Guurtida
oo bulshada reer Somaliland ugu baaqday in ay
is diwaangaliyaan, si ay u qaataan waraaqaha jinsiyada
“
Kaadhka jinsiyadda oo ah sugidda muwaadimadu waxa uu yahay fursad
waqtigan taagan oo lagu helayo maanta lacag la’aan
” Bayaanka Guurtida
Golaha Guurtida Somaliland ayaa bulshada reer Somaliland ugu baaqay
in ay si buuxda uga qayb-qaataan Hawlaha isbarkan ee diwaangalinta
codbixiyayaasha iyo qaadashada waraaqaha aqoonsiga ee lagu sugayo
muwaadinimada dadka reer Somaliland.
Sidaana waxay guurtidu ku sheegtay shir-jaraaid oo ay
gudoomiye-ku-xigeenka Sheekh Axmed Sheekh Nuux Fure, gudoomiyaha
gudida joogtada ah ee guurtida Xaaji Cabdikariin Xuseen (Cabdi-Waraabe)
iyo mudanayaal kale oo ka tirsan guurtidu ku shalay ku qabteen
xarunta golaha.
Xoghayaha guud ee golaha guurida ayaa halkaa ka akhriyey bayaan
qoraal ah oo ay kaga hadlayaan diwaanfalinta iyo muhiimada ay
qaranka Somaliland ugu fadhido, bayaankaas oo faahfaahsana waxa uu u
dhignaa sidan; “Sida aynu la wada socono amaba aynu ka warqabnaba
dalka Jamhuuriyadda Somaliland waxa uu soo maray maraxalado kala
duwan oo bar-tilmaameed ku ahaa xaqiijinta iyo meel-marinta
himiladda iyo doonista shacbiga reer Somaliland, kuwaas oo ay ka mid
ahaayeen maraxilkii nabaddaynta, unkidii qarannimada Somaliland, la-soo-noqoshadii
madaxbannaanida, shirweynayaashii nabadeynta iyo dib-u-heshiisiintii
shirweynaha beelaha reer Somaliland ee lagu dhisayey xukuumadihii
kala dambeeyey, aftidii dastuurka Jamhuuriyadda Somaliland,
doorashooyinkii Dawladaha Hoose, madaxtooyada iyo Golaha Wakiillada.
Maraxaailkaas kala duwana waxay lahaayeen waayohooga iyo
aragtiyahooga kala duwan, mar walibana waxay jiray kooxo iyo ashkaas
ka soo horjeeda meel-marinta rabitaanka iyo doonista shacbiga,
kuwaas oo aan maslaxada guud dani ugu jirin, dadweynahana u
sheegayey macuuumaad ka fog xaqaa’iq iyo danta dalka iyo dadweynaha,
waxase mar waliba ka gacan sarreynayey dadweynaha u heegaanka ah
maslaxadooda oo is kaashanayey yar iyo weynba.
Walaalayaal, maanta waxan gudagelaynaa oo dalka ka bilaabmaya haddii
alla yidhaa maalinta Salaasada ee ay bishu tahay 14/10/2008 marxalad
cusub oo ah is diiwaangelin, taas oo looga dan leeyahay in
muwaadininta lagu siiyo laba aqooni oo kala ah kaadhka cod bixinta
ee muwaadiniinta ku dhiibanayaan codadkooda doorashooyinka ee
innaguu soo fool leh haddii Alla yidhaa iyo kaadhka muwaadinimo ee
jinsiyadda.
Kaadhka jinsiyadda oo ah sugidda muwaadimadu waxa uu yahay fursad
waqtigan taagan oo lagu helayo maanta lacag la’aan. Dhinaca kale,
kaadhka codaynta qofkii qaataa ayuunbaa labaddani doorasho ee soo
socda codkiisa dhiiban kara.
Waa hubaal in cadow gudo iyo dibedba uu arrintan ka soo horjeedo,
cadowga dibeddu wuxuu adeegsanayaa kan gudaha, kuwas oo been-abuur
iyo ujeeddooyin ay ku xagal-daacinayaan barnaamijkan ku hawlan qawl
iyo ficilba. Waa jiraan kooxo horreba uga soo horjeeday aftidii
dastuurka, doorashooyinka inoo qabsoomay, sidoo kalena tani maantana
ka soo horjeeda, ujeeddooyinkooduna ay yihiin wax ka duwan danaha,
maslaxadda, goonni-isu-taagga iyo madaxbannaanida shacbiga reer
Somaliland, waxayna leeyihiin ajande qarsoon iyo istaraatajiyooyin
ka soo horjeeda danaha dalka, taabo-gelka iyo horumarka mujtamacani,
isla markaana waxay u adeegsayaan xooggag shisheeye.
Ugu dambeyntii, innaa oo rajaynayna in Illaahay innagu gacan siin
doono barnaamijkan sidii uu awalba kuwii ka horreeyey innooga
suurtagaliyey haddii Alla yidhaa, waxaynu sugnaba waa innagoo yar
iyo weynba u dareerna, meelna uga soo wada jeedsana suurtagalinta
barnaamijkan. Madax-dhaqameedyada iyo hoggaamiyeyaasha bulshada,
waxgaradka ummadda qaybahooda kala duwan, waxa looga fadhiyaa inay
hubiyaan oo ay ka hawlgalaan sidii qof kasta oo qaan-gaadh ahi u
tagi lahaa goobaha diiwaangelinta, iskuna diiwaangelin lahaa.
Sida oo kale, Komishanka iyo hawlwadeennadooda ku hawlan
meel-marinta barnaamijkan, waxa lagu sugayaa farsamo kasta oo
dadweynuhu ay ku heli karayaan is diiwaangelinta, dhinaca
inkaaniyaadka iyo waqtigaba, iyaga oo ka taxadiraya in hawshu socod
la’aan iyo degdegsiimo la’aan buuq uga dhasho goobaha is
diiwaangelinta.
Gebogebadii, waxan inoo rajaynaynaa dhammaanteenba guul iyo horumar
haddii Alla yidhaa iyo innaga oo Illaahay ina gaadhsiiyo himiladeena
iyo rabitaankeena.”
Jamhuuriya Online
|