Wasiirka Cusub Ee Wasaaradda Shaqada Iyo Arrimaha Bulshada Oo Xilkii
Wasaaraddaasi La Wareegay.
Xaflada ay xilka kula kala wareegayeen labadan masuul oo maanta lagu
qabtay .......
Hargeysa (TNN)- Wasiirka Cusub ee Wasaaradda Shaqaalaha iyo Arrimaha
Bulshada Maxamuud Axmed Barre (Garaad) ayaa maanta si rasmiya xilkii
Wasaaradaasi ugala wareegay Wasiirkii hore ee Wasaaradaasi Marwo
Ilhaam Axmed Jaamac.
Xaflada ay xilka kula kala wareegayeen labadan masuul oo maanta lagu
qabtay xarunta Wasaaradaasi ayaa waxa ka soo qayb galay Wasiirka
Diinta iyo awqaafta Sh. Khaliil Cabdillaahi Axmed, Wasiir ku
xigeenka Wasaaradda Caafimaadka Nimco Xuseen Qawdhan, Luul Xasan
Mataan, Shaqaalaha Wasaaradaasi iyo Masuuliyiin kale oo tiro badan.
Agaasimaha Guud ee Wasaaradda Shaqada iyo Arrimaha Bulshada Baashe
Yuusuf Axmed oo ugu horeyn Xafladaasi ka hadlay ayaa waxa uu ka
waramay qabyooyin fara badan oo ka jiray Wasaaradaasi wakhtigii ay
yimaadeen, waxaanu sheegay in ay isku dayeen sidii ay qabyooyinkaasi
wax uga qaban lahaayeen, waxaana hadaladii agaasimaha ka mid ahaa
“Runtii markii aanu nimid Wasaarradan waxa jirey qabyooyin badan,
waxay Wasaarad aan u qaabaysnayn qaabkii ay u qaabaysanaan lahayd
Wasaarrad dawliya, waxay ahayd Wasaarrad aan lahayn Dhismeyaal ay ku
shaqayso, waxa ay ahayd Wasaarad aan lahayn Shaqaale ku filan, waxay
ahayd Wasaarad aan lahayn Gaadiid ku filan, markii aanu nimid
waxaanu isku daynay oo aanu awooda saarnay inaanu samayno qiimayn ku
saabsan baahiyaha ay Wasaarradu tabayso, meelahay ay Wasaarradu ku
xoogan tahay iyo meelaha u baahan in wax la xoojiyo. Waxaa noo soo
baxday galdaloolooyin badan oo u baahan in la buuxiyo oo ay kow ka
tahay halkii ay ku gudan lahayn Waajibaadkii qaran oo ah
Dhismeyaashii, markaa waxaanu ku guulaysanay inaanu helno xaruntii
guud ee Wasaarrada oo hadda dhammaatay, taasoo ay naga caawiyeen
Hay’addaha kala duwan, waxaanu dhismeyaal u helnay Saddex gobol oo
hadda gobol ka mida ahi uu Dhismeyaashiisii dhamaadeen”
Wasiirka Diinta iyo Awqaafta Sh. Khaliil C/laahi Axmed oo isna
halkaasi ka hadlay ayaa sheegay in muddo badan wada shaqaynayeen
Wasiirkii hore ee Wasaaradda Shaqada iyo Arrimaha Bulshada Marwo
Ilhaan Maxamed Jaamac, waxaanu wasiirku sheegay in ay ahay Shakhsi
wax qabad leh oo wax badan tartay Wasaaradda iyo dadka darbi jiifka
ahba.
Wasiirkii hore ee Wasaaradda Shaqada iyo Arrimaha bulshada marwo
Ilhaan Maxamed Jaamac oo iyana halkaasi ka hadashay ayaa ka warantay
waxqabadkeedii mudadii ay joogtay Wasaaradaasi, iyada oo sheegtay in
ay gawaadhi badan u iibisay Wasaaradda qaybaheeda kala duwan ee ay
ku leedahay gobolada Somaliland, waxaanay sidoo kale sheegtay in ay
Wasaaradda u socdo dhisme loogu talo galay oo casri ah.
Wasiirka cusub ee Wasaaradaasi loo soo magacaabay Maxamuud Axmed
Barre (Garaad) oo isna halkaasi ka hadlay ayaa balan qaaday in uu si
fiican ula shaqayn doono shaqaalaha Wasaaradaasi, isla markaana isku
dayi doono in uu halkaasi ka ambaqaado waxqabadka ay sameysay
Wasiirkii ka horeeyey.
Ugu dambeyntii labada Masuul ayaa xilkii wasaaradaasi kula wareegay
xafladii iyada oo Ilhaan Maxamed Jaamac Wasiirkii hore ee Wasaaradda
Shaqada iyo Arrimaha Bulshadu Wasiirka cusub soo tustay Guriga cusub
ee loo dhisayo wasaaradda iyo waaxyaha kala duwan ee uu ka kooban
yahay.
Sacad M. Cabdi
Timacade News Desk
Hargeysa, Somaliland
|