Reenkaygu Ma
Riyadayda Oo Rumawdaa?
Cirka nimankaa sahanka u diree,
caadka ka hayaamay,
Cadceediyo dayaxa dawladahan, caawa kala sheegtay,
Caynkeennanay soo wada mariyo, caado liitahaye,
Cilmigii ay ku gaadheen rag waa, ku cibro qaataaye,
Candhadeeda nimankii karshee, cunay ku goosmeene,
Darfi wuxuu ka muuqda shacbiga, caafimad qaba’e.”
Aqoon- Timacadde
Arar
Baraarugaagu marbuu badhaadhe noqdaa, bilkhayr iyo marbuu bushaaro
noqdaa. Balladuna markaasay barbarkaas ka baxdaa. Adduunse marba
dhinac u billiglee. Si fiican ayaan subaxdaasi u waaberistay,
bustahana isaga rogay. Abaabul iyo diraargarow baan u heensaysanahay,
jarmaadaduna waxay ku beegnay meel aan sidaas nooga sii
ridnayn-makatabadii Jaamacadda. Hammuun waxaan u qabaa inaan gaadho
irrideeda, waxaan u heelanahay subaxdaas, bal in aan dhinac isaga
duwo wixii baryahaaba wehelka ii ahaa, Tiigsigaygu wuxuu noqday buug
dheeh cagaar iyo madow ahi ku kulmeen. Tollow muxuu inoo sheegi?
Cabaar markay dhaayuhu ka bogteen, noqay mid si xeel-dheer u
lafa-guraya Waxbarashada dalka soo-koraya ee Yugaandha.
Waxaan si baraad la’ kolba u rogayaa boggagiisa, wacaal se kama hayo
intaan marinaayo. Xiiso badnaa! Mar keliyuun bay hawo meel aanan
garnayn ka timid i saaqday, oo aan buuggii intaan horteyda dhigay
dib uga faagtey. Isla hadal baan bilaabay, waxaan dib u millicsaday
geeddigii Waxbarasho ee Somaliland iyo duruufihii ku gadaamnaa.
Garroo waxaan ka masayrsanahay dalkan Afrikaanka ah ee aqoonta ka
tanaaday.
Sawir buuxa oo xambaarsan waayo kala sansaan duwan baa i hor yimid.
Waxay xasuustu ii celisay muddo iminka laga joogo 13 sanno oo aan ku
kalihi jiray dugsi aan naga dheerayn. Dhagaxaan iyo daasadado,
mararka qaarkood loo baratamo, ay kuruus la jecel yahay noo ahaayeen.
Waxa noo dheerayd, qorraxda iyo roobabka oo meel laga galaa anaay
jirin. Fasaladda qaarna marka tabaashiirta la waayo, jab yar oo
dhuxul ah gidaarka lanoogu xardho. Macallinaa! Adigaaba sheegaya.
Hadaan laga tagay, waxaa na dhex-goobyaali jiray afar macallin oo
tabaruc wax ku dhiga oo iyaguna la dacaa-dhabanaya tiro badnaanta
ardayda ee agab la’aantu weheliso.
Dabcan, waad ila gartay baan filayaa, akhriste, meeshaan kaala
hadlaayo, waa Hargeysa, caasimadii dalka. Bal maxaad u malayn dalka
intiisii kalena? Bal adba. Ceeb ma ahaynoo dad iyo dalba duruuftaa
sidaasi na baday, oo wax dawladdii jirtay shaambad looga dhigo ma
ahayn. Ilaahayse waa wax loogu mahadiyaa in gobollada badidoodii ay
jaamacadaddo yeesheen, intii hadhayna ay ka dhex-guuxayso
hirgalintoodu. Maantase, uma soo weyso qaadan inaan ka hadlo
taariikhdii waxbarasho ee Somaliland, diiradaydu waxay haysaa,
inkastaba kacaa-kufkeenu ha leekaadee, intii karaankeen ah ma ka
gaadhnay waxbarashadii, mise weli waxbaynu hagranaynaa? Akhriste,
jawaabtu waa inoo dhex. Adigiyo dareenkaa , anigiyo gudoonkay.
Riyooy Ma Dhabawdaa?
Haa,haa,haa. Akhriste waxaynu isla garawsanay in horumar badan
waxbarashadda aynu ka samaynay, mase qabo, in halkii lay nooga
baahnaa ee tamarteennu ahayd aynu gaadhnay.
Waxaan ku riyoodaa, inagoo dejisanay manhaj maangal ah oo mideeya
dugsiyadda dawlada iyo kuwa gaarka ahba, oo horumariya ardaygeenii
diin iyo dhaqan ahaanba, haqabtirana baahideenii soo ergisasho
manaahij qalaad, kanna hortaga arday ku kala duwan mabaa’dida
aasaasiga ah ee Qaranimo. Keliya waxaan qabaa inay ina ciishay
Madbacad Qaran oo awood u leh daabacada buugagta waxbarasho. Taas
waxaynu ku gaadhi karnaa iyadoo dawladu dadka u jiheysa, sidaynu
caanka ku ahayn, barnaamijkii Iskaa-Wax-U-Qabso, oo lagu yagleelo
Madbacad Qaran.
Markale waxaan ku riyoodaa, wiilasha iyo gabdhahoo aqoonta u
hammuunsan, baratanna ugu jir gaadhida yoolkooda, oo loo sameeyey
dugsiyo u kala gaar ah ammaba waqtiyada waxbarasho loo kala duway.
Tusaale ahaan, wiilasha oo gelinka hore dugsiyada taga iyo gabdhahoo
galinka dambe dhigta. Maanka lagu hayo dheelitirnaanta aqoonta ay
qaadanayaan iyo u–sinaanta xaqa ay u leeyihiin inay wax barataan.
Waxaan ku riyoodaa, waalidkoo xidhiidh suuban la yeeshay
macallimiinta, oo u wada xaajoonaya si niyad-sami leh, isulana
xisaabtamaya doorkuu mid kastaaba lahaa, iskaashina ka yeelanaya
kobcinta iyo kor-qaadida tayada ardayga iyo ta dugsiygaba.
Waxaan kaloon ku riyoodaa, ardaydoo la baray taariikhdoodii, hor iyo
dambeetaba, intii nabadda wax ka tartay, intiii horumarka horseedka
ka ahayd, intii naf iyo maalba u hurtay dalkooga, intii duurka u
gashee dabaylaha iyo dhaxantu dib jiriyeen, bal inay yool ay
hiigsadaan ka dhigtaan, oo laga raarido in dhaqan iyo asluub lagaga
daydaa mudan yihiin.
Waxaan ku riyoodaa, iyadoo barnaamijkii Kedis la soo celiyey, oo
ardaydoo gacamaha bogga saaray, kunna luuqaynay Heesta Calanka.
Macallin, waalid iyo dadweyneba sacabka loo garaacayo ardayda.
Ardaydoo ku xargoonaysa aqoontii lagu soo ababiyey, muujinaya
midnimo iyo wada-jir, barashadii dhexdoodana sii libin laabaya,
aqoontii waxtarka lahaydana kala faa’iidaysanaya. Madaxweyne iyo
intii kale ee qaranka u saraysana ay ardayda la joogaan, iyagoo
dhiiri gelinaya, si kal iyo laab ahna furan ugu riyaaqsan, gacmo
qaadaya, abaal marino kala duwana hiil iyo hooba ardayda uga dhigaya.
Waxaan ku naalloon lahaa, ardaydoo laysku gacan baneeyo, laguna
taageero sidii ay isu maamuli lahaayeen, barta xilkasnimadda,
wadan-jecalyka iyo hogaaminta dhabta ah ee bari sugaysa. Ardaydoo la
kobcinayo taydooda hogaamineed iyadoo loo agaasimayo guddiyo iyo
ururba ay ku hafto baxaan, kunna layli baranaya iskaashiga iyo wax-wada
qabsiga dhexdooda ah, kunna ilaawaya waxyaabaha haraadinka ku ah
bulshadeena sida qabyaalada iyo balwadaha xun-xun ee kaleba.
Ardaydoo ka fikiraysa sidii wax ay quutan u soo saran lahaayeen,
halka ay iska weydiinayan maxaynu cunaa.
Waxaan ku riyoodaa, ardaydeenoo noqota kuwa ku tabaruca waqtiyadooda
fasax, is-abaabula oo taakulaynaya dadkooga aan waxna qorin waxna
akhiyin ee leh da’ walba. Iyagoo ka shaqaynaya cidhibtirka iyo
dabar-goyna jahliga dalkeena soof-daran habaabiyey, horumarka
dalkoodna cidna u daba fadhiisanaynayn. Iyadoo ardaydu ku doodaydsa
“ Anigaa wax baraya iyo anigaa…”.
Gebo-gebo
Waxaan ku soo gunaanadayaa, akhriste, riyooyinka iyo kuwa kale oo
laga yaabo inay kugu maqan yihiin, waxay inoo dhaboobi karaan,
markaynu yeelano jibaddii iyo xamaasadii aynu dalkeena ugu dannayn
lahayn. Waxay suuro-galayaan markaynu yeelano, wada tashi oo si
wada-jir ah ugu hogaamino dalkeena meel halkan uu maanta marayoo uga
midho-dhal fiican. Yaynaan noqon kuwii dalkooga ciilay ee mid kale
ka doorbiday.
Cabdiqadir Dayib Askar Abokor
Kampala, Uganda
siraskar@live.com
|