Rayaale oo ku Dhawaaqay inuu si Madaxbannaan u
Fasaxay Dhoofinta Xoolaha ee Al-Jaabiri u Xayirnaa
Madaxweynaha Somaliland Md.
Daahir Rayaale Kaahin, ayaa markii ugu horreysay shaaca ka qaaday in
la soo afjaray khilaafkii ka taagnaa dhoofka xoola nool ee ka
dhashay heshiiskii kootada ahaa ee xukuumaddu la gashay ganacasadaha
Sucuudiga ah ee Al-jaabiri, isaga oo caddeeyey in ganacsatadu fasax
u yihiin dhoofka xoolahooda.
Sidaana waxa uu Madaxweyne Rayaale ku sheegay waraysi dheer oo ka
hor intii aanu u baqoolin Itoobiya uu dalka Jabuuti ku siiyey
telifiishanka Universal TV, kaas oo uu kaga hadlay arrimo badan oo
ay ka mid yihiin kulamadii kala duwanaa ee uu la yeeshay Madaxweyne
Ismaaciil Cumar Geele iyo Senator Russ Feingold, Budhcad-badeeda,
weerararadii argagixiso iyo qodobo badan oo ku saabsam mandaqada
geeska Afrika
Madaxweyne Rayaale waxa uu waraysigaa ku sheegay in Jabuuti iyo
Somaliland yihiin labada dal oo walaal iyo jaar ah, isla markaana ay
waxyaabaha mandaqada ka dhacayaa wada khuseeyaan, waxaanna uu xusay
inay madaxda Djibouti ka wadahadleen sidii arrimahaas la isaga
kaashan lahaa.
Waxa kale oo Madaxweynuhu ka xogwarramay kulankii uu la yeeshay
mudane ka tirsan Golaha Senate-ka Maraykanka Mr. Russ Feingold, kaas
oo uu xusay inuu kala hadlay sidii Somaliland looga caawin lahaa
qaraxyadii ka dhacay dalka iyo in aanay mar dambe weerarro noocaas
ah lagu soo qaadan dalka, isaga oo dhinaca kalena sheegay in
arrimaha mandaqada khuseeya si gaar ah uga wadahadleen, isla
markaana ay kulmaadaasi ku dhammaadeen is afgarad.
Madaxweynaha oo la waydiiyey in masuuliyiinta ay Djibouti kula
kulmeen isla soo qaadeen arrimaha budhcad-badeeda ka dilaacay
xeebaha Soomaaliya, waxa uu yidhi; “Runtii budhcad-badeeda cid la
dagaallanta annaga [Somaliland] uun baa jirna Soomaali marka la
sheego, waxa jira qaar aannu qabayn oo aannu maxkamad saarayno,
kuwaas oo qaarkood ka yimaadeen Boosaaso, waanna la hayaa hadda oo
xabsiga ayey ku jiraan, markaa budhcad-badeedu waxyaabaha aannu ka
wadahadalnay ayey ka mid tahay ee ay ku jirtaa.
Markaa guud ahaan adduunka wixii nabad danaynaya haddii aannu
Somaliland nahay waxaannu jecelnahay in aannu gacan-saar la yeelano,
arrintaa budhcad-badeeduna saamaynta ay adduunka ku yeelatay mid la
mid ah ayuun bay annagana [Somaliland] nagu yeelatay, maraakiibtana
caymiskii ayaa ku qaaliyoobay oo cabsida dakeduhu ka qabaan ayuunbay
kuwayagana qabaan, waliba markaad u fiirsato annagu waanu u
dhawnahay oo saamayn gaar ah ayay nagu yeelanaysaa haddii aan wax
laga qaban.”
Madaxweynaha oo la waydiiyey dareenkiisa ku waajan aragtida
waddamada reer Galbeedka ee Maraykanku ka mid yahay ee ah in
aqoonsiga Somaliland ay u daba fadhiisan doonaan midawga Afrika,
waxa uu isaga oo arintaa ka hadlaya uu yidhi; “Run ahaantii had iyo
jeer qolyahan ajanabigu waxay yidhaahdaan aqoosiga Afrika ha nooga
horreyso, laakiin annaguna taayada ayaanu sheeganaa, waxaanan ku
nidhaahnaa Afrika had iyo jeer go’aanadiina ayay raacaan, waayo waxa
Afrika ku shaqayso waa qaraarada iyo go’aamada ka soo baxay Qaramada
Midoobay, qaraar ka soo baxa Midawga Afrikana laguma shaqeeyo, mida
labaad Miadawga Afrika waxba ma aqoonsado oo daldal baa wax lagu
aqoonsaadaa ,waddan baanna wadan aqoonsan kara,markaa Maraykanka
dhibaato ka hortaagan in uu na aqoonsado ma jirto. Annaguna
codsigayaga aqoonsi raadinta waanu wadaynaa, kolay cid ayuun baa ka
jawaabi doona ama Maraykan ha ka jawaabo ama Afrikaan ha ka jawaabo.”
Waxa kale oo uu Madaxweyne Rayaale sheegay in aannu jirin wax
habayaraatee iska beddelay xidhiidhka u dhexeeya Somaliland iyo
ergayga gaarka ah ee Xoghayaha Qaramada Midoobay u qaabilsan
Somaliland iyo Soomaaliya Ahmaduo Ould-Abdallah, xidhiidhkooda wada
shaqayneedna uu fiican yahay, isaga oo xusay in Somaliland
danaynayso dawladda u dhisanta Somaliya si loo helo laba dal oo
daris ah, kuna wada nool nabad galyo iyo is tixgalin.
Waxaanna uu tilmaamay Madaxweyne Rayaale in haddii Somaliland la
aqoonsado ay qayb-libaax ka ciyaari lahayd nabadaynta Soomaaliya,
halkaasi oo muddo badan ay hadheeyeen colaado daba dheeraaday oo
sababay dhimasho iyo xusuuq bani’aadanimo oo ka dhacay, isla markaa
dunidu u wayday xal arrintaa wax lagaga qaban karo.
Madaxweynaha oo ka jawaabayey su’aal ku saabsanayd qaraxyadii
argagixiso ee 29-kii October 2008 ka dhacay magaalada Hargeysa, waxa
uu yidhi; “Horta waxan la qariyey ee suurtogal ka dhigay in ilaa
madaxtooyada la qarxiyo ma dhibyara in markiiba la yidhaahdo waannu
wada ogaanaya, walina baadhistu way socotaa, raadadkeediina qaar
baanu haynaa, qaar wali baadhis ku jiraana way jiraan, waxaananu
rajaynaynaa inay soo baxdo.
Somaliland-na hore ayey falal argagixiso uga dhaceen, suurtogalna ay
noqotay in aannu raadino dadkiina aannu helno oo maxkamad aannu
saarno, waxaananu ku rajo weynahay kuwana in aannu heli doono
maxkamadna horgeyn doono, baadhitaankuna ilaa uu dhammaado wax
tibaaxo ah lama sheego, markaa ilaa aannu ka gun gaadhno iminka
odhan mayno halkaas ayey ahayd iyo halkanay ahayd, baadhistuna ha
dhammaato.”
Madaxweyne Rayaale oo la waydiiyey su’aal ahayd; “Qolyaha muraacadka
ah ee Somaliland waxay tilmaamaan in tallaabooyinka ammaanka ee la
qaaday hadday noqotay ciidammada fara badan oo la dhigay Hargeysa
iyo magaalooyinka kale, waxay ku tilmaamaan bandoo aan rasmi ahayn
oo magaalooyinkii la saaray, markaa tallaabooyinkaas dhinaca
ammaanku adiga ma kula yihiin qaar haboon.” Waxaanna Madaxweynuhu
su’aashaas kaga jawaabay; “Horta masuuliyadda dalka aniga ayaa haya,
haddii aan khatar arkana in aan ummaddayda badbaadiyo oo
nabadgelyada adkeeyo waa masuuliyad aniga i saaran ee maaha
masuuliyad mucaaradka saaran, ninka mucaaradka ahi had iyo jeer
waxay u badan tahay waxaan dhaliilba ahayn oo xil gudasho ah inuu
dhaliil ka dhigo, markaa waxay ku hadlayaan xor bay u yihiin,
aniguna kuma haysto, laakiin anigu xilkayga iyo waajibkayga ayaan
gudanayaa. Nabadii badnayd ee aannu ku seexanayna waa ta keenay in
madaxtooyadii la qarxiyo, waxaanan qabaa inay toosin noo ahayd cid
kasta oo nagaga dhimatayba, in aannu markasta feejignaano oo aannu
ka shaqayno in aan shacbiyga nabadgelyadiisa ilaaliyo, waajibayna
igu tahay, waanan ku dadaalaynaaa, nin mucaarid ah ayaa meel ka
hadlayna igama leexinayso xilka gudashadiisa, waayo masuuliyad baa i
saaran, mucaaradkuna may sheegin dhibaato iyaga loo geystay, laakiin
haddii mucaaridku nabadda la ilaalinayo ka didaan waa nasiib-darro
ayaan odhan karaa.”
Waxa kale oo Madaxweyne Daahir Rayaale Kaahin waraysigaas ku sheegay
in diiwaangelintii codbixiyeyaashu ku dhowdahay gebogebo, isla
markaana doorashooyinka lagu qaban doono muddadii loo cayimay.
“Doorashada dib u dhigmayno ama ha naloo yimaado [goobjoogayaal
caalami ah] ama yaan naloo imanine waqtigeedii ayaanu ku qabanaynaa,”
ayuu yidhi Madaxweynuhu.
Md. Daahir Rayaale Kaahin oo la waydiiyey halka ay ku dambeysay
murankii ku saabsanaa dhinaca xoolaha, ayaa sheegay in arrintaas la
soo afjaray waqtigii uu u qabay, isla markaana uu dhammaaday
muddadii shanta bilood ahayd ee loo qabtay ganacsatada xoolaha ee ka
madaxabannaan Al-jaabiri.
“Arrintaasi waxay dhammaatay, xoolihiina waannu fasaxnay, waxaanan
leeyahay ganacsatada xoolihii way idiin furan yihiin ee meeshaad
doontaan ka dhoofsada, ciddaad doontaana ka iibiya, anigu $50 dollar
ayaan idinku idhi Berbera kaash kaga qaata, laakiin haddii aad
diideen ama Carab keena ama isgarab yaaca ee bal yaan la arkin
idinkoo wax ka yar ku iibinaya xoolaheena,” ayuu yidhi Md. Rayaale,
waxaannu intaa ku daray in maxjarkii xoolaha ee Berbera la
dhammeystiray, isla markaana la sugayo in la soo qaado shahaadadii
lagu aqoonsan lahaa.
Jamhuuriya Online
|