Maareeyaha
Cusub Ee Dekedda Berbera Oo Muddo Gaaban Ku Suurta-geliyey Isbedelo
Ballaadhan Oo Dekedda oo Dhan Saameeyey
Maareeyaha
Dekedda Berbera Axmed Yuusuf Dirir, ayaa daboolka ka qaaday in muddo
kayar laba bilbood iyo badh gudadood ay ku suurageliyeen isbedello
xoogan oo dhammaan saamayn ku yeeshay geedis-sockii shaqada ee
Dekedda.
Berbera (TNN)-Maareeyuhu waxa uu sidan ku sheegay xog-waran uu
xafiiskii dekedda Berbera ku siiyey Qaarkamid ah shabakadaha wararka
ee Somaliland kaas oo uu si qorodheer ugu faahfaahiyey isbedelada
kala duwan ee ay ka hirgeliyeen dekedda iyo waxyaabaha u qorshaysan
ee ay doonayaan in sida ugu dhaqsaha badan u hirgeliyaan.
Waxaana Maareeuhu xog-warankiisana ku bilaabay sidan:-
“Marka hore waad ku mahadsan tihiin kulankan aad nala yeelateen.
Dekedda Berbera waxa aan anigu imika maareeye ka ahaa muddo laba
bilood iyo dhawr iyo toban Cisho ah, waana laga soo bilaabo 1-dii
September ilaa xilligan. Muddadaas aan xilka qabtay, annaga oo ku
xisaabtamayna inay Dekedda Berbera tahay meesha ugu muhiimsan
waddanka ee uu ka soo xaroodo dhaqaalaha ugu badani, inay tahay
meesha 80% Miisaaniyada waddanka ka qayb-qaadata. Waxaa nala
gudboonayd inaanu wax-qabad badan oo muhiim ahaa inaanu samayno.
Wax-qabadkaasna laba ayaanu u qaybsannay, qaybta 1-aad oo ah inaanu
maamulka wax ka qabano iyo qaybta 2-aad oo ah inaanu iyadana dhinaca
kaabayaasha Dekeda aanu wax ka qabano. Taas dhinaca maamulka waxa
aanu ka bilawnay inaanu uruurino cabashooyinka dadka ganacsata ah ee
macmiisha la leh dekeda oo aanu cabashadoodaas ka jawaabno, si aanu
u helno cabashadoodaas kulano isdaba joog ah ayaanu la yeelanay,
haddii ay yihiin Ganacsatada, Wakiilada iyo haddii ay yihiin dadka
ganacsiga gaarka ah leh ee ka adeegta Dekedda. Taas waxa nooga soo
baxday in Ganacsatadu ay ku dhiban tahay nidaamka ay marto marka ay
doonayaan inay alaabta la baxaan. Annaga oo taas ka jawaabayna
nidaamkii waxa aanu u samaynay hal hool oo keliya, si qofka
ganacsadaha ahi marka uu la yimaado waraaqo saxan uu hoolka inta uu
soo galo oo uu raaco counter-kaas uu albaabka kale ka baxo, isaga oo
wixiisu u dhan yihiin, oo haddii waxiisaasu document ahaan
dhammaystiran yihiin oo wax-ba ka maqbanayn aanay ku qaadanin muddoo
hal saac ah ama wax ka yar. Taas waanu ku guulaysanay waxaana nagaga
soo noqday jawaab fiican oo sax ah.
Tallaabada labaad ee aanu dhinaca maamulka u qaadnay waxa ay ahayd
inaanu madaxdii waaxyaha oo madax-waaxeedba muddo badan meel soo
joogay, oo qaarkood in ka badan toban sano waax madax ka ahaa, si
dardar-gelin shaqada ah loo helo inaanu madaxdii waaxyaha isku
bedelnay oo mid kasta halkii aanu filaynay inuu ku haboonaa aanu
gaynay. Taasina waxa ay keentay jawaab-celin aad u fiican oo keentay
in nin kastaa dardargeliyo waaxda la geeyey iyo in isaga laftiisu
aqoon badan ka korodhsado.
Markii ay intaasi dhacday, waxa aanu iyada samaynay dhinacii
tacab-dhalinta ama shaqadii wax dejinta iyo wax rarista oo annaga
wax-soo-saarkayaga ah, inaanu halkii ay ka ahaan jirtay sacaado la
qado tago ama habeenkii laga degi jiray saddexda habeenimo inaanu ka
dhigno joogto, oo shiftiga hore ee ku jira uu shiftiga ku xiga ay
sallaanka Markabka isku dhaafaan oo aan marna Markabkaas Kiriimkiisa
la bakhtiin, marna Doonta Xoolaha qaadaysa aan Sallaanka laga rogin,
taas ayaanu samaynay.
Waxa kale oo aanu samaynay maadaama oo aanu la kulannay wakhtigii
Carrafada in aanu Maraakiibta iyo Doonyaha Xoolaha qaadaya inaanu
muhiimada siino, oo haddii Maraakiib Badeecad sidaa ay xidhan yihiin
aanu ka furno oo aanu soo xidhno kuwa xoolaha qaadaya annaga oo og
muhiimada dhaqaale ee ay inoo leeyihiin xooluhu iyo culayska ay ku
hayso dadka oo xooluhu ugu xaraysnaado Maxjarka, taasina si fiican
ayay noogu hirgashay waana ay soconaysaa ilaa muddada yar ee ka
hadhay moosinka Xajka, waana arrin aanu halkaa ka sii wadayno.
Dhinaca maamulka waxa kale oo aanu samaynay qayb la yidhaado ICD
(Institutional Capacity Building) oo aanay hore dekeddu u lahaan
jirin oo toos u hoos yimaad maamulka. Kaas oo shaqada uu qabanayaa
ay tahay inuu diyaariyo wixii documents ah ee looga baahdo dekedda,
haddii ay tahay qorshe istaraatijiyadeed, qorshe suuq-gayneed, xagga
tababarada iyo dhammaan wixii la mid ah, iyada oo dad ajaanib ah oo
khubaro ahi naga caawinayaan. Xafiis ayaanu u furnay oo shaqadoodii
gacanta ayay ku hayaan, runtiina durba wax badan-na way qabteen oo
document badan ayay soo saareen. Waxaana aanu ku rajo-weyn saddexda
sannadood ee inagu soo fool leh in qorshahoodii istaraariijiyadeed
oo dhammaystiran aanu hirgelino, oo dee qorshe la’aantii waxa ay
noqonaysaa in wax waliba indho la’aan ku socdaan.
Waxa aanu iyadana dib u soo noolaynay waaxdii suuq-geynta oo iyaduna
markii hore aan shaqaynayn oo fadhiid ahayd, si aanu u yeelano
aragti ku jihaysan ‘yaa nala tartamaaya,’ yaa bar-tilmaameedsanaynaa
oo macmiil noo noqonaaya, si mustaqbalka aynu dekedeena horumar ugu
samayno dhinaca camiraadeeda iyo degisteedaba iyo raristeedaba,
taasina way noo socotaa waa wax lagu guda-jiro.
Haddii aan u gudbo dhinaca wax-qabadka muuqda. Dekedda waad
garanaysaan sida ay u googo’nayd waddadii waynayd ee laga soo geli
jiray iyo maalin kasta gaadhi weyn ayaa ku dhici annaga ayaa
Wiishahka u diray jirnay, oo dhinac ayay u jiiftay. Waddadii wax
badan ayaanu ka qabanay si guul ahna way noogu dhammaatay, wax yar
oo xaal-xaal ah ayuum-baa noo hadhsan. Waxaana ay noqotay wax soo
celiyey muqaalkii dekedda lahayd.
Waxa iyaduna dhammaystir ku dhaw oo iyaduna qabyo ah barxaddii lagu
kordhiyey Dekedda, ayaanu iyadana ballaadhinay oo wixii bilaydhis ka
dhinaa wax tiro yar ayaa ka dhiman, culays badan-na dekedda way ka
qaadi doontaa sida meel Baabuurta la dhigo ama mustaqbalka inay
noqoto meel Koontiinarada madhan ee dekedda dhexyaala inaanu iska
dhigno la dhigo.
Waxa iyana jirtay dhinaca biyadaha maraakiibtu qaadato, waxa keeni
jiraya Booyado. Booyadahaasi dhinaca sumcadda dekedda-na u may
fiicanayd dhinaca ammaankana u may wanaagsanayn, oo markab kastaa
toban ilaa labaatan Booyadood ayuu u baahan yahay. Si aanu taa uga
hor-tagno waxa aanu soo noolaynayd meeshii iyo kaalkii ay
Maraakiibtu biyaha ka qaadanayeen oo mika shaqanayaa, ilaa lix
meeloodna Maraakiibtu ay biyaha ka qaadan karaan, oo isagoo rarkiisu
ku socdo uu xagga kale biyaha ka qaado, halkii awal uu maalin ama
laba cisho ka hor uu Booyadaha sii dalban jiray, laakiin hadda
culayskaa badani wuu ka degay, taasina way noo suurta gashay.
Waxa kale oo noo suurta gashay Dekedu may lahayn meel xarun
caafimaad ah, maxaayeelay Dekedu waa meel khatar badan oo shaqo
joogto ahi ka socoto, oo dee waa meel Wiishash, Kiriinno, Lo’,
Baabuur iyo wax kastaa is dhex socodaan. Waxa laga yaabaa habeen
haddii aanay wax dhicin in habeen labaadka ay dhacaan. Qofka
dhaawacma waxaanu ula carari jirnanay cusbitaalka magaalada ama ha
sii dhiig-baxo ama dhib kale ha ku dhacdee. Annaga oo taas eegayna
inaanay wakhtigan habboonayn ee loo baahan yahay meel uu gurmad
caafimaad oo deg-deg ah ka helo oo ama lagu sii duubo ama wixii dawo
ah ee uu u baahan yahay laga sii siiyo, ayaa waxa aanu ku dhaqaaqnay
oo noo suurgala inaany xarun caafimaad samayno. Waana uu noo
suurta-galay, oo 24-ka saacadood wuu shaqaynayaa oo
shaqaale-caafimaad ayaa shifti u gala. Dawadiisii iyo Tallaagadihii
dawada lagu gurayay waanu u samaynay, si fiican ayaanu u
shaqaynayaa.
Waxa iyadana bishii sagaalaad 26-da aanu rakibnay arrin dekeddana u
muhiim ah, qarranka Somaliland oo dhan-na u muhiim ah, waa
Raadaalkii weynaa ee dekeda. Radaalkaasi waxa uu gaadhi karaa in ku
dhaw 200 oo notical Mile ayuu wax ka soo qaban karaa oo uu ina tusi
karaa waxa maraaya, dhinaca ay u socdaan, masaafada socodkooda iyo
dhaqdhaqaaqyada kale ee badda gudaheeda, oo waxa lagu dareemyaa
masaafadaas Markabka ku xumaada ama jihadii uu u socday dhinac looga
leexiyey. Raadawyaasha waanu dheeray oo waanu dhegaysannaa Markabka
kolka Caddan laga soo xidhaayo ama Jabuuti. Halka markii hore ay
Radyawyaashu ku eekaayeen meelaha dhawdhaw oo aanaan maqli karayn
waxa ka fog 10 KM. imika raadaalkaasi wuu noo hirgalay, waana uu
fiican yahay, wax kasta oo dhaqdhaqaaq ah oo badda ka socda si
fiican ayuu ula shaqaynayaa.
Barxadda dekedda dhismaha horteeda oo aad u burbursanayd iyadana
waanu dacar tirnay oo waanu dhammaystirnay.
Waxa aan filaayaa muqaalkii dekedda wax badan ayaa iska bedelay, oo
qofka markii hore ogaa marka uu hadda soo galo, wax baxan ayuu
arkayaa inay iska bedeleen. Soomaaliduna waxa a tidhaahdaa wixii ay
indho arkaaan ayay ilko gooyaan. Markaa inaanu muuqaalkii Dekedda
soo celinaa muhiim ayay noo tahay, Dekeddana wax tar ayay u tahay.
Marka aan ka oo gudbo qaybtaas, waxaa noo qorshaysan muddo lix
bilood ah inaanu wax badan ku dhammaystirno. Arrimahaas badan ee
aanu doonayno inaanu ku dhammaystirno waxaa ka mid ah; inaanu
samayno Kaadhadhkii shaqada ee shaqaaluhu ku soo gelayay Dekedda,
halka imika sida habaqlaha ah loo soo gelaayo, oo qofkii kaadhkaas
haysta oo keliya uu Albaabka ka soo gelaayo.
Inaanu samayno waxan loo yaqaano CCTV camera, ee ah kamaradahan
aragtida sameeya ee wax lagu arko, oo inta aanu security Room u
samayno halkaa laga hago dekedda oo dhan, oo tiro ahaan ilaa 50
kamaradood ayaanu shirkaddii samayn lahayd aanu heshiis la galnay,
oo ilaa December kamaradahaasi way naga dhammaanayaan oo sannadka
soo socda nala gaadhi maayaan sida aanu rajaynayno. Kamaradahaasi
waxa badan ayay soo kordhin doonaan haddii ay tahay dhinaca
ammaanka, dhinaca dhaqdhaqaaqa, waxaas oo dham wax badan ayay
Kamaradahaasi ka qaban doonaan. Labadaas arrimood si dhaqso ayay
noogu dhammaan doonaa haddii ilaahay ka dhigo.
Waxa iyayna labaatankan cisho ee socda noo imanaya oo aanu diranay
laba Wiish oo aanu ugu talo-galnay Doonyaha inay gaar u noqdaan.
Wiishashka kale ee waa weyn-na ee awal Doonyaha ku mashquuli jiray
inuu Maraakiibta uga faa’idaysano, oo Wiisha ka awood badan
Dooniyada inaanu mar kasta Doon naga dul-taagn, oo kharashka isaga
nagaga baxayaa aanu ka badan waxa Doonta ka soo baxaya. Annaga oo
xaggaa dakhliga ka eegayna aanu Doonyaha ku eekaysiino labadaas
Wiish ee aanu u dirnay.
Waxa kale oo imika jirta qolo ah saaxiibo aynu lee nahay oo aanu
heshiis la galnay inay Wiish weyn oo 70 ilaa 80 tan ah ay maal-gelin
ahaan noogu keenaan, dabadeetana aanu Instalment [hafto] isaga
bixino, oo muddo todoba bilood ah aanu lacagtaas ku bixino. Maadaama
oo uu aad qaali u yahay oo nus malyuun ay lacagtiisu tahay ay ka
badan tahay. Si marka aanu kaa iska dhammayno aanu wax kale ka
dalbanno, annaga oo waxayagii kalena barbar wadna.
Waxa isna markabka soo socda noo soo saaran Ambalace caawin doona
xarunta caafimaadka oo aanay hore u lahaan jirin dekeddu.
Waxa isaguna noo imanaya Baabuurtii Dekedda maydhayey ee hoosta ku
lahaa buruumiska ee marka hore inta uu xaadho, dabateedaba isaga
biyaha iyo saabuunta lagu shubayay, markaas xaaqista ku samaynayay
ee isagu hawshaas dhammaystirayay. Maadaama oo qashinka ugu badan ee
dekedda yaalaa digo iyo wax la hal-maala [la mid ah] oo wax culays
badani aanay ooglin. Kaasina insha’alaahu wuu ina soo gaadhayaan oo
dhawaan ayuu gacanteena soo gelayaa.
Qolyo kalena codsiyo ayaanu u qornay si aanu Tagboat uga helno, oo
Tagboat-ka hadda shaqeeyaa 1970’s ayaa la sameeyeey. Tagboat-ku waa
markab yar oo maraakiibta kale soo xidha. Maraakiibta waa weyb ee
aad aragteen wuu ka xoog wayn yahay oo waa bahalka soo riixa ee
keena dekedda, inta Markabta Injiinkiisa la bakhtiinayaa, isaga
[Tagboat-ka] ayaa xadhakaha qabanaya oo soo riixaya sidaas ayuu
Markabka dekedda dheegeeda ku keenayaa, oo Markabtu sida baabuurta
isaga oo Ordaaya bireeg lama qabanayee waa wax biyo saaran, waa in
meel shishe lagu soo bakhtiiyaa oo isaga oo la riixayo la keenaa
dekedda. Marka dekedda laga furaayana kama dhaqaaqi karo ilaa la
riixo. Markaa Tagboat-kan hadda yaala ee dekedu leeyahay waa 1400 oo
Horsepower, hadana awoodiis aad ayay hoos ugu dhacday. Waxa aanu u
baahan-nahay mustaqbalka goor ay gaadhaba ilaa 4000 oo Horsepower
mustaqbalka, si Maraakiibta waa weyn ee inoo imanaysa uu wax inagala
qabt o.
Waxa iyadana noo qorshaysan, waxaa jirta ciid badan oo badda soo
gelaysa oo wax yeelaysa daraafkii dekedda, ha ugu badnaato inay ka
soo gelayso dhinaca koonfur-galbeed, oo aad dareenayso inay ciid
badani ka socot, taas oo aanu gelinay samiyaal badan oo dadkeena iyo
Ajaanib-ba isugu jira, oo ay sheegeen inay ciidu soconayso, oo
halkii uu daraafku awal hoos uga ahaa 13M [mitir] uu hadda soo socdo
11M oo 2M wax u dhigmaa ay soo aasmeen, oo haddii la sii eegto waxa
ay keenaysaa khatar badan, taas oo kallifaysa inaanay Maraakiibta
waa weyne soo mari Karin jidkaas ay dekedda u soo marayaan.
Xafaarad yar ayaanu hadda haysanaa, laakiin awoodeeda way ka badan
tahay ciidani. Markaa inaanu helno Xafaarad ama Darayjar weyn, oo
Darayjarku waa Ijiin sida Ijiinada biyuhu u qaadaan isna ciida u
qaada, isaga badda ayaa la gelinayaa oo beebkiisu waxa uu soo
qaadayaa cidda iyo biyaha oo wada socda, balse ciiddu badan tahay,
dabateedaba bannaanka ayuu u tuurayaa oo wuu tuulayaa. Kaas ayaa la
yidhaahdaa Xafaarad.
Shaqaalihii ammaanka ee dekeda isaga wax badan ayaanu ka qabanayoo
dib ayaanu habaynay, oo baabuur u gaar ah iyo dirays u gaar ah
ayaanu u samaynay, oo dadka ajaanibka ahi marka ay noo yimaadaan,
waxaaba ay na yidhaahdaan Boolisku bannaanka ha nagaga hadho, haddii
aad qolodan leedihiin.
Waxa aanu hadda soo kaxaysannay laba nin oo ah ardaydii dugsigayada
sare ka baxday ee Jaamacadaha Ciidmada ee Itoobiya wax ku soo
baratay inay tababar noo siinaya shaqaalaha ammaanka, oo ay
galaaskana wax ku baraan, isla markaana ay goobaha shaqada la gaalan
oo ay tusaan sida ammaanka loo sugayo.
Waxa kale oo aanu hadda dib-u-hayn ku samaynaynaa xaruntii
tsbabarada ee shaqaalaha ee dekeddu lahayd, annaga oo doonayna
inaanu Institute u bedelno, oo shaqaalihii maamulku ay ka bartaan
qaybtii maamulka, isla mar ahaantaana inaanu ka samayno qaybtii lagu
baranayay farsamada gacanta hadday tahay Wasdaadnimadii, Nijaaradii,
qolodii dabka baaburka, dabkii kale ee gaadiidka iyo farsamooyin
kale. Waxaana muhiim ah in la helo cid na bedesha oo ilayn meesha
joogi maynee waa in la helaa cid aqoontii leh, waayo dekedda
shaqadeedu waa shaqo gaar ah.
Waxa aanu doonaynaa inaanu iyadana dib-u-hayn ku samayno qaybta
Geellaha [shaqaalaha muruq-maalka ah ee Dekedda]. Geelluhu nidaamkan
ay u samaysan yihiin waa qaab laga soo gudbay oo 50 ilaa 70
sannadood sidan u soo shaqaynayay. Sidan ay u kala yaal-yaalan-na
waa nidaamkii beryahaa hore la dhigay, waxa ay lahaan jireen xeer
wakhtigaa jiri-jiray. Xeerkaasi wakhtigaas ayuu ku habboonaa lakiin
imika in badan oo ka mid kala kala shaqayn mayso. Xeerkii waanu ka
soo qaadnay oo waxa aanu u dhiibanay niman Looyari ah, si ay u soo
sameeyaan bal wada-shaqaynta ka dhexaynaysa Geelaha iyo Dekedda,
Geelluhu waxa uu yahay, ilsa markaana la caddeeyo wakhtiga ay
hawl-gab ku geli karaan, oo ka 70 jirka ani aanu odhan gabdad ayaan
qaadayaa, ee la helo mar kasta cid awoodii leh oo wax qaban karaysa.
Arrintaana gacanta ayaanu ku haynaa, oo waxa aanu doonaynaa inay
noqdan urur dhisan oo xafiis leh.
Sida ay himiladayadu tahay, waxa aanu rajaynaynaa in dhammaan waxaas
oo dhami ay noo suurta-galaan haddii ilaahay ka dhigo.”
Axmed Mahamed Shaqalle
Berbera Somaliland
|