Muj.
Xasan Ciise oo ka Hadlay Sababta uu uga
Baaqsaday ka Qaybgalka Xusaskii SNM
Guddoomiyaha ururka SNM, isla
markaana ah Madaxweyne-ku-xigeenkii u horreeyey ee Somaliland, Muj.
Xasan Ciise Jaamac, ayaa ka baaqsaday inuu ka qaybgalo xusaskii kala
duwanaa ee shalay loo sameeyey aasaaskii ururka SNM, isaga oo ka mid
ahaa aasaasayaashii bud-dhigga u ahaa ururkaas.
Laba munaasibadood oo lagu xusayey aasaaskii SNM oo lagu kala qabtay
xarunta xisbiga mucaaridka ah ee KULMIYE iyo hudheelka Ambassador ee
magaalada Hargeysa ayaanu midna ka qaybgalin Guddoomiyaha SNM Muj.
Xasan Ciise Jaamac, isaga oo aan ka maqnaan jirin xusaskii hore ee
maalinta 6da April.
Muj. Xasan Ciise Jaamac oo xalay Jamhuuriya khadka telefoonka kula
xidhiidhay, si aannu wax uga weydiino sababta kaliftay inuu ka
baaqdo xuska aasaaskii ururka uu Guddoomiyaha u yahay ee SNM, ayaa
sheegay in arrintaasi la xidhiidho khilaafka hadheeyey SNM ee
muddada soo taxnaa, waxaannu xusay in halkii uu labada garab ee
xuska qabtay uu dhinac raaci lahaa uu ka doorbiday inuu ka baaqsado
munaasibadahaas lagu xusayey aasaaska SNM.
“Arrintani waxay la xidhiidhaa khilaafka siyaasadeed ee ka jira
meelo badan oo adduunka ah oo SNM-na ay ka mid tahay. Shalay [Axaddii]
waxa ii yimi rag waaweyn oo ka mid ahaa bud-dhiggii SNM oo ka kala
socday labada dhinaca ee KULMIYE iyo UDUB oo igu martiqaaday in aan
kala soo qaybgalo xuska ay SNM u sameynayaan, markaa markii aan
eegay labada xus ee labada dhinac kala wataan oo isu soo beegmay,
ayaan go’aansaday in aanan midna tagin oo xataa haddii midba gelin
ahaan lahaa waan ka qaybgali lahaa oo isku waxbaan ka odhan lahaa,
laakiin isku saacad bay noqdeen, markaa way ila adkaatay in aan meel
raaco, sidaas ayaanan u kala dooran kari waayey,
Khilaafka SNM ku dhex jiraana horeba wuu u jiray oo waa la wada ogaa,
khilaaf kalena maahee raggii ahaa laf-dhabarta SNM ayey qaarna UDUB
ku jiraan, qaarna KULMIYE ku jiraan oo kala afkaaro iyo kala
siyaasad ayey noqdeen, laakiin meel baa berigii hore la isugu iman
jiray oo lagu wada xusi jiray oo nin waliba waxa uu doono ka odhan
jiray, maantase markii u horreysay laba xusi ka kala dhacaan
Hargeysa,” ayuu yidhi Muj. Xasan Ciise Jaamac.
Waxa Guddoomiyuhu sheegay in xuskii SNM ku soo beegmay maalin
khilaaf siyaasadeed ka taagan yahay dalka, taasina sii hurisay
khilaafkii ku kala dhexjiray mujaahidiinta SNM, isla markaana
sababtay in markii u horreysay laba meelood oo kala duwan laga xuso
aasaaskii SNM magaalada Hargeysa dhexdeeda, iyada oo markii hore
goob keliya oo Beerta Xorriyadda ama Khayriyadda ah lagu qaban jiray.
Muj. Xasan Ciise Jaamac oo aannu waydiinay waxa uu ka ogyahay
sababta xukuumaddu u mamnuucday in xuska SNM lagu qabto Beerta
Xorriyadda, waxa uu ku jawaabay; “Waxa ka kaxeeyey in Beerta
Xorriyadda lagu qabto xuska SNM xummadda siyaasadeed ee waqtigan ka
taagan dalka iyo xummadda doorashada soo dhawaatay,” ayuu yidhi
Guddoomiye Xasan Ciise Jaamac.
Jamhuuriya Online
|