KULMIYE oo ku Baaqay in
Baadhis Rasmi ah Lagu Sameeyo Hawlgal Ciidamo Hubaysan ku Galeen
Gudaha Xarunta Dhexe ee Xisbigooda
Xisbiga mucaaradka ah ee KULMIYE,
ayaa ku baaqay in baadhis buuxda oo degdeg ah lagu sameeyo hawlgal
ciidammo boolis ah oo hubaysan ah Sabtidii 14 February 2009 ku
galeen gudaha xarunta xisbiga ee magaalada Hargeysa.
Sidaana waxa lagu sheegay qoraal uu Afhayeenka KULMIYE Mr. Maxamed
Kaahin Axmed shalay u kala diray Komishanka Doorashooyinka, Guddiga
Anshaxa iyo Dabagalka Doorashada, Guddi-hoosaadka Arrimaha Gudaha
iyo Nabadgelyada Golaha Wakiillada, isla markaana ogeysiiyeen Golaha
Guurtida, isagoo masuuliyadda arrintaasna u xambaariyey taliyaha
ciidanka booliska Somaliland Mr. Maxamed Saqadhi Dubbad.
Waxa afhayeenku qoraalkiisa ku sheegay in markii ciidammadu galeen
gudaha xarunta xisbiga su’aalo weydiiyeen Xoghayaha Guud ee KULMIYE
iyo xoghaynta xafiiska, waxaannu masuuliyiinta xukuumadda ka dalbay
in aanay ciidammada u adeegsan adeegsan hawlo siyaasadeed, dhexdna u
ahaadaan axsaabta qaranka.
Nuqul ka mid ah qoraalka afhayeenka KULMIYE hay’adahaas kaga dalbay
baadhista hawlgalka ciidammada ciidammada boolisku ku galeen gudaha
xarunta xisbigooda oo nuqul ka mid ah Jamhuuriya helay, waxa uu
isagoo dhammaystiran u dhignaa sidan:
“Mudanayaal; waxaannu idin ogeysiinaynaa in shalay [Sabtidii] 14
February 2009 ay xarunta xisbiga KULMIYE yimaaddeen ciidan hubaysan
oo ka tirsan ciidanka booliska, waxayna soo galeen xafiiska
gudihiisa, halkaasoo ay kula hadleen Xoghayaha Guud ee Xisbiga
KULMIYE iyo xoghaynta xisbiga.
Mudanayaal; waxaynu ognahay in ciidammada qaranku yihiin ciidamo uu
jideeyey distoorka qaranku, ayna yihiin kuwo ka madaxbannaan hawlaha
siyaasadeed, isla markaana dhex u ah xisbiyada siyaasadeed iyo
hay’adaha dawladeedba.
Qaabka iyo sifaha ay shalay 14 February 2009 ku yimaaddeen
ciidammada boolisku xarunta xisbiga KULMIYE waa mid ka baxsan
qaab-sharciyeedka ciidammada boolisku u gutaan hawlaha. Sidaa
darteed, xisbiga KULMIYE wuxuu u arkaa mid sharciga baalmarsan in
ciidanka qaranka booliska loo isticmaalo sifo siyaasadeed.
Mudanayaal; waxa kale oo idin ogeysiinaynaa marar hore oo badan in
arrintan oo kale iyo falal noocaas ah lagula kacay xisbiga KULMIYE,
waxana ka masuul ah taliyaha booliska. Arrintani waxay ku soo
beegantay xilligii doorashada, waxayna daah-furaysaa in aan taliyaha
boolisku dhex ka noqon Karin arrimaha doorashada.
Haddaba, xisbiga KULMIYE waxa uu ka codsanayaa Komishanka
Doorashooyinka Qaranka, Guddiga Anshaxa, Guddiga Arrimaha Gudaha iyo
Nabadgelyada ee Golaha Wakiillada, in si rasmi ah loo baadho
arrintan iyo xadgudubka lagu sameeyey xisbiga, go’aanna laga gaadho
cidda masuuliyadeeda leh.
Arrintan golaha xukuumadda waxba kama aannu ogeysiin, bacdamaa iyagu
yihiin cidda waxanba wadda.”
Jamhuuriya Online
|