|
Carigaan ku barbaariyo
Beledkii dhulka hooyaa
Beerku ii damqadaayo
Shilkan sii badanaaye
Shaqaalii baxsanaa iyo
Bulshadii ba dhameeyaa
Beytkan aan ka abuuroo
Barbaartii wadan keenaan
Ku baraaruji leeyee
Bayaan iiga dhegaysta
*****
Hadii aad beryahaaba
Barqadii kalahaysoo
Shaqo aad ku badhaadhay
Meel fog aad ka bilawday
Ama haayad balaadhan
Badh laguu magacaaboo
Balan aan la huraynin
Bender aad u tegayso
Gaadhigaad ku baxaayso
Indhaa laydhku bidhaamiyo
*****
Bidh
bidhaa lagu leexdiyo
Guluubkii bened naaye
Bereeguun ku tusaayey
Isha baalka la raacoo
Buuxi taayiradiiso
Saliidu budlinaayiyo
Biyihii u qiyaasoo
Hay isteerinka baashoo
Baabacooyinka saaroo
Wadadaad bedelaayso
*****
Inta aanad ka baydhin
Midaad beegso is leeday
Bidhbidhaa ku tilmaanoo
Barta aad u ordaysiyo
Bidixdaada hareertiyo
Barbarkaaga jaleecoo
Eeg muraayada baashiyo
Ta baabuurta tusaysoo
Ku biniini indhaayo
Adigoo is bidaaya
*****
Mid biimeeyay naftiisa
Baas haduu kugu dhaafoo
Boodhka uu kugu saydhoo
Bidhaantiisaba weeydo
Adna baawar ha siinoo
Intaad geerka ku boobto
Boqol maylka ha geeyne
Marbuu buuro dhextoodiyo
Bataaxoo rogmanaayiyo
Buunto kaalaa dhacaaye
*****
Boga laabta dusheediyo
Suunka beerka ku giijoo
Birtu way ku dishaaye
Qabta aad yar bareega
*****
Tagsigaa burburaaye
Sanadkii bilanaayaba
Jabaan ay bedelayse
Badahaa laga keenaa
Dadka baacuga gooyo
Biixiyaa ka rigaaxoo
Meelahaa kala boodo
Boqolaal haligaayo
Inkastoo naf baxaysa
Cidii baajin karaynin
*****
Sababaa badan koodu
Waa isteerin ka baasho
Bidix aan kaga oolo
Midig loogu bineeyo
Shirkadii ku badhaadhe
iibintiisa bilawday
Dadka jooga barmuudiyo
Burunaay shacab keediyo
Ila maa bakastaaniyo
Bunbaay bay u samaysoo
*****
Wadadooda balaadhan
Bidixduu ka maraayo
Beled keena dhexdiisana
Midigta u banaano
Boqol uu ku socdaayoo
Cagaf taayiro buuran
markaad baas istidhaado
baabuur ka hor yimaadiyo
booyad baan ku gefaynoo
bidhaantaanad arkaynin
wadadii balaqnayde
*****
boga laabta dusheediyo
beerka suunka ku giijoo
birtu way ku dishaaye
qabta aad yar bareega
gaadhigaa dadka biiliyo
tiyootaa dhulka buuxee
beledkeena yimaadaa
kamaankuu ku bakaaro
hadii bool laga saaroo
birta aad saru qaado
*****
qiyaastaa badh lumaayo
baalihiisa culaysku
dhinac buu u bataayoo
markaad layliga buu’biyo
xoolohoo barqanaayiyo
wadadii badhtankeedoo
dhagax buurani yaalo
barbar aad uga gooyso
adoon baacin Karayn buu
jidka kaala baxaayoo
*****
sidii baal dacar duulay
bidix kuula dhacaaye
birahaa is dul saaran
sidii laysugu beegee
maalintii la bineeyay
baanadu u xidheen iyo
boolashiisa u daayo
badhtankiisa kuraastana
hadii laysku buquujoo
dadku u iska buusho
*****
taayirkaa banjaraayee
intii xeerku bayaashee
beelka loogu sameeyee
loo baneeyay ku qaadoo
halis looma badheedhee
basar gaasta u siiyoo
*****
boga laabta dusheediyo
suunka beerka ku giijoo
birtu way ku dishaaye
qabta aad yar bareega
*****
hawl kastoo beri taaluu
gaadhi baylah tiraayoo
baahi loogama maarmee
basaskii cararaayiyo
booyad taangi la saariyo
xamuul baastada qaadiyo
candho maydle bagaashkiyo
bariiskii lagu raariyo
inta buudhiga jiidiyo
tagsigii bilcanaaba
*****
laysan buuxa u qaatoo
hadba kaad barataabaa
rabi kuu barakayne
markaad hiirta ku boodee
bilig aad u dhaqaado
talafoonka bakhtiiyoo
wax kastood barbarkaagiyo
bartuu yaalay ka waydana
baadhitaan ha ku goobine
malaa bawdada ruungiyo
*****
boqonkaa qarinaayoo
adigaa ku bakaaroo
isagaa baritoole
iska soo bixidoonee
gooladaha laga baydhiyo
boholada iska eegoo
*****
boga laabta dusheediyo
suunka beerka ku giijoo
birtu way ku dishaaye
qabta aad yar bareega
*****
mar uunbaa jid banaanoo
dadku uu ku badhaadho
balac weyn la samaynoo
shicibkii badahaa iyo
debedaa u boqooliyo
ubadkii laga beeriyo
ardaydii biritaaniya
wax ku soo baranaysaa
maanta hawsha bilaabe
barbarkooda istaagoo
*****
gacan buuxda ku siiyoo
dhinacay ka baxdaaba
waa bakayle geleene
balan qaadka rumeeyoo
shilinkaad bixisaaniyo
isku biirsada xoogoo
inta laami banaanoo
dadku uu ku badbaado
bulshadeenu helayso
*****
boga laabta dusheediyo
suunka beerka ku giijoo
birtu way ku dishaaye
qabta aad yar bareega.
*****
|
