Soo
dhaweynta Inj. Saylici ee Borama ma Samirsiiska Cabdiraxman
Aw Cali Mise Sagootiga Madaxweyne Riyaale?
Berri ayaa waxaa xero ku wada jiri jirey 40 sac. Habeenkii alla soo
godaba afartankaa sac way isdili jireen. Markii loo tag waayey ee
nabad iyo xasilooni ay ka dheeraadeen, ayaa qoyskii lahaa talo ku
dhaqaaqay.
Waxaa loo kala qaybiyey 20 iyo
20, laba xerana waa la kala geeyey. Labaatan ayaa isdiley,
labaatankii kalana xasilooni iyo nabad ayay ku nagaadeen.
Labaatankii isdiley ayaa 10 iyo 10 loo kala qaybiyey. 10 baa isdiley.
10kii isdiley ayaa 5 iyo shan loo kala saaray. 5 baa isdishey. 5tii
ayaa 3 iyo laba loo kala qaybiyey. Labadii ayaa isdishey, sedexdiina
xasilooni ayay ku raamsadeen.
Habeenkii danbe ayaa waxa loo dhabagalay labada sac kii bilaabay
hirdida. Waxaa la ogaadey in uu saca giirka lihi yahay ka
goondhabada, hirdada iyo goolaaftan kula dhex jira Lo’ada. Malaha
adigu waad toogan lahayde, Dil lagu ma xukumin iyo gawractoona. Wuu
manaafacaad badnaa, habeenkii uu dhashayna qoyskii lahaa lo’doodu
way tafiirantay oo u badatay. Hoodaale ayuu ahaa. Waxaa lagu xukumay
in habeenkii tiir gaar ah lagu xidho. Xukun waxaa ugu liita dila oo
toogta, anigu waan necebahay.
Waxaan sheekadan ku keenay, Sedexda xusbi Qaran iyo Somaliland. Sida
aynu wada ognahay siyaasiyiinta Somaliland waa kuwii ku kala biiray
sedexda xusbi qaran. Sidii loo asaasayna xusbiga UDUB gudihiisa
goondhaba iyo goolaaftan laguma arag. Waxaa isaguna sidaa la wadaaga
Xusbiga UCID oo isagana gudihiisu wuu xasiloon yahay. Laakiin
Xusbiga Kulmiye tan iyo maalintii kooxdii Xusbiga Asad ku soo
biirtay, wuu ladi waayey. Sidii Lo’adaa sicii fiito waraariga ahaa
ku jiray, goolaaftan iyo goondhabooyin ayaa gudihiisa ka oognaa.
Haddaba shirkiisii ugu danbeeyey ee Golahiisa dhexe, laguna qabtay
magaalada Burco, waxaan u malaynayaa in uu Fiito waraarigii rabshada
kula dhex jirey ka baxay, islamarkaana dooni shaxarkii ka fiigey.
Kuwaas oo aan mid iyo laba ahayn, laakiin aan codad badan ku lahayn
beelaha ay ku baayactamayaan ee ay ka soo jeedaan. Mar haddii qofku
ka dudo shirku markuu dhexda marayo ee uu arko dantuu lahaa in aanay
soo muuqan, waa fiito waraari. Danta xusbiga uu sheeganayo waxaa
kala wayn dantiisa gaarka ah. In uu xusbiga talada qabto raali kama
ah, wuxuu raali ka yahay in uu keligii tallada qabto oo uu
madaxweyne noqdo.Taasina waxaad xusbinimo ku weydo qofnimo kuma
heleysid ayaa hortaal.
Xogta muranka Kulmiye waxay u badan tahay kursiga ay maanta ku
fadhiisteen ee loo doortay Axmed Maxamed Silaanyo Iyo
Inj.Cabdiraxman Saylici.
Haddaba Inj.Cabdiraxman Saylici oo ka mid ah raga laga duday,
gobolkii uu ka soo jeedey oo ay la wadaagaan Madaxweynaha JSL iyo
Muj. Cabdiraxman Aw Cali oo hogaqaminaya kooxdii bayrta ka yeelata
natiijooyinkii ka soo baxay xusbiga ay muddada dheer ku soo jireen,
ayaa si xad dhaaf ah loogu soo dhaweeyey magaalada Borama
doorashadiisii ka dib, isaga oo weliba masharaxii sedexaad ee la
tartamayey ee ka soo jeede isla gobolkaa, uu la safan yahay. Wuxuu
muujiyey in uu codad badan ka helayo Gobolkiisa, Bari iyo Galbeedna
aanu kala goyney ee isku tolayo, isla markaana uu xusbigiisu
taageero culus ku yeealanayo gobolkaa iyo gobolo kalaba.
Haddaba waxaa isweydiin leh, soo dhaweyntan xad dhaafka ahi ma
Cabdiraxman bay leedahay iska samir waa lagaa helaye, mise UDUB iyo
Riyaale ayay digniin siinaysaa siday u dhicin doonaan doorashooyinka
Qaranka ee innagu soo Foolihi oo kulmiye ayaa sed bursiimo iyo
ididiilo hor leh tirsanaya?
Haddaba Akhristo haddii aad jawaab sugan iyo xog ogaalnimo dheeraad
ah aad ugu dhaanto dadweynaha u soo bandhig?
Waa innoo saakuunta danbe
By Hamud Duale
|