|
TACSI ٱلَّذِينَ إِذَآ أَصَـٰبَتْهُم مُّصِيبَةٌ قَالُوٓا۟ إِنَّا
لِلَّـهِ وَإِنَّآ إِلَيْهِ رَٰجِعُونَ
Cabdullaahi Maxamed Cumar oo deggan magaalada
Bolton ee dalka Ingiriisku wuxu tacsi u dirayaa, dhammaanba bahda waxbarashada ee
reer Somaliland- gaar ahaanna gobolka Gabiley, ehelkii iyo
asaxaabtii Macallin Maxamuud Maxamed Warsame oo ku magac dheeraa ( ina Afey) oo ku geeriyo oday laguna aasay magaalada
Hargeysa- maalintii Sabtida ee ay bishu ahayd:
11/05/2013
Wuxu baroordiiq gaar ah gaadhsiinayaa qoyskiisii iyo bahda xisaabta
ee Somaliland!
Ilaahay macallin Maxamuud jannadiisa Firdowsa ha geeyo, innaga Samir
iyo iimaan ha innaga siiyo.
Aamiin Allahayoow
Xasuustayda iyo Alle ha u naxariistee tilmaamihii macallin Maxamuud
oo laba heer oo kala duwan macallin ii noqday- intii u dhaxaysey
1975kii illaa 1980kii.
Alle ha u nariistee macallin Maxamuud waxa uu lahaa tilmaamo aan
caadi ahayn oo la yaab leh. Waxyaabaha xasuusta mudan ee ay xasuusan
karaan intii taqaaney, waxa ka mid ahaa:
Dhinaca Bulshada dhexdeeda
Isaga oo ahaa, nin miskiin ah oo aan shar lahayn, makhluuquna ka
nabadgalo
Isaga oo aanay waxba la ahayn waxyaabo badan oo dadka qaarkood la
weynaa. Tusaale ahaan, Ilaahay ha u naxariistee macallin Maxamuud
Afey; isaga oo macallin ah oo muunad ku leh oo jooga magaaladii uu
ku dhashay oo ay cid waliba taqaanno ayuu hadduu doono, suuqa wax
iskaga cuni jirey oo uu riyihiisa dheemaalka dooxa uga soo guran
jirey!
Nin wuxu ahaa sifihii Gaandhii Hindiya leh oo aad mooddo, in uu
aaminsan yahay aragtidii Gaandhi ee ahayd, ' Small is beautiful' oo
aanay noloshu la weyneyn.
Dhinaca Macallinimada iyo Aqoonta:
Ilaahay Jannadiisa ha geeyee wuxu ahaa, nin aan la qiyaasi Karin.
Wuxu ahaa, nin Ilaahay ku manaystay maskax hibo rabbaaniya ah oo aan
ahayn tu uu akhris iyo orod wax kaga dhaliyey
Rabbi ha u naxariistee, macallin Maxamuud wuxu ahaa; nin uu Ilaahay
u fududeeyey furfuridda xis aabaha. Tusaale ahaan, annaga oo fasalka
saddexaad ( form 3) iskuulka timacadde ku jirna; ayaa la noo sheegay
, inuu iskuulka yimid Maxamuud Afey oo Lafoole ka soo qalinjabiyey-
lagana yaabo in uu xisaabta noo dhigo. Markii aannu warkaa hellay,
ayuu arday uu macallin Maxamuud dugsigii dhexe xisaabta u soo dhigay
oo yaqaanay yidhi, ' Waar ninkii aynu ogeyn siduu wax odhan jirey oo
xisaabtii jaamicad u galay wuu inna jiidhsiine, aynu haatan
nidhaahno macallin kale noo raadi ya.
Ilaahay ha u naxariistee, waxa xasuus mudan; in maalin maalmaha ka
mid ah isaga oo xisaab Tirign oomatari ah noo dhigaya, ay xisaabtii
nala gashay; Eber eber u qaybi ( 0/0) oo aanu si hawlyar u wada
nidhi waa eber. Yaabku haddaba wuxu dhacay, markuu macallin Maxamuud
nagu diidey ee uu waliba caddeeyey; in aanay eber ahayn! Bal kaalay
adiguba ka jawaab!! Maalintiisa ayaannu xasuusanay, taladii uu
ardaygii soo jeediyey ee ahayd; waar xisaabta Ina Afey way inna
jiidhiye aan cid kale raadsanno!
Maxamuud Maxamed Warsame(Ihun) wuxu ahaa, nin Ilaahay miyir iyo maan
kale galiyo marka uu galaaska soo galo oo aad u deggan.
Wuxu ahaa macallin aad u far fiican oo ay sabuuraddu u riyaaqdo, si
fiicanna u kala qorshaysta oo aan is -dhex-dhigin waxa uu qorayo.
Wuxu ahaa (Ihun), macallin sixitaankiisa cadaalad ku saleeya oo aan
jawaabta oo kaliya eegine soo eega shaqada ardayga qabtay oo dhan.
Waxa la yaab lahayd oo tusaale fiican u ahayd macallin kasta, in
aanu weligii Maxamuud Afey istic maalin calaamadda khaladka loo
adeegsado ee ( x) ama (Cross)! Wuxu samayn jirey, calaamadda saxda-
xataa haddaad xisaabta khalado- Laakiin wuxu kugu siin jirey; eber!
Ilaahay macallin Maxamuud jannadiisa ha geeyo, innagana Eebbe ha
innooga daba naxariisto.
Aamiin...Aamiin
E-mail:
timacadde56@hotmail.com
|