Xoghayaha Arrimaha Dibadda ee KULMIYE, oo ka qaybgalaya shirweyne caalami ah oo ka dhacaya dalka Sweden

Xoghayaha Arrimaha Dibadda ee KULMIYE, Dr. Maxamed Cabdillaahi Cumar, ayaa saaka u dhoofay magaalada Stocklom ee dalka Sweden ka dib markii uu xisbiga KULMIYE martiqaad rasmi ah ka helay urur waynaha ka dhexeeya xisbiyada dimuqraadiga ah ee qaaradda Yurub ee loo yaqaano ELDR oo shirwayne caalami ah ku leh magaalada Stocklom ee dalka Sweden. Gudddoomiyaha xisbiga KULMIYE, mudane Axmed M. Maxamuud Siilaanyo oo ku talagalku ahaa inuu isna yimaado shirkan ayey hawl qaran awgeed u suuragali wayday inuu ka soo qaybgalo.

Waxa ay casuumaddani daba socotaa shirwaynayaal caalami ah oo isdaba joog ah oo masuuliyiinta sare ee xisbiga KULMIYE ay hore uga qayb qaateen. Kalfadhigii kal hore ee shirwaynahan oo ka dhacay magaalada Berlin waxaa ka soo baxay war murtiyeed ugu yeedhay wadamada Yurub inay aqoonsadaan somaliland*. Laakiin wuxuu shirwaynahaasi ku cambaareeyay Madaxwaynaha Soomaliland, Mudane Daahir Riyaale Kaahin, xadgudubyo ka dhan ah xuquuda insaanka, wuxuuna ugu yeedhay inuu joojiyo tacadiyada noocan oo kale ah, haddii uu doonayo in urur xisbiyeedka ELDR uu sii wado taageerada uu u hayo qaddiyadda aqoonsiga Somaliland.

Shirwaynaha sanadkan oo ka wayn kii kal hore, kana soo qaybgalayaan wufuud ka socota wadamo badan, waxaa qodobada laga wada hadlayo ka mid ah ilaalinta xoriyadda iyo xuquuqda dadka, suuqa ganacsiga, horumarinta deegeenka iyo qodobbo la xidhiidha nabadgalyada iyo siyaasadda dibadda ee caalamka. Waxaana lagu talo jiraa inay ka soo baxaan talooyin saamayn ku yeelan kara arrimha aduunka qaar ka mid ah.

Siyaasadda arrimaha dibadda ee KULMIYE waxay xoogga saraysaa sidii loo kobxcin lahaa xidhiidhka Soomaliland la leedahay caalamka, iyo sidii waxa looga qaban galdaloolooyinka ka muuqda siyaasadda xukuumadda ee dibadda, sidaa awgeed ka qaybgalka shirwaynahan ee Xoghayaha Arrimaha Dibadda ee KULMIYE waxay ka turjumaysaa dadaalka uu xisbga KULMIYE ugu jiro ka midha dhalinta himiladaasi. Sida laga warhayo wuxuu xisbigu in dhawaydba waday hawlgallo siyaasadeed oo ku jeeda siyaasadda dibada ee Somaliland, waxaanu xisbigu qaar ka mid ah wadamada Afrika iyo Yurub la samayseeyay xidhiidh wadashaqayneed oo waxtar u yeelan doona shacabka Somaliland. Ka qaybgalka shirkan ee KULIMIYE waxay kaloo dardar cusub galinaysaa dadaalka ay qaar ka mid kooxaha siyaasadda ee reer Yurub ugu jiraan taageerida aqoonsiga Somaliland.

Xogahayaha Arrimaha Dibadda ee KULMIYE wuxuu inta shirwaynuhu socdo kulamo gaar ah la yeelan doonaa qaar ka mid ah hogaamiyayaasha Yurub ee ka qaybgalaya shirwaynaha iyo masuuliyiin ka tirsan dawladda Sweden. Waxaanu ka warbixin doonaa xaaladda siyaasadeed, nabadgalyo iyo dhaqaale ee Somaliland iyo kaalinta uu xisbiga KULMIYE kaga jiro hawlaha dalka iyo kuwa gobolka Geeska Afrikaba. Waxaa kaloo Dr. Maxamed Cabdillahi Cumar ka mahadcelin doonaa taageeradii uu shirwaynahani reer Yurub sanadkii hore u fidiyay qaddiyadda aqoonsiga Soomaliland. Waxaa kaluu Xoghayuhu ka hadli doonaa hawalaha diyaargarawga doorashooyinka madaxwaynanimada ee dalka ka socda, khatarta ay budhcad badeedu ku hayso gobolka, xaaladda xuquuqul Insaanka Soomaliland iyo hindisayaasha xisbiga KULMIYE ee ku jeeda sidii nabadgalyo loogu soo dabaali lahaa manadqadda Geeska Afrika.



Waxaa kaloo xoghayuhu la kulmi doonaa xubno ka tirsan mas’uuliyiinta jaaliyadda Somaliland iyo madaxda iyo taageerayaasha xisbiga siyaasiga ah ee KULMIYE ee Swden.

 

XAFIISKA ARRIMHA DIBADDA
XISBIGA KULMIYE