Xisbiga Mucaaridka ah
ee Kulmiye oo koox isbedel doon ahi ka dhax
toostay
Waxa toddobaadkan aynu ku jirno
maalintii (Sabti) shir isugu yimid koox isbedeldoon ah oo ka tirsan
xisbiga Kulmiye iyo xubno waqtigan xaadirka ah aan xisbina ka
tirsanayn oo xilal ay qaranka hore ugu hayeen laga xayuubiyey kadib
markay waajibaadkoodii shaqo gudan waayeen.Kooxdan shirka soo
abaabushay ee isbedeldoonka ah waxay kala ahaayeen:
Garabka Awal ka Kulmiyoobay:
Muuse Biixi Cabdi,
Maxamed Cabdi Iskeerse,
Abiib Diiriye(Abiib Timocad),
Maxamed Xaashi Cilmi,
Xldh.Siciid Cilmi Rooble,
Xldh.Axmed Weyne,
Xldh. Maxamed Faarax Qabiile,
Xldh. Maxamed Kacaan,
Xldh.Maxamed Xuseen Ciise.
Garabka Yoonis ka kulmiyoobay:
Dr.Maxamed Cabdi Gaboose,
Cabdiraxmaan Cabdiqaadir,
Xldh.Maxamed Nuur Caraale(Duur),
Xldh.Maxamed Xaaji Yuusuf (Waabeeyo),
Maxamed Shukri,
Yuusuf Nuur Guruuje,
Cabdilaahi Carab,
Jaamac Ganaf Cadde.
Garabyadani waxay isku wada raaceen oo si fiican u lafa gureen in
xisbigu yeeshay sawir reer, darajadii qaranna hoos uga dhacay, oo
hal reer lagu shaabadeeyey,markaa loo baahan yahay in sumcaddii iyo
sharaftii xisbiga dib loo soo nooleeyo, si loo hanto taageerayaasha
lixda gobol ee S/land. Lana xoojiyo midnimada lagu beegsanayo guusha
doorashada.
Si taas loo helana waxay yidhaahdeen waxaanu soo jeedinaynaa in
isbedel degdeg ah lagu sameeyo hogaanka sare ee xisbiga.
Arrinta ugu xasaasisanayd kulankan ayaa ahayd hadal uu nin oday
dhaqameed ahi yidhi oo ahaa "Marka weylaha la helo ayaa lo,da la
maalaa" taas oo nuxurkeedu yahay marka hogaanka sare ee Kulmiye la
bedelo ayaa guul doorasho la gaadhi karaa.
taas oo dhamaan kasoo qaybgalayaashii isu taageen una sacabo tumeen.
Fikradahan isbedeldoonka ah ee waqtigan kala guurka ayaa sii kala
fogeyn karta gudoomiyaha xisbiga iyo ilmaadeeradii oo dhinac ah iyo
Muuse Biixi iyo Gaboose(Cismaan caataha S/land) oo dhinaca kale ah,
maadaama oo ay fikradda isbedeldoonka ay iyagu wataan.
Fikraddan bedelaada hogaanka xisbiga ayaa noqon doonta mid aan u
meel mari doonin shaqsiyaadka wata, maadaama oo gudoomiyuhu horeba
ugu gacan saydhay waxgarad iyo ganacsato ka soo jeeda beeshiisa oo
hore ugu soo bandhigay inuu ka nasto siyaasadda oo jagada uga
tanaasulo da'yar cusub, lana tartami kara musharaxa madaxweynenimada
ee Udub Md.Daahir Rayaale Kaahin oo isagu mar hore kaga guuleystay
Md.Axmed maxamed Maxamuud (Siilaanyo) tartanka jagada madaxweynaha.
Isagoo gudoomiyuhu ku tiraabay "Xisbigan anigaa samaystay oo
kaadidaydaan usoo cabbay,shaqsi kale ugama tanaasuli doono intaan
noolahay,i habaara aan dhintee haddaad rabtaan inaan meesha ka tago".
Diidmada qayaxan ee Siilaanyo waxay xisbiga dhaxalsiin kartaa
guuldaro aanu kasoo kaban doonin oo kaga timaada dhinaca
doorashooyinka, haddii uu soo dhoweeyo oo gudoomiyuhu tanaasulo oo
weji cusubi yimaado, Kulmiye waxa laga yaabaa in rajadiisii guushu
soo noolaato.
La arki doonee, waxaan sugnaaba waa jawaabta warqaddii kulankii
shalay u diray gudoomiyaha.
Guul iyo Gobanimo Soomaaliland.
Jaamac Ducaale
jaamacducaale09@hotmail.com
|