Waxay
Ahayd inaynu Gobollada Bari Xaqsoorkooda Siinno oo Dhawr
Madaxweyne-ku-xigeen Samayno
Muj. Xasan Ciise Jaamac oo u jeediyey xukuumadda Siilaanyo baaqyo
kala duwan oo la xidhiidha shaqaaqooyinka bariga, wadahadallada
Soomaaliya iyo xaaladda dalka
“Haddaad tuug meesha u dhiibataan oo tidhaahdaan waxbay noo soo
dhicinayaan, gonduhuun baynu is wada haysanaynaa oo weligeen horumar
gaadhi mayno”
“Adduunka caqliga leh ninka doonaya inuu taajir noqdo
baayac-mushtariga ayuu galaa, Afrikana wuxuu odhanayaa wasiir ha la
iga dhigo”
“Qaabka wadahadallada loo gelayo maaha in xukuumaddu shan wasiir
magacawdo. Qaabkaasi waa qaab qaldan”
Hargeysa (TNN)- Madaxweyne-ku-xigeenkii u horreeyey ee Somaliland,
ahna Guddoomiyaha iyo murrashaxa madaxweynenimo ee
urur-siyaasadeedka XAQSOOR Muj. Xasan Ciise Jaamac, ayaa xukuumadda
Madaxweyne Siilaanyo u jeediyey tusaalooyin iyo talooyin ku saabsan
siyaasadda arrimaha gudaha iyo dibadda, isagoo si gaar ah farta ugu
fiiqay shaqaaqooyinka ka taagan gobo llada bari iyo guddida
wasiirrada ah loo saaray inay dariiqa u sii xadhaan wadahadallada
dhexma ri doona Somaliland iyo Soomaaliya iyo qodobo kaloo ku aaddan
xaaladda guud ee dalka.
Muj. Xasan Ciise Jaamac oo khudbad dheer ka jeediyey gebagebadii
shirweynaha 1aad ee urur-siyaasadeedka XAQSOOR oo shalay isaga loogu
doortay guddoomiyenimada iyo murrashaxa madaxweynaha ee ururkaas,
waxa uu ka hadlay dhacdooyin maanta taagan oo markii SNM dalka
qabsatay ay doonayeen in wax laga qabto, balse aanay waxba ka
hirgelin, isagoo arrimahaas iftiiminayeyna waxa uu hadalkiisa ku
bilaabay; “Arrimaha gudaha Somaliland waxa ugu mudan maanta in la
soo qaado shaqaaqada bariga ka taagan. Arrintaas iyo wixii la mid ah
Ilaahay ha inbaga qaboojiyo. Ilaahay baynu waydiisanaynaa inuu
nabaddii iyo walaalnimadii inoo soo celiyo bari iyo galbeedba.
Arrintaas maanta bariga ka dhacday waa arrintii markii SNM dalka soo
gashay aannu doonnay inaannu ka hortagno inay timaad, dariiqii aannu
u marnayna wuxuu ahaa shirkii Burco aannu ku qabanay. Waxaannu ugu
yeedhnay reer Somaliland oo dhan bari iyo galbeedba. Hoggaankii
beelihii tobanka sannadood isdilayey ee dawladdii arxanka la’ayd ee
Siyaad Barre masuulka ka ahayd ayaannu giddigood halkaa ugu yeedhnay.
Shirkaasi qiimaha uu leeyahay dad badan reer Somaliland ah waxa laga
yaabaa inay ka dhacsan yihiin, laakiin waxa qiimihiisa siiya qolyaha
caddaanka ah ee la yidhaa hore ayey u mareen.
Shirkaas waxaannu ugu talogalnay in shaqaaqadaas maanta ta bari ka
taagan la baajiyo iyo mid la mid oo kale galbeed amma meel kale ha
ka dhacdee. Beelihii aan SNM ahayn waxaannu ku casuunnay inay soo
galaan golihii dhexe ee SNM, waayo may jirin markaa haykalkii
dawladnimo may dhisnayn, golihii wasiirrada ayeyna soo galeen. Mid
baa na seegtay markaas markaannu dib u eegno oo khaasantan ina
seegtay shirkii dambe ee lagu qabtay Boorama; ta ina seegtay waxay
ahayd in aynu dadka gobollada bari xaqsoorkooda siinno oo dhawr
madaxweyne-ku-xigeen aynu samayno wax innaga mamnuucayey may jirine,
laakiin bani’aadam baynu nahay oo Soomaalidu waxay tidhaa, ‘Nin
habari dhashay hal ma seegi waayo.’
Walaalaheenna bariga shishe erayga aan odhanayaa waxa weeye,
walaalayaal Soomaalidu waxay ku maahmaahdaa, ‘Carrab iyo labadiisa
daan baa isugu dhawo way is-qaniinaan’ hadday shaqaaqo dhacday
labadeenna dhinacba qalbiga aynu soo celinoo xabbad-joojin aynu
marka hore oggolaano.”
Waxa kale oo uu Xasan Ciise Jaamac ku baaqay in gogosha nabadda laga
dhigo mid qaran oo laga qaybgeliyo goleyaasha Guurtida, Wakiillada
iyo asxaabta siyaasadda.
“Gogosha nabadeed ee madaxweynuhu ku dhawaaqay aynu soo gelino
Guurtida, barlamaanka aynu soo galino, xisbiyada kale aan soo galin
aan ka dhigno talo qaran oo aynu ka gudubno inay noqoto talo
dawladeed oo keliya, maadaama ay dawlad xisbiyeed tahay, sidaasna
aynu ku soo ceshanno walaalnimadeedii iyo midnimadeennii.
Waxaan xasuusinayaa walaalaheenna bariga shishe shirkii Burco (1991)
ee aynu qabanay wacad baynu ku galnay, waxaannu ahaa inaynu isa
saamaxno oo aynu Somaliland wada dhisano. Wacadkaasi walaalayaal yuu
ina qaban ee aynu ka rumayno midnimada Somaliland iyo
walaaltinimadeenna.”
Guddoomiyaha cusub ee ururka XAQSOOR waxa uu sidoo kale xukuumadda
Madaxweyne Siilaanyo kula taliyey in wadahadallada iyo gogosha
nabadda laga horreysiiyo sidii loo soo celin lahaa kalsoonida
bulshooyinka Somaliland dhexdooda, waxaannu ku baaqay in ciidammada
qaranka laga qaado goobaha biyaha leh ee ku yaal degaannada
Buuhoodle.
“Dadka cadaanka ah waxay yidhaahdaan markay meel shaqaaqo ka dhacdo
waar intaan la wada hadal, aynu qaadno tallaabooyin kalsoonida soo
celiya, haddii la kala go’san yahay oo xabbad la isku dhuftay aan
wadahadalno markaliya ma dhacayso. Waxa ka horreeya in la sameeyo
weji la isugu iman karo, taasina waxay ka bilaabmaysaa
xukuumaddeenna. Waxa kalsoonida lagu soo celinayaa biyaha
walaalaheenna bariga shishe ay leeyihiin waa la naga fadhiyaa ha
looga kaco, biyuhuna waa lama huraanka nolosha, lagamana maarmi karo.
Biyaha waxa xaq ku leh haadka iyo waraabaha dadka iyo duunyadeenaba
cuna. Xadiisku wuxuu odhanaya qof muslim ah oo markiisa horeba aan
wanaagsanayn ayaa xayawaan ooman oo rays leef-leefaya arkay oo
waraabiyey Ilaahayna ku janneeyey. Bariga shishe ma taasaynu uga
yaraynaa? Waliba waxaan leeyahay biyahaasi hadday ku filnaan wayaan
biyaha kale ee qolyaheena kale leeyihiin ha lagu casuumo oo la
yidhaa kaalaya walaalayaal cabba,” ayuu yidhi Md. Xasan Ciise oo
tilmaamayey aragtiida xal-u-helista dhibaatooyinka ka jira
degaannada gobollada bari ee dalka.
Mar uu ka hadlayey xaaladda siyaasadeed ee dalka gudihiisa iyo
hab-dhaqanka siyaasiyiinta Somaliland waxa uu ku tiraabay; “Adduunka
caqliga leh ninka doonaya inuu taajir noqdo, baayac-mushtariguu
galaa, Afrikana wuxuu odhanayaa wasiir ha la iga dhigo. Ninkii
lacagta doonayey xagga baayac-mushtariga iyo lacag xalaal ahba u
leexan maayo, laakiin wuxuu odhanayaa meel ay ka dhawdahaan
garanayaa, markaasuu reerkii shirinayaa oo ku odhanayaa igu
tuntuunsada inaan wasiir noqdo.
Walaalayaal; shicibow dhibaatooyinka xagga siyaasadda innaga haysta
waxa ka mid ah ee shicibkeennu wuu xusuus yar yahay; kii shalay wax
kharribay ee ay markhaatiga ka ahaayeen ayuun baa ka yara degaya
meeshii oo dhinac kale uga soo wareegaya. Reerkii buu shirinayaa,
wuxuuna ku odhanayaa xisbi baan furanayaa ee maantana igu
tuntuunsada. Odhanba mayaan waar sowdigii shalay meesha ku
dhoobaystay ee cid ku dhantaan maanta raadinaynaa. Marar baabay ka
darayaan oo odhanayaan kanaa wax inoo soo dhicin kara oo waxna cuni
kara.
Haddaad tuug meesha u dhiibataan oo tidhaahdaan waxbay noo soo
dhicinayaan, gonduhuun baynu is wada haysanaynaa oo waligeen horumar
gaadhi mayno, kuwii horumarka noo hirkici lahaana diyaar uma nihin
labadaas la isku heli maayo, arrintaasna ha laga fiirsado.”
Waxa kaloo uu si adag u dhaliilay guddiga wasiirrada ah ee
Madaxweyne Siilaanyo u xilsaaray wadahadallada Somaliland la
yeelanayso Soomaaliya, waxaannu arrintaas ku tilmaamay mid khaldan,
waxaannu ku taliyey in talo qaran laga yeesho wadahadalka Soomaaliya
lala galayo.
Guddoomiyaha cusub ee urur-siyaasadeedka XAQSOOR oo sharraxaad ka
bixinayey aragtidiisa ku wajahan qaabka Somaliland wadahadallada ula
geli karto Soomaaliya iyo weliba jidka ugu habboon ee loo mari karo
qaaddiyadda aqoonsi-raadiska Jamhuuriyadda Somaliland waxa uu yidhi;
“14 sannadood ka hor oo ayaan anigoo mucaarid ah soo jeediyey in
Somaliland ka qaybgasho shirarka arrimaheenna lagu soo qaadayo.
Allaah ha u naxariistee marxuum Maxamed Ibraahim Cigaal baa
waqtigaas maxadweyne ahaa, waxaanan ku idhi, waar siyaasadda dibadda
iyo ictiraaf-doonka marka laga hadlayo waxaan leeyahay shirarka
Soomaalida iyo Somaliland lagu soo qaadayo taga oo meel kasta ku
faafa.
Shirarka arrimaheenna lagu soo qaadayo waa la innagu aasayaa oo
kuwan Xamar madaxweynayaasha sheeganaya. Waxay odhanayaan maca
Somaliland annagaa ka wakiil ah oo waxay odhanayaan kuwani meesha ma
joogaan ee annagaa ka wakiil ah oo hadday lacag tahay qaybteenna
iyagaa qaadanaya. Waar taga oo waxaad tidhaahdaan nama metelaan oo
waannu ka madaxbannaannahay. Waxaan ugu daray waliba laba arrimood
oo kala ah; waar maaha inaad tagtaan oo kaliya oo shirarka
arrimaheenna lagu soo qaadayo ee aad tagtaan shirarka aan
arrimaheenna lagu soo qaadayn ee dayaxa, xiddigaha iyo daruuraha
lagu qaybsanayo oo ay joogaan waddamo iyo dawlado aynu u baahannahay
inaynu arrimaheenna ku qancino. Taga oo waxaad tidhaahdaan dayaxa
iyo xiddiguhu ha ina sugeen ee dhulkan aynu saaranahay ayey wax
nagaga maqan yihiine noo xaqsoora. Waxaan u raaciyey ictiraaf-raadin
way nagu adkaatay uun baad leedihiine waxay ka bilaabantaa Xamar.
Haddaanad xaggeedaba u kicin sow sidii doqonka lumi maysid?”
“Qaabka wadahadallada loo gelayo maaha in xukuumaddu shan wasiir
magacawdo. Qaabkaasi waa qaab qaldan, qaab dawladeedna maahee waa
qaab qaran, waxana wada geli kara xisbiyada oo dhan, ururradu maanta
mar hadday jiraana waa inay ra’yi ku yeeshaan, golayaashana waa in
hoggaankoodu ka qaybgalaa; waa in culimaa’udiinta badh laga soo
kaxaystaa; waa in qarankii oo isu dhan Xamar wajahaa, sheekada
meesha looga bilabayaana baryo maaha. Waxa weeye in la yidhaa
walaalayaal xaq baannu idinku leenahay ee waa inaad nagu
ixtiraamtaan geelayagii baannu la soo noqonay.
Laba waddan oo isku darsaday baynu ahayn. Been baad adduunka u
sheegayseen labaatankii sannadood ee u dambeeyey, ictiraafka idinkaa
ugu horreeya oo aannu xaq idinku leenahay ee noogu dhawaaqa, dadkii
kalee adduunkana waad ku casuumaysaan oo adduunkaad markhaati uga
dhigaysaan, illeyn kiiskaaga waad ku kalsoontee Ilaahay baa kuu
xaqsooraya; hadday kaa yeelaana wanaagsan oo adduun-waynuhu waxay
odhanayaan ictiraafkii way ku heshiiyeen, hadday kuu diidaana
adduun-waynihiina waxaad u muujinaysaa in xaq-darro laguugu diiday,
dabadeedna waa laga maarmayaa.”
Muj. Xasan Ciise Jaamac waxa uu khudbaddiisa ku soo afmeeray
xukuumadda Madaxweyne Siilaanyo oo uu ku tilmaamay aad ugu nugul
dhaliilaha loo jeediyey, “Maamulkii hore ee dawladdan ka horreeyey
wax kastoo la yidhaa waxay dareemi jireen may jirin; may dirgaxanayn
oo waxay ahaayeen sidii kuwo aan iyagaba lala hadlayn. Kuwan dambe
(xukuumadda Siilaanyo) haddaad xagooda u jeesato adigoo cunaha
bannaysanaya waxay is odhanayaan intaannu wax odhan ka gaadhsiiya oo
way kugu taal. Eraygaa aad iyo aad bay u dhibsadeen baa la igu
yidhi, sababtoo ah mid baan ku keenay, iyagana waan u
nasteexaynayey, ummaddana waan ugu nasteexaynayey, waanan idiin
caddaynayaa inay nasteexo ahayd.
Waxa iga keenay maalin ka horreysay oo hoggaanka sare ee dawladdani
saq dhexe fooqa laga soo degay iyadoo sanka la haysto waa kalmadda
la isticmaalaye, lagana haysto raggii Somaliland siyaasadeeda ugu
mudnaa tobankii sannadood ee ugu dambeeyey ayaa waxaan xasuustay
eray hoggaamadii hore ee ka horreeyey maalin la igu yidhi maan
joogine istaadyoomkuu ka yidhi. Maalintaa hoggaanka waan ka quustay,
waxaannu yidhi baa la igu yidhi, qaar mucaarid ah la sheegaya ee
kuwaas iyo kuwaas afka kamay odhane meel kalay ka hadlaan meel kale
oo aan laba soo hadal qaadi karin. Maalintaasaan ka quustay
hoggaankaas.
Tani wax badan kamay sokayn, dad badan baanan ku quustay, aad baan
uga fikiray oo waxaan is idhi waar haddii arrintaasi sii socoto
ummaddu way kala dhimanaysaa ee sideed xaaladda u badbaadisaa?
Waxaan goostay kariirad u dhig intaanay wax la mid ah soo bixin oo
xabbad ifiso ah dulmari ha baraarugeene, kursigana wuu waalaa
Afrikaanka, bal inuu miyirku u soo noqdo xabbad dul mari,
eraygaygina inuu shaqeeyey waxaa u daliila, dhawr maalmood kadib
ayaa Barlamaanka laga yidhi annagu mucaaridku waxay nagu yidhaahdaan
adkaysigeeda waa nalaga helayaa, warbaahintaana soo qortay, maalin
kalena madaarka laga yidhi mucaaridku waxay nagu yidhaahdaan waannu
u adkaysanaynaa, iminkana waxaannu leenahay walaalayaal kariirtaannu
idiin dhignay way shaqaysee yaan la idinka waayin,” ayuu yidhi Xasan
Ciise Jaamac.
Source:Jamhuuriya
|