Somaliland Oo
Masaafurisay Xildhibaan TFG Ah
Xukuumadda Somaliland ayaa
magaalada Muqdisho ee dalka Somaliya u masaafurisay muwaadin reer
Somaliland ah oo dhawaan xabsiga loo taxaabay, ka dib markii uu
isagoo ka mid ah baarlamaanka dalka Somaliya, ka soo degay madaarka
Hargeysa.
Mr. Maxamed Maxamud Faarax (Indhabuur), oo ahaan jiray badhasaab ku
xigeenka gobalka Sool, ayaa isagoo huwan xilkii uu Somaliland u
hayay ku biiray baarlamaanka dawladda Sheekh Shariif, markaas oo uu
fasax ka qaatay dawladda Somaliland oo uu xil u hayay. 26-kii Bishii
Febarwari ee la soo dhaafay ayay ciidamada ammaanka Somaliland ka
qabteen madaarka Hargeysa oo ay diyaaradi keentay, waxaana loo
taxaabay xabsiga, iyadoo xukuumadda Somaliland ku eedaysay inuu
galay khiyaamo qaran iyo lunsi hantiyeed. Hase yeeshe iyadoon la
horgayn wax maxkamad ah, ayay haddana xukuumadda Somaliland Axadii
toddobaadkan u masaafurisay magaalada Muqdisho ee dalka Somaliya,
iyadoo madaarka Hargeysa laga saaray diyaarad rakaab siday. Ma jiro
wax war ah oo ay xukuumadda Somaliland ka soo saartay mastaafurinta
muwaadinkan galay khiyaamada qaran, laakiin dad xogogaala ayaa
Wargeyska Geeska Afrika u sheegay in mastaafurintiisa ay ka qayb
qaateen odayaal ka soo jeeda gobalka Sool, oo xukuumadda ku qanciyay
in loo masaafuriyo wadanka uu sheeganayo inuu xildhibaan u yahay.
Baarlamaanka Somaliland ayaa hore u ansixiyay shuruuc lagu ciqaabayo
muwaadin kasta oo reer Somaliland ah oo ka qayb gala shirarka dib u
heshiisiinta ah ee loo qabto kooxaha Somalida, amaba sidoo kale ka
qayb gala shir kasta oo lagaga soo horjeedo qaddiyadda
madaxbanaanida Somaliland. Hase yeeshe Mr. Indhabuur, iyadoon wax
maxkamad ah lagu horgayn dambiga khiyaamada ah ee uu qaranka ka
galay ayaa loo masaafuriyay Somaliya.
Wargeyska Geeska Afrika
|