Siyaasadu sida ay
sheegaan nimanka ka faaloodaa maleh fool ama
falag loogu soo hagaago
Siyaasadu sida ay sheegaan
nimanka ka faaloodaa maleh fool ama falag loogu soo hagaago, nin u
faaliyay ama foox u shiday ma garto godka ay sal dhiganayso
siyaasadu, wacad ma leh siyaasadu, sokeeye iyo xigaal isku naxa ma
leh siyaasadu, gacal kala xishoodo oo xurmo dhex taalona siyaasadu
ma taqaan, haba sheegi saaxiib iyo rafiiqna wax ku taarta. Siyaasadu
way sakati iyo saymo badan tahay, dabanida iyo qoob-la-duulkedaa
badan, Jalfisteeda iyo miino-dhagreedkaa meel kastaba ku aasan,
hadaba markay siyaadadu sidaa u hadimo badan tahay, Ninka u banbaxaa
inuu dhex mushaaxo ama goosho mawjadahaa iyo suduudaha jararka iyo
buuraha dhex marayaa, waa inuu xeelad, xiniinyo, xoog iyo xoolo iwm
yeeshaa, si ay miciinsi uga noqdaan ka badbaadiya shalwadka
siyaasadeed iyo hafadkeeda uu qarka u saaran yahay markasta.
Marka aad hadaba taa ka duusho eed u soo noqoto waayaha dul hoganaya
Siyaasada dalalka afka Soomaaliga lagaga hadlo oo ay bahashuba ku
cusub tahay, oo aanay weli si fiican uga kobcin, awood adagna aanay
lahaynoo dhdinacyada aqoonta, dhaqaalaha iyo waayo-aragnimada ah, oo
ay sidaa weliba ku tiirsan tahay dalal iyo dadyoow kale oo dunida
ah, oo iyaga qudhoodu danahooda eeganaya, ayaa sida ay ku danbayn
doonto iyo waxa waagu ugu baryayaa aanay ku talogal la garan karo
lahayn !. Hadaba,-
- Maad is lahayd, Xiligan aan ku jirno ayaa ay reer galbeedka iyo
saaxiibadood Cabdilaahi Yuusuf ku farxi doonaan inuu meesha baneeyo,
inaga oo og siday u soo gacan qabteen iyo xooga iyo xoolaha ay ku
bixiyeen? !.
- Maad is lahayd Nuur Cade oo ah nin aan isagu askari ama jabhad ama
dagaal-ooge ahayn ayaa isaga oo xilkii uu hayay madaxweynihii soo
doortay ka fadhiisiyay, hadana ku nagaan doona jagada uu ku
magacaaban yahay ee wasiirka kowaad, , oo caalamku ku garab joogsan
doonaa? !.
- Maad is lahayd Shariif oo Maxkamadihii ka soo hadhay ayaa mudo
kooban ka dib hadana noqon doona, ninka dadka ( dawladaha ) qaar ku
hayaan isha inuu yahay ninka lagu wado jago ka mid ah kuwa ugu
sareeya, jagooyinka dalka Soomaaliya ? !.
Arimahaa dusha taxanoo miidhani waxay inoo muujinayaan in siyaasada
tahay, wacad-qabto iyo waxaanad isku halayn karin oo sida dabayl
xagaada hadba dhan kaaga timaada, ninkii shalay cadawgaaga
sissyaasadeed ahaa ayaa maanta noqonaya nasteexaad ugu jeceshahay,
kii shalay jalka aad daba siday ayaa maanta jar kaa turaya. Marka
aynu hadaba eegno dhacdooyinka is daba sudhan ee dhawaanahan ka
dhacayay daalka aynu jaarka anahay ee Soomaaliya, oo awood muujin
iyo jino-buursi badani ka sosoctay, waxan leyahay Mudane Cabdilaahi
Yuusuf, si fiican buu yeelay, waa sida ugu haboonayd ee la yeli
lahaa, mar hadii buurahii aad ku tiirsanayd ay ku qaleeyaan ood
dareento in wax si yihiin oo lagu saluugsan yahay, waxad ku khasban
tahay inaad waxy doonayaan yeesho, si aanay dibada kuugu tuurin oo
dabayluhu kuula tagin, waana sida uu yeelay Cabdilaahi Yuusuf, waayo
awoodiisa siyaasadeed ma ahayn mid uu ka haystay oo uu ka helay
dadka Soomaaliyeed ee waxay ahayd mid, ay dawladaha jaarka ah iyo
kuwa kale ku dul joogaan oo ku hayaan.
Cabdilaahi Yuusuf oo hadaba kursiga dalka ugu sareeyo waa
madaxweynenimada-e mudo ka badan 30 gu', daba jabinayay inuu maruun
ku fadhiisto, oo sida la sheegay isku dayay inuu hab inqilaab ku
qabsado oo ka mid ahaa saraakiishii uu hogaaminayay Ciro ( 1978-kii)
ee aan guulaysan, oo u soo jabhadeeyay oo duurka u xulay, oo jeel
iyo xadhig u soo galay, oo dagaal ooge u noqday, oo madaxweyne
maamul goboleed u soo noqday, taasina ay gaadhsiiyay inuu ka mid
noqdo dadka u tartama madaxwenaha Somaliya, oo aakhirkii Embagaati (
kiiniya) iyo 2004-tii dawladha jaarka ahi maamul ay sameeyeen, isaga
loogu magacaabay inuu noqdo madaxweynaha ku meel gaadhka ah ee
dawlad ay ugu magac dareen ''dawlada federaalka ku meelgaadhka ah ee
Soomaaliya '', ayaa hadaba 4 sano oo ku magacawnaa madaxweynaha
dawlada TFG ka dib, guuldarooyin badanoo siyasadeed oo dhinacyo
badan lehi ku sanduloobay inuu ka dego kursigii uu inta badan u soo
dhibtooday, una eeg hada in hadaladi uu hal-hayska u lahaa, qaar
beenoobeen, kani '' Ma quustaan '' waa beenoobay oo hada wuu quustay
oo uu dib ugu guryo noqday halkii uu ku dhashay, kan kalese ''
habaarqabe'' waa rumoobay, oo uu u horseeday inuu noqdo nin
habaarani ma Liibaano !, taasoo aan ujeedo inaanay u suurta galin
siduu doonayay. siday doonto ha ahaatee !
Gabogabo, waxa lagu xasuusan doonaa Cabdilaahi Yuusuf, nin hawl kar
ah saaxiibo badan samaystay oo ay isku guureen oo dano kala
fushadeen, ugu danbayntiina ay noqotay inay iyaga laftarkooda
dantoodu iska horkeentay, taasina ay keentay isku dhac, libtuna
raacday dabcan ninkii gacanta sare marka horeba lahaa, oon ahayn dee
Cabdilaahi Yuusuf.
Somaliland ha
jirto oo ha joogto.
Cali Cumar Xasan
|