Interpeace
Oo Axsaabta U Sheegtay In 1,200,00O Qof Kasoo
Baxeen Natijada Serverka Ee
Diwaangalinta
Hargeysa (Longlivesomaliland
News)-Hay’adda Interpeace ayaa la sheegay in ay Axsaabta Siyaasadda
u sheegtay tiro aan rasmi ahayn, isla markaana aan ahayn midda
hordhaca ah ee la filayo in ay u gudbiso ee natiijada Diiwaangelinta
Cod-bixiyayaasha.Taas oo ay ka biyo-diideen Axsaabtu.
Waxaanay maanta saddexda Xisbi Siyaasi iyo Hay’adda Interpeace isugu
imanayaan kulan la xidhiidha arrimahaas.
Inkasta oo aanu jirin War rasmi ah oo dhinacyada arrintani khusaysaa
ay ka soo saareen arrintan, haddana siday Wargeyska Ogaal u sheegeen
ilo xogogaal ahi, hay’adda Interpeace waxay Axsaabta u sheegtay in
1,200,000 (Hal Milyan iyo laba boqol oo qof) ka soo baxeen natiijada
Server-ka ee Diiwaangelinta Codbixiyeyaasha, balse siday Wararkani
sheegayaan maha tiradii hordhaca ahayd ee laga sugayay.
Hase yeeshee, waxay tiradan ku sheegeen in ay tahay tirade ay hadda
hayaan. Warku wuxuu intaa ku daray, in saddexda xisbi kulankooda
maanta si wadajir ah ugaga arrinsan doonaan soo-jeedin ka timi
Khubarada ajaanibka ah ee gacanta ku haysa Serverka, kuwaasoo ku
taliyay in loo baahan yahay adeeg kale oo aan hadda gacanta ugu
jirin, kaasoo ay sheegeen in aan looga maarmayn wanaajinta iyo
kala-hufid dhamaystiran oo lagu sameeyo dadka isdiiwaangeliyay.
Siday ilo-wareedyadaasi tibaaxeen, Interpeace waxay sheegtay in
keenista qalabka Khubaradu sheegeen in loo baahan yahay ay muddo
todobaadyo ah qaadanayso.
Hase yeeshee, xisbiyada ayaa sida la sheegay ka biyo-diiday
soo-jeedintaas oo ay ku tilmaameen in aanay waafaqsanayn Xeerka
Anshaxa Doorashada Madaxtooyada oo ay dhowaan wada saxeexdeen
xisbiyada iyo Komishanka Doorashooyinka Qaranku.
“Heshiiskaa aanu wada saxeexnay waxa ku jiray in aanu aqbalo
natiijada ka soo baxda Serverka, laguna soo saaro 27 July. Markaa,
meesha ma taalo in haddana la yidhaahdo, adeeg kale ayaa loo
baahanyahay, in natiijadu xilligaa la wada saxeexay ka dib dhacdana
ma aqbalayno….Kollay beri (maanta) ayaanu ka kulmaynaa.” Sidaa waxa
yidhi xubin sare oo ka tirsan Xisbiyada Mucaaradka.
Waxaana la filayaa in saddexda Xisbi si wada-jir ah go’aan uga
gaadhaan waxay ka yeelayaan soo-jeedimahan Interpeace.
Mar Wargeyska Ogaal isku dayay in uu faahfaahin ka helo tirada la
sheegay in Hay’adda Interpeace u sheegtay Axsaabta iyo waliba halkay
marayso hawsha natiijada Diiwaangelintu oo aanu Khadka Telefoonka
kula xidhiidhnay Madax-hoosaadka Barnaamijka Dimuqraadiyadaynta
Somaliland Mr. Robin Zamora, wuu ka gaabsaday in uu ka jawaabo
arrintaa. ‘Runtii imika waxba idiinkama sheegi karo, balse wixii
faahfaahin ah waanu soo saari doonaa.” Ayuu yidhi Mr. Zamora.
Dhinaca kale, Masuuliyiinta Komishanka Doorashooyinka arrimahan u
qaabilsan oo aanu Khadka Telefoonka kula xidhiidhnay si aanu
dhinacooda wax uga waydiino, ayaanay noo suurtogelin.
Geesta kale, xubnaha Guddiga Doorashooyinka iyo masuuliyiinta
hay’adda Interpeace ayaa sidoo kale shalay kulan ku yeeshay xarunta
Komishanka. Ma jiro wax war ah oo ay ka soo saareen kulankooda, hase
yeeshee waxa la sheegay inay kaga wada hadleen arrinta
Diiwaangelinta oo 16.07.09 loo balansanaa in Interpeace Xisbiyada ku
wareejiso natiijada hordhaca ah ee ka soo baxday Mishiinka kala
shaandhaynaya.
Hay’adda Interpeace oo wakiil ka ah Qaadhaan-bixiyeyaasha Caalamiga
ah ee Doorashada Madaxtooyada Somaliland, waxay hore xisbiyada
siyaasadda ugu wargelisay inay natiijada hordhaca ah ee
Diiwaangelinta ku soo saari doonto 16-kii bishan, isla markaana ay
natiijada kama-dambaysta ah ku dhawaaqi doonto 27-ka bishan July oo
maalmo koobani inaga xigaan.
Hase ahaatee, siday iftiimiyeen qaar ka mid ah Hoggaanka Axsaabta
Siyaasaddu, haddiiba aan waqtigii ballanku ahaa la soo saarin
natiijada Diiwaangelinta Cod-bixiyayaasha, waxa iman kara shaki ku
gedaaman arrimahan.
Source: Ogaal
|