Qaraxyada
Hargeysa Waxa Ka Dambeeyay Faraca Afrika Ee
Al-Qaaciida
Dawladda Djibouti ayaa sheegtay
inay weeraradii argagixiso ee Hargeysa ka dhacay 29 Oktoobar, ay ka
dambeeyeen faraca Afrika ee Ururka Al-Qaaciida ee uu hoggaamiyo
Osama Bin Laden.
Wasiirka arrimaha dibadda ee dalka Djibouti Md. Maxamuud Cali Yuusuf,
ayaa waraysi dhinacyo badan taabanaya oo uu siiyey wargeyska Sharqal
awsat toddobaadkan waxa uu ku weeraray Madaxweynaha dawladda
Imbigaati Cabdillaahi Yuusuf, oo uu tilmaamay inuu cadow ku yahay
nabad ka dhalatay dalka Somaliya. Wasiirku waxa kale oo uu
waraysigiisaa kaga hadlay wada hadalada Djibouti ku dhex maray
dhinacyada isku haya siyaasadda Somaliya, waxa kale oo uu ka hadlay
arrimaha budhcad badeedka Somaliya. Wasiirka oo ugu horreyn ka
hadlayey budhcad badeedka Soomaalida ayaa sheegay in dhibaatada
budhcad badeedku ay qayb uun ka tahay dhibaatada amni iyo
siyaasadeed ee ka jirta Somalia waxaana hadalka wasiirka ka mid ahaa,
“Waxa jira dadaal badan iyo xaalad abaabul oo aanu doonayno in aanu
mushkiladda Somalia xal ugu raadino, waanu bilownay oo waxaanu marti
gelinay wada hadalo dhex maray xukuumadda iyo mucaaradka. Waxa aanu
wada hadalladaa ku gaadhnay heshiis dhamaystiran oo guud iyo mid
siyaasadeed oo dhigaya in la dhiso dawlad midnimo qaran kadibna la
dhiso baarlaman ku meel gaadh ah oo ay ku jiraan dhammaan xisbiyadu.
Intaa kadib waxa la dooran doonaa madaxweyne cusub, dabcan waxa ay
waxan oo dhami dhacayaan marka ay Somalia ka baxaan ciidamada
Itoobiya oo si dhab ah uga baxaya ugu dambayn dhammaadka sannadkan.”
Wasiirka arrimaha dibadda ee Djibouti Maxamuud Cali Yuusuf waxa uu
ka digay bannaanshaha amni ee iman kara marka ay ciidamada Itoobiya
ka baxaan Somaliya isaga oo ku booriyey bulshada caalamka inay
dhaqso uga hawl gasho, “Waa lama huraan ina aynu dhaqso u dhaqaaqnaa,
waayo waqtiga ayaan ina sugayn, mana eegan karno inaynu sugno
bannaanshiyaha amni oo ay ka faa’idaysanayaan ururrada argagaxisada
ah iyo xag jirayaasha oo gacanta ku dhigaya caasimadda Somalia ee
Muqdisho, iyo deegannada ku xeeran.”
Md. Maxamuud Cali Yuusuf waxa uu tilmaamay in weerarradii argagaxiso
ee bishii October ka dhacay caasimadda Somaliland ee Hargeysa iyo
maamul goboleedka Puntland Somalia ay ahaayeen kuwo ay ka dambeeyeen
urur uu ku magacaabay Faraca Afrika ee ururka Alqaacida, waxana ka
mid ahaa hadallada wasiirka, “Haddii aanu nahay dawladda Jabuuti iyo
dawladaha deriska la ah Somaliya, sinaba uma doonayno in Muqdisho ay
yimaaddaan dad ku andacoonaya inay yihiin faraca Afrika ee ururka
Alqaacida, oo ah kuwii ka dambeeyey weerarradii dhowaan ka dhacay
Hargeysa iyo Bossaso. Iyaga oo leh u jeeddooyin siyaasi ah ayey
beegsadaan dad shacab ah iyo mu’asasado rayid ah. Arrintani waa ay
iska cadday, sidii wax looga qaban lahaana waxaanu ka wada xaajoon
doonaa qaar ka mid ah dalalka Carbeed.’
Waxa uu sheegay wasiir Maxamuud in madaxweynaha dalka Jabuuti
Ismaaciil Cumar Geelle dhowaan booqasho ku tegey dalka Yemen lana
soo kulmay madaxweynaha Yemen Cali Cabdalla Saalix, waxa kale oo uu
sheegay in arrinakan ay xidhiidh kala yeesheen boqortooyada
Sucuudiga, Masar, Sudan iyo Qatar. Waxa uu wasiirku sheegay in ay ka
shaqaynayaan sidii dhaqso loogu dhisi lahaa quwad amni oo
Soomaaliyeed oo tiradoodu dhan tahay 10 Kun oo Askari oo beddela
ciidamada Itoobiya.
Waxa uu wasiirku sheegay in aanay rajo buuran ka qabin in Somalia la
keeno ciidamo caalamiya taas oo ugu yaraan qaadan karta Lix bilood
illaa Sannad. “Xaaladda Somaliya hadda ma sugi karto waqti ina
le’eg” ayuu yidhi wasiirku.
Wasiirka arrimaha dibadda ee Jabuuti waxa uu sheegay in dalalkaas uu
magacaabay ay ciidamada la dhisayo ee Somalia siin doonaan qalab iyo
dhaqaale isla markaana lagu soo tababari doono dalalka ku xeeran
Somaliya, sida Itoobiya Jabuuti, Kenya iyo Uganda.. “Dabcan uma
baahna wax weyn, waxa keliya ee ay u baahan yihiin waa mushahar aan
ka badnayn bishii qof kasta 100 doolar.”
Wasiirka arrimaha dibadda ee Jabuuti oo la weydiiyey su’aal ahayd
sida uu u arko mucaaradada uu Cabdilaahi Yuusuf kaga hor yimi
heshiiska jabuuti oo uu ku sheegay mid beeleed iyo mucaaradka Asmar
oo qudhoodu heshiiska diidan waxa uu yidhi, “Madaxweynaha Somaliya
ma taageeri doono dib u heshiisiinta waayo waxa uu u arkaa in aanu
waafaqsanayn dantiisa shaqsiga ah, arrinta mucaaradka Asmara, waxa
aanu la yaabanay waxa keenay in Eritrea oo aan muddo 17 sano ah laga
maqal wax ku saabsan Somalia ay u danaynayso inay ka hadasho hadda.
Cabdilaahi Yuusuf waxa hadda hor yaalla masuuliyad culus, dawladdii
kumeel gaadhka ahayd ee uu hoggaaminayey afarta sano iyo badhka
waxba may qaban, maantana Somaliya iyo shacabkeedu waxa ay u baahan
yihiin inay ka gudbaan marxaladdan isla markaana ay helaan xal
siyaasi ah oo dhamaystiran. Haddii uu Cabdilaahi Yuusuf is leeyahya
xaaladdan oo lagu sii jiro iyo xalka arrintan oo dib loo dhigaa inay
dantiisa u adeegayso been ayuu isu sheegayaa, waxa aan leeyahay qof
kasta oo ka soo hor jeeda dib u heshiisiintu waa cadawga nabadda ee
Somalia” ugu dambayntii waxa la weydiiyey wasiirka arrimaha dibadda.
Markaa Cabdilaahi Yuusuf ma waxa aad u aragtaa inuu cadaw ku yahay
nabadda dalka?, waxaanu ku jawaabay “Haddii uu ku sii socdo
mucaaradadda uu kaga soo horjeedo jidka dib u heshiisiinta ee ay
Qaramada midoobey waddo. Waxa aanu aaminaynaa in aanu nabad
Soomaaliya ka dhalata doonayn.”
Source: Geeska Afrika, Hargeysa
|