Guddoomiyaha Xisbiga
KULMIYE oo Safar ugu Baxay Kenya, Itoobiya iyo
Jabuuti
Gudoomiyaha Xisbiga KULMIYE iyo
wefti ballaadhan oo uu hogaaminayo ayaa maanta dalka ka ambabaxay,
isaga oo u sii jeeda weftigu magaalada Nayroobi ee xarunta dalka
Kenya.
Guddoomiyaha iyo weftigiisu intii aanay dalka ka dhoofin ayaa
warbaahinta qaar ka mid ah uga waramay ujeedada socdaalkooda.
Waxaanu Guddoomiyaha Xisbiga KULMIYE Mudane Axmed Maxamed Maxamuud (Siilaanyo),
in ay dalka Kenya u tagayaan martiqaad rasmi ah oo ay ka heleen
jaaliyadda reer Somaliland ee degan dalka Kenya.
Muddada uu weftigu ku sugan yahay dalka Kenya, waxa ay kulamo la
yeelan doonaan Jaaliyadda reer Somaliland iyo Madaxda dawladda Kenya
qaar ka mid ah, kuwaasi oo ay kala hadli doonaan arrimo la xidhiidha
qadiyadda Somaliland.
Guddoomiye Axmed Siilaanyo waxa kale oo uu sheegay in isaga iyo
weftigiisaba ay kalsooni buuxda ku qabaan Guddida Komishanka
Doorashooyinka Qaranka, oo uu ku tilmaamay in ay hawl culus u hayaan,
loona baahan yahay in laga dhawro wax kasta oo dibindaabyo u
gaysanaya iyaga iyo hawsha ay u xilsaaran yihiinba, mudantahayna in
lala shaqeeyo.
Guddoomiyaha xisbiga KULMIYE waxa uu si kulul u cambaareeyay xadhiga
wasiir ku xigeenkii hore ee wasaaradda hawlaha guud Cabdirashiid
Ducaale Qambi oo dhawaan isaga iyo rag kale oo ka soo jeeda
deegaanka Buuhoodle, ay xukuumaddu xabsiga u taxaabtay, kuwaasi oo
uu guddoomiyuhu xadhigooda ku tilmaamay mid xaaraan ah oo
sharciga’aan waafaqsanayn. Isla markaana waxa uu xukuumadda
Somaliland ugu baaqay in sida ugu dhakhsaha badan loogu soo celiyo
xoriyadoodii.
Weftiga xisbiga KULMIYE ayaa la filayaa in marka booqashada dalka
Kenya u soo dhamaato ay uga gudbi doonaan dalalka Itoobiya iyo
Jabuuti, oo iyagana sida la sheegay lagu marti qaaday weftiga.
Dhinaca kale, xubno ka tirsan golaha Wasiiradda xukuumadda Riyaale
ayaa maanta dalka ka ambabaxay dhinaca dalka Jabuuti, sida warar
xogogaal ahi sheegayaana aan wax marti qaad ah ka helin dawladda
Jabuuti, balse socdaalka Wasiiradani uu daba socdo weftiga xisbiga
KULMIYE oo xukuumaddu baqdin wayn ka qabto casuumadaha uu ka helay
dalalka Jabuuti, Itoobiya iyo Kenya.
Togdheernews
|