Mudanayaal Baarlamaanka
Somaliland ka tirsan oo ku baaqay in xilka laga xayuubiyo wasiiradda
ciyaaraha iyo kaluumaysiga
“ Xadhigga Prof.
Nine waa mid baadil ah oo ay ka dambeeyaan rag dhaawacaya
himilooyinkeena ” Xil. Cabdisalaan
Maxamed Siciid
“ Haddii wax laga
qaban waayo labadaa wasiir ee awooda gaarka sheegtay, waxay
dhaawacaysaa kalsoonidii ay dadka Bariga Sanaag ku qabeen dawlada
"
Laba Xildhibaan oo ka tirsan Baarlamaanka Somaliland, kana soo jeeda
deegaannada Bariga Gobolka Sanaag ayaa si kulul u cambaareeyey
xadhigga ay xubno wasiirro ahi ka dambeeyeen ee Prof. Maxamuud Cabdi
Xaamud (Nine) oo Khamiistii toddobaadkan ay ciidamo boolis ahi ka
qabteen gurigiisa oo ku yaal xaafadda Ganad ee Degmada Ibraahim
Koodbuur.
Xildhibaan Cabdisalaan Maxamed Siciid oo ka tirsan mudanayaasha
Golaha Guurtida iyo Md. Cabdiqaadir Jaamac Xaamud oo ka mid ah
Golaha Wakiillada ayaa si kulul uga hadlay xadhigga Prof. Nine, kaas
oo uu Xildhibaan Cabdisalaan ku tilmaamay mid baadil ah oo aan
sinaba loo aqbali karin, halka uu Md. Cabdiqaadr Jaamac Xaamud-na ku
baaqay in labada wasiir ee ciyaaraha Maxamuud Siciida Maxamed iyo
Kalluumaysiga Cali Qoorseef xilka ay qaranka u hayaan laga xayuubiyo,
iyada oo haddii tallaabadaa ay dawladdu fuhinwaydana ay dhaawac u
geysan doonto kalsoonida ay xukuumaddu ku qabeen dadweynaha Bariga
Sanaag.
Waxayna labada Xildhibaan xuseen in wasiirrada ay caqabad ku yihiin
hormarinta deegaanka, isla markaana ay wax kasta ka hormariyaan
maslaxadooda gaarka ah, kuwaas oo haddii aan wax laga qaban dhibaato
ka abuuri kara deegaanka iyo guud ahaan dalkaba.
Xildhibaan Cabdisalaan Maxamed Siciid oo xalay Jamhuuriya soo
gaadhsiiyey qoraal uu kaga xogwarramayo xadhigga Prof. Maxamuud
Cabdi Xamuud (Nine) ayaa caddeeyey in aannu isagu habayaraatee wax
lug ah ku lahayn xadhiggiisa, isla markaana uu aad uga xun yahay
xaqdarrada lagula kacay Prof. Nine oo uu ku tilmaamay shakhsi qiimo
iyo qadarin ka mudan dalka, waxaannu xadhiggiisa ku tilmaamay mid
baadil ah.
“Waxaan ummadda reer Somaliland iyo isagaba [Nine] u caddaynayaa in
aanan xadhiggiisa raali ka ahayn, ogeyna meel aan kula tashaday
ragga xidhay, lana yaaban yahay cidda magacayga ku dartay liiskaa,
kana tacsiyeynaayo Prof. Nine, waayo arrinka la yidhi waa lagu
xidhay wuxuu ahaa mid uu isagu [Nine] fekeradiisa iyo dhismihiisaba
lahaa oo uu noola yimi oo aan u arkaayey hay’addaa uu aabbaha noogu
ahaa inuu rabay inuu uga faa’iideeyo go’doonka horumar la’aanta ah
ee haysta mandaqadda Bariga Sanaag, sidii ay wax uga qaban lahayd si
ay adeegyada bulsho ee asaasiga ah iyo wacyigelinta isku xidhka
ummadda reer Somaliland ee dal, dawladnimo iyo dani ka dhexayso.
Waxaan u arkaa waxtar weyn oo uu noo soo kordhiyey, kana saaray
turunturuuyinkii iyo isbaarooyinkii u yaalay masuuliyinta ka soo
jeeda deegaanka Bariga Sanaag ee ka tirsan fulinta ama xukuumadda
maanta dalka ka talisa oo u muuqata inay dabartay wax kasta oo ay ku
hanan lahayd ummadda ay iyadu ka masuulka tahay.
Waxaanna caddaan ah cidkasta oo wax ah oo ka soo jeeda mandaqadaa
Bariga Sanaag aanay ka dhibaato la’ayn kooxdaa ay aaminsan tahay
xukuumad-ku-sheega xidhxidhaysa birma-geydada, mana ogi hay’addii uu
aasaasay Prof. Nine oo aan anigu ka mid ahaa BOD-ka marka kooxdu ay
ka wareejisay.
Markaa waxaan leeyahay xadhigga Prof. Nine waa mid baadil ah oo ay
ka dambeeyaan rag dhaawacaya himilooyinkeena uu ku mutaystay
fikirkiisii uu faa’iidaynayey ummadda iyo burburinta isbaarooyinkii
soo jireenka ahaa ee wiiqay himilooyinka uu hiigsanayey dalkeenu iyo
horumar la’aanta haysta qaybo ka mid ah ummaddeena, waxaanan u mahad
naqayaa cdii ka ayb qaadatay soodaynta Maxamuud , marna u dul qadan
mayno wax yaabaha la caadaystay ee danaysiga gaarka ah ee dulmiyay
intii dan u wada umadda, dhaawacdayna himilooyinkii aynu
hiigsanaynay,” ayuu qoraalkiisa ku yidhi Xildhibaan Cabdisalaan
Maxamed Siciid.
Dhinaca kale, Md. Cabdiqaadir Jaamac Xaamud oo shalay shir-jaraa’id
ku qabtay xarunta Golaha Wakiillada, ayaa ka xogwarramay aasaaska
ururka waddaniga ah ee AMADO ee muranku ka taagan yahay, kaas oo uu
sheegay in loo aasaasay si horumar iyo waxqabad loogu gaadhsiiyo
deegaanka Bariga Sanaag, isaga oo tilmaanay in ururkaa uu fikradii
lagu aasaasay iska lahaa Prof. Maxamuud Cabdi Xaamud.
Waxaannu sheegay xildhibaanku in xadhigga lagula kacay Mr. Nine ay
ka dambeeyeen koox wasiirro ah, isla markaana uu ahaa sharci-darro,
isaga oo arrintaas ka hadlaya waxa uu yidhi; “Isaga oo aan waaran
iyo waxba loo jarin oo duhur cad ay tahay ayaa gurigiisii loogu
dhacay, waxaanna masuuliyaddaa lahaa oo amarka bixiyey oo taliyaha
ku khasbay oo wanjal been-abuur ah oo murugsan u sheegay oo dhaqanka
iyo bani’aadanimada ka baxsan waxay ahaayeen wasiirrada, runtiina
qodobka 25aad ee dastuurka qaranku wuxuu leeyahay qofna xorriyadiisa
loogama qaadi karo si aan xeerka waafaqsanayn, mana bannaana in
qofna la qabto, la xayiro, haddii aannu markaa faldambiyeed gacmaha
kula jirin. Runtiina intaasoo dhan wasiirradu way baalmareen
qodobkaa dastuurka ahna way jabiyeen, awood aan loo isticmaali karin
dadkana way isticmaaleen.
Runtiina waxyaabaha hortaagan waxqabadka Gobolka Sanaag wasiirrada
ayaa ka mid ah oo dano khaas ah wata, annaguna oo ay dadku na soo
doorteena waxaannu ka duulaynaa in dadkii na soo doortay ay wax
gaadhaan, dawladuna runtii way dadaashay oo waad ogaydeen in 7 July
2007, dawlad xoogga saartay sidii loo horumarin lahaa gobolkaa,
arrintaana wasiirrada ayaa carqalad ku noqday, waxaanna jirta haddii
Madaxweynaha shaadhkiisu cad yahay oo uu qof waxqabad leh yahay,
haddana shaadh madoobe, wasahakhaysani Madaxweynaha wuu
wasakhaynayaa, markaa soo jeedintaydu waxay tahay in wasiirrada
ciyaaraha iyo kalluumaysiga xilka laga xayuubiyo, waayo dalkii oo
dhan bay dhibaato galiyeen.
Taliyuhuna amarka uu siiyo wasiirka ciyaaruhu inuu sidiisa u qaato
aad baan uga xumahay, waanna nasiib-darro, taliyahana waxaan
leeyahay waxyaabahaas kuuma fiicna sumcadaadana uma fiicna, qof aan
maxkamadi soo xidhin in aad gurigiisa duhur cad ugu dhacdo oo aad
xabsiga dhigto, waxyaabahaasina waa waxyaabihii Somaliland ka soo
dagaalantay, tiina dadka dib ha ugu celinina ayaan idin leeyahay.
Waxaanan ku soo gunaanadayaa labada wasiir ee ciyaaraha iyo
kalluumaysiga ee ku dhaqmay falalka bani’aadanimada iyo dhaqanka ka
baxsan waa in xilka laga xayuubiyo, haddii waxba laga qaban labadaa
wasiir ee awooda gaarka ah sheegatay oo ay sidaa dawladdu ku sii
socoto Beriga Sanaag dawladnimadoodu waxba ka jirimayso. Bariga
Sanaagna iyagay u dabran yihiin, wixii dhaqaale gaadhi lahaa
wasiirro kale ayeyna shuraako kula yihiin wax dhaqaale ahina ma
jiraan.”
Jamhuuriya Online
|