Wasaaradda Duulista Oo Tafaasiil ka bixisay shan milyan Oo Dollar oo
Kuwait ugu deeqday
Hargeysa (TNN):- Wasaaradda Duulista hawadda iyo
gaadiidka cirka Somaliland ayaa shaaci say in dawladda Kuwait ay ugu
deeqday Somaliland si loogu balaadhiyo casriyaynta madaar ka
caalamiga ah ee Cigaal International Airport Hargeysa.
Sidaasna waxa lagu shaaciyay war-saxaafadeed uu maanta soo saaray
afhayeenka wasaaradda duulista hawadda iyo gaadiidka cirka Md.
Saddaam Maxamed Axmed, waxaanu u dhignaa sidan:-
“Wasaaradda Duulista Hawadda iyo Gaadiidka Cirka ee Somaliland waxay
halkan ku soo gudbinaysaa faahfaahin la xidhiidha Mashruuca cusub oo
dawaladda Kuwait inoogu deeqday.
Ka dib markii uu guulaystay mashruucii hore ee 10 milyan ee doolar
ka koobnaa ee dawladda Kuwait inagu caawisay, lacagtaas oo ku kala
baxday mashaariic laga fuliyey madaaradda Hageysa iyo Berbera.
Lacagtaas oo 4. 400 000 $ (Afar milyan iyo afarboqol oo kun) oo
dallar, ay ku baxday dib u dhiska iyo adkaynta runwaygii hore ee
Madaarka Cigaal, iyo Samaynta xayndaab silig ah oo ka kooban 7.5 KM
(Todoba Kiiloomitir iyo badh).
Dhinaca kalena madaarka Berbera-na ay ku baxday lacag dhan 4. 500
000 $ (Afar milyan iyo shan boqol oo kun) oo doolar oo lagu fuliyey
dhismaha Terminal weyn oo casriya kaas oo wali socda iyo xayndaab
silg ah oo ka kooban 11 KM, oo dhamaaday. Lacagta hadhay oo baaqiga
ah oo dhan 1 100 000 $ (Milyan iyo boqol kun) ayaa waxa ay dawlada
Kuwait siisay khuburada mashruuca gacanta ku haysa ee iyaga ka
wakiil ah, (Consultant Engineers).
Madaaradeena waaweyni waxay u baahan yihiin maalgalin intaas ka
badan, si ay ula tartamaan kuwa dhigooda ah, sidaa darteed waxay
Wasaaradda Duulistu dadaal weyn u gashay inay deeqo u raadiso
baahiyaha iyo qabyada kale ee jira.
Dawladda Kuwait oo aad ugu faraxday sidii loo meel mariyey loona
maamulay mashaariicdaa ay bixiyeen ayaa mar labaad aqbashay inay ina
siiso deeq dheeraad ah oo dhan Shan milyan oo doolar, taas oo
Wasiirka duulistu uu dhawaan soo saxeexay sida aad sawiradaas ku
aragtaan.
Lacagtan waxa loogu tallo galay in lagu kordhiyo dhabada dayuuradaha
madaarka caasimada ee Cigaal International Airport, oo u baahan in
lagu daro qayb cusub oo sagxada lagu soo bilaabayo, taas oo
dhararkeedu dhan yahay 1200 Miter ilaa 1400 Miter iyo baarkinka
diyaarahaha (Apron) oo lagu darayo 100×50 Miter, iyo sidoo kalena
Sholderska runwayga.
Si dhakhso loogu bilaabo mashruucan cusub oo wax weyn ku soo kordhin
doona Madaaradeena waxa ay Wasaaraddu go;aansatay in tartan loo
galo, waxa lagu casuumay dhamaan shirkadihii ka qayb galay tartankii
hore, sida AKIR oo fadhigeedu yahay Jigjiga. Teklebarham Ambaye
(Adisababa). Alliance (Djibouti). Star FU (Djibouti). China Hono
Group (Hargeysa). Iyo Amal JV (Hargeysa).
Dhamaan shirkadahan ayaa 20/12/2013 waxa la gudoon siiyey
dukumantigii qandaraaska ama ay bidhka ugu baahnaayeen, waxanan la
furi doonaa qadaraaska 04/01/2014-ka haddii ALLE idmo.
Hawshan waxa si wada jir ah u maamulaya khuburo dawlada Kuwait ka
wakiil ah, Guddia qan daraasaadka Qaranka, iyo Wasaaradaha Duulista
iyo Hawalaha guud ee Somaliland.”
Cumar Maxamed Faarax
Hargeysa,Somaliland
|