Siilaanyo Oo Ka Hadlay Hirdanka Siyaasaddeed Ee Burco Iyo Kulamo Ay
La Yeesheen Wufuud Reer Yurub Ah
Guddoomiyaha xisbiga Mucaaradka
ah ee Kulmiye Axmed Maxamed (Siilaanyo), ayaa sheegay faahfaahin ka
bixiyay kulamo ay maalmihii u dambeeyay la yeesheen wufuud reer
Yurub ah oo booqasho ku yimi Somaliland, kuwaasoo socdaalkoodu la
xidhiidho indho-indhaynta geedi-socodka doorashooyinka iyo
xog-raadinta muranada siyaasadeed ee haatan taagan.
Axmed-Siilaanyo oo uu xalay
xog-waraysi kooban khadka telefoonka kula yeeshay Wargeyska Ogaal,
waxa uu ka hadlay loolanka siyaasadeed ee maalmihii u dambeeyay
hadheeyay magaalada Burco, isla markaana waxa uu goleyaasha
Baarlamaanka ugu baaqay inay si degdeg ah talo uga dhiibtaan muranka
ka taagan dib-u-dhaca doorashada Madaxtooyada iyo dhamaadka xilka
Madaxtooyada.
"Wufuudu (Sweden iyo Ingiriisku) axsaabta iyo Komishankaba way arkee,
waxayna inta badan naga xog-waraysanayeen arrimahan taagan, sida
Diiwaangelinta, waqtigan dib-u-dhacay iyo waqtigan yara adag ee
dalku galay. Markaa annaguna mawqifyadayada ayaanu uga waramaynay,
xisbiyada iyo Komishankuna way uga warameen.
Waxaanu u sheegnay halka aanu ka taaganahay arrimahaas, annagoo mar
walba uga mahadnaqayna doorka ay ka ciyaarayaan Dimoqraadiyada dalka
iyo taageerada ay u hayaan Somaliland....haddana welwelada badan ee
ka dhashay ama aanu ka qabno xaga Diiwaangelinta tusaale ahaan
khaladaadka ka yimi ee aan sidii la doonayay u dhicin ee mugdiga
badani ku jiro iyo sharciyada Madaxweynaha ee dhacaysa, iyadoo aan
waqtigii doorashada la gaadhin aragtida aanu ka qabno ayaanu u
sheegaynay, iyaguna arrintoodu waxay u badnayn guubaabo uun iyo in
dhibaatooyinkaa badan ee jira ay fahmi karayaan, laakiin cid walba
ay ku dhiirigelinayeen in xal la helo oo la gaadho." Sidaa ayuu
yidhi.
Mar la sii waydiiyay inay jireen qodobo gaar ah oo ay weftigan Yurub
ka socday u soo jeediyeen oo la xidhiidha tanaasul ay mawqifkooda ka
muujiyaan ama ay ka balanqaadeen inay dhinaca kale cadaadis ku
saarayaan, waxa uu uu ku jawaabay "Waxay soo jeediyeen talooyin guud
oo ay cid walba u soo jeedinayeen, waxyaabihii badnaa ee aanu
dawladda ka sheegaynayna kollay dawladda dibaddana waa lagagala
hadlay bay yidhaahdeen. Laakiin, waxa la yeelayo waxay u arkaa inay
tahay arrin Somaliland u taala loona baahanyahay in is afgarad laga
gaadho siday rajaynayaan."
Axmed-Siilaanyo oo la sii waydiiyay maadaama waqti koobani ka hadhay
xilliga ay Madaxweyne Rayaale iyo Ku-xigeeniisa kaga egtahay
xil-hayntoodu, inuu jiro dabac ay ka muujinayaan mawqifkoodii hore
iyo waxa ay yeelayaan, waxa uu sheegay in waqtiga doorashada la
qabanayo Komishanku cayimayo, isla markaana aanay waxba ka qabanin
waqtiga ugu horeeyay ee ay doorashadu ku qabsoomi karto.
"Laakiin, waxa muuqata inay xilligii doorashadu dhici lahaydba ay ka
soo horaynayso waqtiga Madaxweynuhu dhacayo, taasna mawqifka aanu ka
taaganahay waatii aanu dhowr jeer sharaxay, halkii uun baananu
taaganahay," ayuu yidhi Guddoomiyuhu.
Wuxuuna muujiyay in aanay aqbali doonin muddo-kordhin mar kale loo
sameeyo Madaxweyne Rayaale, isla markaana ay go'aan ka gaadhista
arrintani u taalo goleyaasha Baarlamaanka. "Waqtigu wuu is gurayaaye,
waxaanu goleyaasha ku guubaabinaynaa inay si dhakhso ah u
fadhiistaan oo ay arrintaa talo ka dhiibtaan," ayuu raaciyay.
Todobaadkii aynu soo dhaafnay, axsaabta Mucaaradka ah iyo Komishanka
doorashooyinku waxay isku maandhaafeen qaabka loo hawlgeliyay
Mishiinka kala shaandhaynaya dadka isu diiwaangeliyay codbixinta
doorashooyinka soo socda. Sidaa darteed, Guddoomiye Siilaanyo oo la
waydiiyay halka ay arrintaani haatan marayso waxa uu ku jawaabay, "Weli
arrimahaasi oo dhani way taagan yihiin, walaacuna sidii buu u jiraa."
Wuxuuna tilmaamay in Komishanka iyo hay'adda Interpeace inay qirsan
yihiin khaladaad badan oo ka soo baxay Diiwaangelinta, taasoo uu
tilmaamay in mugdi badani ku jiro.
"Markaa su'aashu waxa weeye; waxaas oo dhami iyadoo ay maqan yihiin
sida loo odhan karo xilligaas baa la qabanayaa doorashada, waayo
annaga ayaanay noo muuqanba," ayuu yidhi. Waxa uu sheegay in markii
ay Komishanka wax ka waydiiyeen arrintaas, in Guddiga doorashooyinku
keliya ku adkaysteen inay waqtiga ay u cayimeen ee 31 May 2009-ka ku
dhacayso.
Ka sokow arrimahan, waxa labadii maalmood ee u dambeeyay dhaqdhaqaaq
iyo olole siyaasaddeed hadheeyay magaalada Burco, kaasoo loo arko
badidiisu inay u dhexayso xisbiga talada dalka haya ee UDUB iyo
xisbiga Kulmiye, isla markaana waxa la sheegay inay halkaas ka
socdaan abaabul shirar iska soo horjeeda. Sidaa darteed,
Guddoomiyaha Kulmiye oo arrintaa wax laga waydiiyay waxa uu yidhi;
"Arrimahaa taako-taako ayaan ula socdaa.
Waxa jira wax wanaagsan oo taageerada xisbiga ah oo dadweynaha reer
isu yimaadeen oo aan filayo in ilaa caawa (xalay) soo baxaan, taasoo
ah taageerada xisbiga oo reer Togdheer oo dhami isku raacsan yihiin
oo aanu aad u soo dhawaynayno. Laakiin, qolooyinkan kale ee meesha
ka dabo tegay....Waxaad moodaa inay taas uun (taageerada uu
sheegtay) ay ka gilgilanayeen, laakiin sida aanu maqlay guul kalamay
kulmin."
Source:Ogaal
|