Shirweynihii
guud ee ururka samafalka ah GARDO oo kadhacay Bariga London
Malintii Sabtida ee taariikhdu ahayd 17/11/2012 ayaa waxa bariga
magaalada London lagu qabt ey shirweynihii GARDO kaasi oo lagu
doortay gudoomiye iyo .... DAAWO SAWIRADA
London (TNN)_Malintii Sabtida ee taariikhdu ahayd 17/11/2012 ayaa
waxa bariga magaalada London lagu qabtey shirweynihii GARDO kaasi oo
lagu doortay gudoomiye iyo guddi cusub. Shirkan oo runtii ahaa mid
mudo la naawileyey ayaa wuxuu ahaa mid si fiican loo soo abaabulay
waxana munaasibadu ahayd mid ay isku arkeen culimo. Aqoonyahan,
odayaal, dumar iyo dhalin yarba, waxana ka soo qayb galay dad ay
tiradoodu kor u dhaaftay ilaa 100 qof.
Shirka waxa hadal kooban ku furay Xaji Omar Sheikh oo microphoneka
ku wareejiyeey Ismail Sareeye oo daadihinayay shirka. Ismail Wuxuu
ku nuux nuuxsaday sidii hufnayd ee xilkasnimdu ku dheehnayd ee Dr
Mohamed Ali Hure mudaddii 10Ka sano ahayd ee uu xilka hayey u
maamulay iyo aragtidii caafimaadka qabatay ee ururka ku hagayey.
Waxanu hambalyeey guddomiyaha cusub, Xasan Muhumed Warsame( Hassan
Cade).
Shirka waxa wacyi diini ah ku furay Sh. Siciid Mohamed Farah Jirde
oo kamid ah culimada dalka ingriiska ku dhaqan kana mida ah dadka
GARDO iyo Khayrka ay wadaba taageera. Sh. Siciid wuxuu ka hadlay
walaaltinimada islaamka iyo waxa wada qabsiga wuxuna dadka uga digay
qaybsnaanta iyo xasad ka, wuxuna tilmaamay inuu xasadku qofka
camalkiisa wanaagsan cunayo sida uu rasuulku (CCW) uu inoo sheegay.
Wuxu ku booriyey dadku inay isku nasteexeeyaan wixii qaloocana si
nasteexa ah loo toosiyo, albaabada shaydaanka ee ay qabyaalada iyo
xasadku ka migyihiina layska xidho.
Intaas ka dib Dr Mohamed Ali Hure oo ahaa gudoomiyihii ururka 10kii
sano ee la soo dhaafay ayaa si qoto dheer uga hadlay wax qabadkii
ururka 10 sano ee lasoo dhaafay iyo mashaariicdii waa waynayd ee uu
ururku hirgalieyey, kaasi oo ay ka mid ahaayeen dib u dhiskii
cusbitaalka guud ee Gobolka, dhismayaasha iyo qalabaynta dugsiyada
kala duwan ee Gobolka Gabiley sida dugsiyada magaalada gabiley,
Arabsiyo, Kalabaydh, Tog Wajaale iyo wadada godka. Waxa kale oo uu
tilmaamay mashaaricda kale ee ururku gobolka ka hirgaliyey ee loogu
talo galay tayeynta wax barashada iyo MCHC yada gobolka, sida
computeriska iyo IT classes, projectors, books iyo qalab kale oo
kale duwan oo ururku gaadhsiiyey dugsiyada iyo MCHC yada.
Gudoomiyuhu waxa uu u mahadnaqey dhamaan gudiga GARDO ee UK, gudiga
GARDO ee Somaliland, shaqaalaha ururka, xubnaha ururka rag iyo
dumarba iyo dhalinyarada iyo dhamaan intii kala shaqeysey dhismaha
cusbitaalka guud ee Gobolka. Wuxuuna si gaar ah ugu mahadnayo
dumarkii kaalinta weyn ka qaatay dhismaha cusbitaalka iyo professor
Ahmed Nur Jama iyo Sh Said oo kaalin mug leh ka qaatay dhismaha
cusbitaalka.
Dr Mohamed wuxuu gudoomiyaha cusub Ilaahay uga baryeey in uu xilka u
fududeeyo, kuna asturo, wuxuuna gudiga iyo xubnahaba ku adkeeyeey in
si wanaagsan ula shaqeeyo.
Gudoomiyuhu waxa uu hadalkiisii ku soo gabagabeeyey dardaaran,
wuxuna dadka ku waaniyey inay xasuustaan nimcada ilaahay ku
manaystay iyo inay wax ka gaystaan tabarucaadka horumarinta gobolka
iyo dalka. Waxaanu ku baraarujiyey in danta guud la eego oo aan dan
yar oo hoose loo burbirin ta guud. Waxaanu dad waynaha kula
dardaarmey in ay isku duubnaadaan, la is cafiyo iyo in la isku
dulqaato. Wuxuna dadka kula dardaarmay hal ku dhiga GARDO oo ah isku
duubnaan iyo soo noolaynta kalsoonida iyo rajada’ dadka.
Waxa dabadeedna hadal kooban soo jeediyey Ismail Sareeye oo ka
waramay duruufaha gudaha dalka ka jira iyo sida ay dadku ugu
baahanyihiin tusaalaynta iyo hogaaminta GARDO. Wuxuuna dadka ku
diirigaliyey in ayna jeebkooda ka hagranin wax u qabadka gobolka iyo
in ay is dabataagaan, taageeraana waxqabadka GARDO. Wuxuuna u
duceeyey gudoomiyaha cusub. Wuxuuna dadka ku booriyey in ay la
shaqeeyaan.
Xaashi Ali Yusuf ayaa isna tilmaamay in GARDO hana qaaday, Guulo
waawayna ay soo hoysay. Wuxuna si gaar ah u xusay in Gudoomiyaha
xilka wareejinaya Dr Mohamed Ali Hure uu ahaa nin aad u karti badan
oo ay adagtahay in la buuxiyo kaalintiisa. Wuxuuna tilmaamay
muhiimada uu wax wada qabsiga iyo iskaashigu leeyahay. Wuxuuna
gudoomiyaha cusub Ilahay u baryey in hilka u fududeeyo.
Waxa kale oo shirka kasoo qayb galay Abdirahman Ahmed Mohamed (C/rahman
Cawlo) oo ka socday Ururka la yidhaahdo East African Development
Trust oo ah urur samo fal oo guud. C/rahman waxa uu tilmaamay
Gobolku inuu yahay mid balaadhan baahidiisuna ay badantahay, wuxuuna
tilmaamay in ururkoodu uu yahay urur ka tarmay GARDO uuna rajaynayo
in la sii xoojiyo wada shaqaynta iyo is kaashiga, wuxuna ku
dardaarmay in geedku uu kor u baxo si midho badan looga cuno oo laga
ilaaliyo in hoosta laga fadho. Wuxuuna tilmaamay kaalinta muga leh
ee ay GARDO ka qaadatay horumarinta wadanka, taasi oo mudan in la
taageero, laguna daydo.
Professor Ahmed Nur Jama oo ah dadka GARDO aadka u taageera, hubina
ka ah ayaa aad u amaanay wax qabadka ururka. Wuxuuna la dardaarmay
dadka aan meesha fog wax ka eegayn. Waxa kale oo uu dadka kula
dardaarmay in laga qeyb-qaato dhamaan wax qabadka wadanka. Professor
Ahmed waxa uu ku nuuxsaday in waxa la wada qabsado wuxuna soo
jeediyey in ururku uu hadda wixii ka danbeeya u jeediyo wax
qabadkiisa waqooyiga gobolka ilaa xeebtana wax qabadka la gaadhsiiyo.
Waxa isna soo jeediyeey hadalo guubaabo iyo tusaale ah Ali Aden
Meecaad, kabibna gudoonsiiyey shahaado sharaf xubno guduga GARDO ka
mid ah.
Waxa kale oo hadalo diirigalin, tusaaleyn iyo duco ah ka soo
jeediyey madasha: Abdi Muxumed Bade, Jibriil Ali AQli , Haji Omer Sh
Muhumed iyo Xamud ducaale.
Ugu dambayntii waxa halkaas ka hadlay gudoomiya cusub Hassan Muhumed
Warsame ( Xasan Cade) tilmaamayna guddida ururku inuu yahay ka
dhaliyey wanaagaa iyo sharaftaa laga wada markhaati kacayo. Wuxuna
mahad gaar ah ujeediyey gudiidii kala duwanayd ee ka soo shaqaysay
ururka. Waxa kale oo mahad gaar ah usoo jeediyey, Sh. Siciid,
cabdirahman Cawlo iyo professor Ahmed oo uu tilmaamay taageerada ay
had iyo goor la garab taaganyihiin GARDO inay tahay mid aan la gudi
Karin.
Gudoomiyaha cusub waxa kale oo wax ka tilmaamay in ururku ku
shaqaynayo maamul wanaagii iyo hufnaantii lagu yaqaanay ururka.
Wuxuna tilmaamay in waxa qabadka dib loo eegi doono mudnaana la siin
doon dadka curyaanka ah iyo ardayda jaamacadda iyo da’yarta oo
ururka laga qayb galiyo, wuxuna tilmaamay figradahaasi in ay yihiin
kuwo laga baaraan dagi doono kulamada ugu horeeya ee guddida ururka.
Xafladaasi Ururka GARDO ayaa ahayd mid si fiican u dhacday Kalsooni
iyo yididiilo cusubna abuurtay. Fariimihii shirka kasoo baxayeyna
waxay ahaayeen qaar ay ku dheehantahy isku duubnaan iyo waxa wada
qabsi buuxda oo ay yeeshaan bahwaynta bulshada Gobolka Gabiley iyo
tan Somaliland ba.
Timacade News DesK
London,UK
|