HADDI ANAY XUKUMADU
FARAGALINTA KA DAYNIN KOMISHANKA DORASHA DALKU
XAALAD HALISA AYUU GALI DOONAA
Mujaahid Ibraahin C/laahi Xuseen
(Dhegaweyne) ayaa ku eedeeyay xukuumadda Riyaale faragelinta ay ku
hayso komishanka doorashooyinka qaranka inay keeni karto xaalad
nabadgelyo daro isagoo intaa ku daray in khilaafkii xisbiga Kulmiye
shirweynihiisii ku dhex maray garabkooda ay weli sidii u kal maqan
yihiin kuna baaqay in xaalada diiwaangelinta iyo doorashooyinka wada
tashi qaran laga yeesho sidii doorashooyin xalaal ah oo xor ah ay
dalka uga dhici lahaayeen.
Mujaahid Ibraahim Dhagaweyne waxa uu sidaas ku sheegay mar aanu
xalay khadka tilifoonka kula xidhiidhnay waxna ka weydiinay xaalada
guud ee dalku wakhtigan xaadirka ah marayo iyo arrimo kale oo la
xidhiidha diiwaangelinta iyo doorashooyinka madaxtooyada ee dalka ku
soo fool leh 29 March 2009.
Mujaahid Dhegaweyne mar aanu weydiinay siduu u arko xaaladda
siyaasadeed ee dalku marayo waxa uu yidhi “runtii xaalada uu dalku
marayaa waa mid ciir ciira oo u baahan in wada tashi laga yeesho
marxalada uu haatan marayo, kuwaasoo hadaan wada tashi laga yeelan
inagu keeni kara xaalad halisa, tusaale ahaan komishanka
doorashooyinka oo u muuqda xubno jilicsan oo ay xukuumaddu fara
gelin ku hayso waxayna keeni kartaa hadii aanay xukuumaddu faraha
kala bixin xaalad nabadgelyo daro.
S: Sideed u aragtaa hawsha diiwaangelinta codbixiyayaasha ee dalka
ka socota?
J: Runtii qaabka ay komishanka doorashooyinku u wadaan
diiwaangelinta waxa ka muuqda dhaliilo farabadan marka loo eego
dadka dhowrka jeer kaadhadhka qaatay oo la sheegayo in qaar kamida
dadkaasi ay qaateen aqoonsiga muwaadinimada iyo kaadhka codbixinta
markaa waxay ku xidhan tahay habka ay komishanku u saxaan tirada
guud ee dadka Somaliland ee is diiwaangeliyay.
S: Waxaad sheegtay in dalku u baahan yahay wada tashi laga yeesho
xaalada la marayo maadaama doorashooyinkii Madaxtooyada loogu
tartami doono saddex xisbi diiwaangelintuna gabo gabo ay tahay maxaa
keenay wada tashi hala isugu yimaado?
J: Marka la eego muddadii doorashada madaxtooyada loo cayimay inay
qabsoontaa way soo dhowdahay faragelinta xukuumaddana waad aragtaa
sidaa darteed hadaan laga wada tashan habkii ay doorasho xalaal ahi
dalka uga dhici lahayd ma iman karto doorasho si xalaala u dhacdaa.
S: Waxa la sheegay in garabkiinii xisbiga Kulmiye ee ka biyo diiday
qaabkii shirweynihii Kulmiye u dhacay aydun xisbiga UCID wada hadalo
la sameyseen oo la sheegayo in dhowaan aad ku biiri doontaan?
J: Arrinkaa wada hadalku weli ma bilaabmin laakiinse arrinku maaha
magac magac ku bedel balse waa in dastuurka iyo caddaalada wax ka
bedel lagu sameeyo, anaguna magac magac ku bedeli mayno xisbiga
Kulmiyena waxaanu ka doonaynay inuu xal keeno balse xalkii wuu
diiday lagu wada joogi lahaa, sidii-baanuna u kala maqanahay xisbiga
Kulmiye, dad door ahina way iskaga tageen mabda’ayaguna maaha magac
magac ku bedel ee waa sidii isbedel siyaasadeed oo caddaalad ahi uga
hirgeli lahaa dalka iyo xisbiyada gudahooda.
Togaherer
|