ma
jiree qolada Wariyayaasha xuquuqdoodu way dhowrsan tahay, maaha in
cid walba xabsiga intay gasho ay maxbuus xukuman ay iska sawiran
karto oo ay ka warami karto maaha, qofku inkasta oo uu dambi galay
ILAAHAYBAA ina yidhi sharafta ilaaliya oo ku tunta la inama odhanin,
qofku haddii uu dambi gallo intiisa yaan loo dhaafin, ILAAHAY ma
jecla kuwo xad-gudba”ayuu yidhi waxaanu intaa ku daray “Xeerka
ciqaabta guud, qof walba wuu qabanayaa, Madaxwaynuhu kama baxsanayo,
qolada saxaafada waxaan leeyahay xeerkiinu wuxuu nidaaminayaa
shaqadiina ee ku dhaqma, aniguna idiinma damaanaq qaadayo inaan
qalinka dambi lagu galin, waxaanan jecelahay saxaafadeenu door wayn
bay leeyihiin ay doorkooda gartaan, in lagu tacadiyana ma jecli, in
xeerkooda la ixtiraamo ayaan jecelahay, waxaanan ka murugoodaa
boolisbaa galay qolkoodii xafiiska u ahaa iyaggoo bilaa waaran ah,
nimankani qalinbay wax ku qoraan oo ma qarxaan oo wax qarxa meesha
ma soo dhigtaane bilaahi Caleek markaad xafiisyadooda galaysaan
maxkamadaha ka codsada inaad gashaan (Waaran soo qaata)”
Timacade News Desk
Hargeysa,Somaliland
|