Sheekh Aaden Siiro Oo Madaxwaynaha Ku Adkeeyay Inaanay Xukuumaddiisu
Ka Gudbin Xayndaabka Qaranimada
Sheekh Aaden Siiro, waxa uu ka hadlay dabaca ku yimid qadiyadda
gooni-isu-taaga.....
Hareysa (TNN)- Sheekh Aaden Xaaji Maxamuud Xirsi (Aaden Siiro) oo ka
mid ah culimada waaweyn ee reer Somaliland oo Salaadii Ciida
kumanaan reer Hargeysa ah ku tukiyey garoonka kubadda ee xaafada
Xawaadle ee Magaaladda Hargeysa ayaa ka hadlay arimo badan oo ay ugu
weynayd sidii qadiyada Madax-banaanida Jamhuuriyadda loo dhowri
lahaa shacab iyo xukuumadba.
Sheekh Aaden Siiro, waxa uu ka hadlay dabaca ku yimid qadiyadda
gooni-isu-taaga Somaliland tan iyo markii xukuumadda Madaxwayne
Siilaanyo wada-hadalada la furtay dawlada ku meel-gaadhka ah ee
Somaliya, wada-hadaladaasi oo uu ku macneeyay madhalays sababay in
hal-doorkii reer Somaliland badhna Xamar ka deggaan badhna ku
hamiyaan.
Sheekh Aaden, waxa oo khudbada uu shalay jeediyey taabanaysay
dhinacyo badan oo dhammaantood ku qotomay sixid iyo sidii dhanka
horumarka loogu talaabsan lahaa xukuumadda Madaxwayne Siilaanyo ku
canaantay inay gabtay daryeelida agoonta, naafada iyo hooyooyinka
danyarta ah ee u baahan in meel lagu tiiriyo, isaga oo xusay in
halkii dadkaasi wax looga qaban lahaa ay shakhsiyaadka xukuumadda
xilalka ka hayaa ay dedaal ugu jiraan sidii ay uga faro-qabsan
lahaayeen shilimaadka kooban ee canshuur ahaanta looga qaado,
arintaasi oo uu ku naqdiyey luuqad wadani-nimo.
Sidoo kale, Sheekh Aaden Siiro, waxa uu xukuumadda ugu baaqay inay
ku ekaato xayn-daabka Somaliland, isaga oo sidoo kalena Madaxwayne
Axmed Siilaanyo ku booriyey inaan xukuumaddiisu dalka u soo waaridin
khilaafka iyo dhibaatada Xamar taala.
Sheekh Aaden oo ugu horeyn ka hadlaya dhibaatadii iyo halgankii loo
soo maray Madax-banaanida Somaliland ayaa yidhi “Dalkan Dad Badan
Baa U Naf Waayey, Dad Badan Baa U Hanti Beelay, Halgankii Loo Soo
galay dalkana maaha mid ay Sheegan karaan dad kooban, laguna halayn
maayo dad kooban, in lagu haleeyaana waa arin aan gar ahayn”
Sheekh Siiro waxa uu sheegay in Somaliland kaga badbaaday faro-galinta
dawladaha Geeska Afrika ku hayaan Somaliya wada-tashigii 1991-kii
iyo dawladnimada “Somaliya saddex jeer ayay galeen dawladaha jaarku,
waxayna u galeen iyagga oo aan u tashan (reer Somaliya) sida
Somaliland u tashatay oo inagu dawladnimadeena ayaynu kaga
badbaadnay, waxaynu kaga badbaadnay bulshada caalamka oo ah niman
dunida haysta oo isticmaala (Vito Power) oo yidhaahda anaga sharci
nama qabto oo wixii ay iyagu wanaag u arkaana wanaagsan yahay, wixii
ay xumaan u arkaana xun yahay, waxaynu kaga badbaadnay wada tashigii
gaarka ahaa ee aynu wada tashanay”ayuu yidhi waxaanu intaa ku daray
in xukuumadda Siilaanyo ay tayo ahaan hoos martay xukuumadda Rayaale
“Xukuumadda maanta talada haysa oo loo han-weynaa oo dhalinyarada
wada shaqada la’ ee jaamacadaha ka soo baxaya ee kumanaanka ah,
kumanaanka kun ee naafada, agoonta iyo kumanaanka kun ee
carruurtooda ku korinaya tamaandhada ee hooyooyinka ah ee salaada
subax ka dib dalka u ducaynaya ee dalka ku kalsoon oo loo han-weynaa
inay kuwaa meel ku tiiriso (xukuumaddu), may noqon sidii la moodayey,
xukuumadda maanta jirta waxaanu ku dhaliilaynaa kumay guulaysan inay
dadkaasi daryeesho, dariiqii xukuumaddii hore ee la bedalay ee aynu
ku dhaliilaynay in dawladnimadii u fahmeen gaadhi Land-criuser ah oo
la kaxaysto, mid guriga Wasiirka la dhigo iyo in Pepsi-ga iyo
kookaha loo samaysto Marfish aad u weyn iyo salada gabadha wasiirka
oo gaadhi lagu doono, ayaa waxay ku daraan mooyaane aanay waxba ka
dhimin (Xukuumaddani)”
Sheekh Aaden Siiro waxa kale oo uu soo qaaday “Waxaanu ka xunahay in
askariga jiida hore jooga ee laga soo qaaday Saylac, Boorama,
Hargeysa, Saaxil iyo Ceerigaabo ee 9-ka carruurta ah leh uu $ 80
doolar qaato, guriga wasiirkana ay yaalaan intaas oo Land-criuser,
waxaan leeyahay waa arin aan umadda qaban, waxaan leeyahay waxay
ahayd in xukuumadda iyo wasiirrada jira aanay dadkaa maatida ah ka
kaxaysan Land-cruser-o, waa shay caqli iyo sharci meel uu ku yaala
aanu jirin, waxaan filayaa in qof damiir lihi aanu dadkiisii uu
ciida cunaya oo soo ootay aanu shanta boqol ee Islaanta agoonta ah
laga qaadayo afar……shan Land-cruier ka kaxaysteen”ayuu yidhi waxaanu
intaa sii raaciyey “Umadda waxaan ku dhiirinayaa waar hala ilaaliyo
waxaa yar ee dadka laga ururinayo, tani ma ilaalinayso tii ka
horeysayna may ilaalinayn, isbedalkuna waxa weeye wax wixii hore ka
wanaagsan, ama la mid ah, laakiin wax ka liita MAYA”
Sheekh Aaden Xaaji Maxamuud Xirsi, waxa uu fariin wadani-nimo u
diray Madaxwaynaha Somaliland Md Siilaanyo “Waxaan Madaxweynaha
Jamhuuriyada Somaliland dhambaal uga dirayaa waar khilaafka Xamar
yaala ha soo rarina, waxa aynu aad uga xunahay dawlada Kulmiye
hogaaminayo intii ay dalka hogaaminaysay in intaas oo nin oo dadkii
mujtamacan sharafta ku lahaaya ay Xamar ka dageen, waxaan ka
xumaaday maqaal uu guddoomiyaha SONYO qoray oo uu ku leeyahay dantu
meel kasta oo ay ku jirto waanu ka dagaynaa, adeer Xamar oo laga
deggo dantu kuma jirto ee khilaaf-baa ku jira, Xamar oo laga deggo
waa la isku dilayaa oo dagaal sokeeye ayay abuuraysaa, kuwii lagula
dagaalamay ee kumanaanka ahaa ee Somaliland ku dhintay ayaa garami
doona oo Magaaladda jooga oo Burco jooga, waxaanu leenahay shay la
inaga yeelayo maaha, waxaanu leenahay ninkii Xamar doonaya waad
taqaanaa wadada loo maro, laakiin xukuumadda waxaanu leenahay awooda
maamul ee aad haysataan waa Somaliland, 97% ayaa u codeeyay
qadiyadda Somaliland, waana inta aynu ku midaysanahay, waar
khilaafka siyaasiga ah inaga ilaaliya, waar raggii loogu jeclaa ayaa
markii aad furfurteen idinku wada-hadal madhalays ah oo meel uu u
socdaa aanay jirin oo waddadiisu aanay cadayn ayaa intaas oo qof
Xamar ka degtay, intaas in leegna way u hanqal taagaysaa, taasina
waxay keenaysaa khilaaf siyaasadeed oo aynaan u baahnayn, xukumadda
waxaynu leenahay Somaliland ku ekaada, haddii aad intaa yar wadi
kari-waydaana umadda talada ku soo celiya ayaanu xukuumadda ku
waaninaynaa”ayuu yidhi isaga oo intaasi raaciyey inay jiraan culimo
Hargeysa shirar ku qabsatay, kuwaasi oo uu sheegay inaanay
aaminsanaynba jiritaanka iyo Madax-banaanida Jamhuuriyadda
Somaliland “Culimadu waa tiirarka ugu muhiimsan mushtamac Muslim ah
oo meel ku dhaqan, hogaanka siyaasadeed ee xukuumaddu wax walba way
furfurtay, dabadeedna kuwii Somaliland la dagaalamayey ayaa intaas
oo shir ku qabtay caasimada Jamhuuriyadda Somaliland ee Hargeysa,
iyagga oo ku ganacsanayn gooni isku taaga Somaliland iyo
midnimadeeda, waxaanu leenahay culimada waar khilaafka Xamar hasoo
rarina, waa awoodaha isku haysta Xamar ha keenina Somaliland”
Sheekh Aaden waxa uu Alle ka baryey in xukuumaddani ku dhaqanto
wixii reer Somaliland ku heshiiyeen “Xukuumaddu axsaabtii way
qaybisay, khilaafka hala yareeyo, marka khilaafku sii kordhaba
dhibaatadeeda ayay leedahay, ILAAHOW dawlada noo toosi oo ka dhig
kuwo ku socda wixii lagu heshiiyay”ayuu yidh.
Timacade News Desk
Hargeysa ,Somaliland
|