Ictiraafka Sheffield (UK) Ee J.Somaliland: Allahayoow Noqdaa
''Domino Effect.
- Warka barkhadeed ee ka soo faafay magaalada Sheffield (UK) maanta
03/04/2014, ee ku saabsan Ictiraafka J.Somaliland, waxa uu qof kasta
oo reer Somaliland ah ku beeray dareen aad u gashi san oo bog-diirani
ku nudan tahay! Waxa uu Ictiraafka Shieffield qadiyada Jamhuuriyadda
Somaliland uga dhigan yahay, sida Foore roob oo soo dhacay Jeer ama
Xili ay dadka iyo duunyaduba ka soo doogeen Gu' xumaaday kuna jiraan
Jiilaal dheeraaday oo lagu riiqday! Tabtaasi oo kale ayay Yuhuun leh
eemamo-sami idaylkeena inoo saaqday.
Jamhuuriyadda Somaliland, waxa ay intii ay jirtayba buuxisay shuruud
kasta oo lagu xidhI karo Qaran samaysankiisa iyo jiritaankiisaba.
Xxujooyinka qaran-nimada looga baahan yahay waxa ka mid ah; ''Dhul
la yaqaan oo cayiman, dad degan dhulkaas iyo -maamul ku fidsan dalka
oo raali laga yahay aduunyadana la macaamili kara''! Judhiiba inagu
intaa gacantaan ku haynay! Wax Allah waxa kale ee badan ee Togan ee
camuudaas ka badan ee ay dadka J.Somaliland ku nooli samaysteen waa
raxe iyo siyaado. Hadaba, hadii aynu shuruudihii buuxinay maxaa la
inoo Ictiaafi waayay ayaan had iyo jeer is-waydiinaa?
Qadarka Allah waa iska halkiisa hase-yeeshee aniga sida ay ila tahay,
ma muuqato jawaab cad oo la heli karo oo la odhan karo sababtaasaa
hor-taagan Aqoonsiga J.Somaliland ay sida dhabta ah u kasbatay!
Dadkeena ku xeel-dheer Shuruucda aduunyaduse waxa ay ku sheegaan in
carqaladda dib u riday ilaa haatan ictiraafkeenu ay tahay uun arimo
ku qotomo Siyaasad, ee aanay haba-yaraatee wax-sharciyad ah salka ku
hayn.
Waxa ay doontba ha daarnaato arintuye haatan, waxa ay u muuqdaan
mala-awaaladaa dushu qaar gabi ahaanba meesha ka baxay, waayo? wax
wayn baa maanta is-bedelay! Oo, markii ugu horaysay intii ay jirtay
J.Somaliland ee cusubi (18/05/1991), ayaa ay heshay cid aqoonsato.
Arintaa mahadeeda waxa leh oo ka badheedhay Xildhibaano la soo
doortay oo sharci ku fadhiya kuraasida ( Sheffield/UK)! Waa guul iyo
gumaro aad u qaro wayn oo aan la dhayalsan karin oo inoo soo hoyatay.
Waxana aan rajaynaynaa inay abuurto xaalad ah, ''Domino Effect/Buukooy
buuko wareen'' oo Caalamka intiisa kalena saamayn ku yeelata ay
degdeg ugu soo haneeyaan ictiraafka Jamhuuriyadda Somaliland.
Gabo-gabada; Waxa mudan in la bogaadiyo cid kasta oo ka soo
shaqaysay arintan, waxana loo baahan yahay in dadka kale ee reer
Somaliland gaar ahaan kuweena dibadaha joogaa, aan cashar halkan ka
barano, oo aan xidhiidho badan oo dardar cusub wata la samayno dadka
saamaynta ku leh dawladaha aduunyada! Waxan hubaa inaynu arki doono
Golayaal, Dawlado... oo ku soo biira Xildhibaanada Sheffield, hadii
si dhab ah loo hawl galo.
[La soco oo hada aqoonsiga buuxaa; ''waaba intaasoo loo gala sii yar
dhawaado uun!]
... Ha jirto Somaliland oo Ha Joogto Waligeed...
Cali Cumar Xasan
|