Qosolka
Maanta Ee Saddexda Hoggaamiye Muxuu
Ku Dambayn Doonaa?
Diiwaangelinta cod bixiyayaasha doorashooyinka Somaliland ayaa
toddobaadkan ka bilaabantay Somaliland, waxaana lagu furay gobolka
Saaxil oo noqday gobolkii u horeeyay ee ay ka bilaabanto.
Diiwaangelinta oo ahayd mid ka mid ah caqabadaha dib u dhaca ku
keenay in doorashooyinkii goleyaasha deegaanka iyo madaxtooyadu
xilligoodii ku qabsoomi waayaan, ayaa waxa dareen isku mid ah ku
qaabilay saddexda siyaasi ee kala hoggaamiya xisbiyada KULMIYE, UDUB
iyo UCID, kuwaas oo ah ragga isku hirdiyi doona doorashada
madaxtooyada ee ay dadka hadda is diiwaangeliyaa codkooda ka dhiiban
doonaan horaanta kal dambe.
Madaxweyne Daahir Rayaale Kaahin oo guddoomiye u ah xisbiga UDUB,
waxa uu geed gaaban iyo geed dheerba u fuulay sidii ay
diiwaangelintu u hirgeli lahayd, isaga o u arka inay dhammaystiri
doonto doorashooyinka Somaliland ee uu bud dhigaha u ahaa
qabsoomidooda. Sidoo kale waxa la aaminsanyahay inuu Madaxweyne
Rayaale diiwaangelinta u arko inay sed ugu kordhin doonto codadka uu
heli doona, isaga oo aaminsan inay meesha ka bixi doonto ku
celcelintii la sheegi jiray inay ka dhacdo goobo badan oo ka mid
ahaa goobihii cod bixinta ee doorashooyinkii hore.
Guddoomiyaha xisbiga KULMIYE Md. Axmed Maxamed Siilaanyo, ayaa
diiwaangelinta u arka inay quxinayso oo keliya doorashooyinka,
waxaanu dhawr goor tilmaamay inaanay diiwaangelintu noqonin carqalad
kolba dib u dhigta qabsoomida doorashooyinka. Mar uu Isniintoo
doraad oo ay diiwaangelintu ka bilaabantay gobolka Saaxil, soo
saaray warsaxaafadeed waxa uu ku baaqay in dadweynuhu u dareeraan
diiwaangelinta, isaga oo ku taliyay inay fiiro gaar ah u yeeshaan
diiwaangelinta, “Xisbiga kulmiye waxa uu ku boorinayaa dadwaynaha ku
dhaqan Gobolka Saaxil inay diwaangalinta si wayn ugu soo baxaan,
Maadaama diwaan-galintu ka mid tahay nidaamka dimuqraadiga iyo
horumarka dallka.
Xisbiga kulmiye waxa uu muwaadiniinta Somaliland ku dhiirigalinyaa
inay fiira-gaara u yeeshaan isdiwaangalinta, Maadaama haddii aanu
muwaadinku is-diwaangalin luminaayo codayntii iyo qaadashada kaadhka
muwaadin-nimadda ee uu xaqa u lahaa.” Ayuu yidhi warsaxaafadeedka
hoggaamiyaha KULMIYE, oo isaga laftiisu aaminsan inay diiwaangelintu
wax tar u noqon doonto.
Guddomiyaha xisbiga UCID Md. Faysal Cali Waraabe, oo in badan ku
celceliyay inay lagama maarmaan tahay diiwaangelin in lagu sameeyo
cod bixiyayaasha, ayaa u arka bilowga diiwaangelinta inay tahay
talaabo hore loo qaaday, waxaanu Isniintii doraad shacabka reer
Saaxil ugu baaqay inaanay u kala hadhin oo ay isdiiwaangeliyaan.
Eng. Faysal, oo aad ugu dheganaa diiwaangelintu waxa uu qabaa in ay
wax badan ka bedeli doonto natiijooyinkii doorashooyinkii hore oo uu
xisbiisu ugu cod yaraa.
Si kastaba ha ahaate, marka si guud loo eego aragtiyaha muuqda ee
saddexda siyaasi ee xisbiyada kala hoggaamiya, , waxa ay
diiwaangelinta ku qaabileen qalbi furan iyo farxad, iyagoo sida la
saadaalin karo mid weliba uu tirsanayo inuu isagu noqon doon midka
ku najaxi doona diiwaangelinta cod bixiyayaasha doorashooyinka
Somaliland. Waxase ay runtu tahay in nin kasta ay bishu hor iman
doonto maalinta la gaadho cod bixinta doorashada, taas oo qosolka
wada jirka ah ee maanta u bedeli doonta niyad jab, marka laga reebo
ninka guusha hela ee ay diiwaangelintu saaciddo.
Source: Wargeyska Geeska Afrika
|