Madaxweyne Siilaanyo
Oo Ergadii Salaadiinta Ahayd Ka Aq bal ay Inuu Horfadhiisto
Siyaasiyiinta Ku Bahoobay Golaha Wada Tashiga Iyo Toosinta Qaranka
Hargeysa (TNN):-Madaxweynaha Somaliland Md. Axmed Maxamed Siilaanyo,
ayaa la sheegay inuu si rasmi ah u aqbalay inuu horfadhiisto
siyaasiyiinta mucaaradka ah ee ku bahoobay golaha wada tashiga iyo
toosinta qaranka, kuwaas oo ay dhawaan warbaahinta isu mariyeen
eeddo kulul.
Ergo salaadiin ah oo toddobaadyadii u dambeeyay isaga dabqaadayay
Madaxweynaha iyo golahan, ayaa xalay madaxweynaha la yeeshay kulan
balaadhan. Kulankaas oo ahaa mid ay albaabadu u xidhnaayeen ayaa
sida ay ilo xogogaali u sheegeen Geeska Afrika, waxa ay salaadiintu
Madaxweynaha ugu bandhigeen natiijada kulamadii ay la yeesheen
siyaasiyiintan mucaaradka ah. Salaadiinta ayaa Madaxweynaha u
sheegay inay siyaasiyiintani ka aqbaleen inay ka tanaasulaan magaca
gole islamarkaana ay kulan la yeeshaan Madaxweynaha si ay si toos ah
ugu bandhigaan dhaliilaha ku duugan 16ka qodob ee ay hore
warbaahinta ugu mariyeen.
Dood iyo wada hadal dheer ka dib, Madaxweynaha ayaa la sheegay inuu
aqbalay inay salaadiintu is horfadhiisiso labada dhinac isuna
dhegaysato doodaha dhex mari doona. Wakhtiga uu kulanku qabsoomayo,
ayaa la sheegay in laga sugayo inay salaadiintu cayimaan.
Madaxweynaha iyo xukuumadiisa ayaa hore si adag u cambaareeyay
golahan oo ay ku tilmaameen kuwo qayral sharci ah, halka ay goluhuna
ku doodeen inay yihiin gole u kacay badbaadinta qaranka oo ay
sheegeen inuu marxalad adag lugaha la galay.
Siyaasiyiinta golahan ku bahoobay ayaa ah rag dalka miisaan ku leh
waxaana ka mid ah Mujaahid Xasan Guure, Mujaahid Xasan Ciise Jaamac,
Mujaahid Maxamed Xaashi Cilmi, Mujaahid Ibrahim Cabdillaahi Xuseen (Dhegaweyne),
Xildhibaan Saleban Cali Koore, Xildhibaan Bulqaas, Eng. Faysal Cali
Waraabe iyo rag kale oo badan.
Source:-Geeska
|