Xukuumadda Somaliland
oo Amartay in si Degdeg ah Dacwad Lagu soo
oogo Dr Gabboose
“Xeer-ilaaliyaha Guud ee
ciidammada qalabka sida waxaan farayaa in uu diyaargareeyo dacwad oo
ku soo oogo Gabboose, sida ugu dhakhsaha badana ugu gudbiso
maxkamadda awoodda u leh”
“Taliyaha Ciidanka Qaranka waxaan ku wargelinayaa axsaabta siyaasiga
ahi ma iman karaan xeryaha ciidammada, mar dambena ciidanka qaranka
uma iman karaan, soomana geli karaan”
Wasaaradda Gaashaandhigga Somaliland
Xukuumadda Somaliland ayaa digniin culus u jeedisay taliyaha
ciidammada qaranka oo toddobaadkii hore xarunta taliska guud ee
Hargeysa ku qaabiley hoggaanka sare ee xisbiga mucaaridka KULMIYE,
iyada oo xukuumaddu taliyaha uga digtay in aanay mar dambe dhicin
inuu xeryaha ku qaabilo asxaabta siyaasiga ah ee dalka.
Sidaa waxa ku dhawaaqay wasiir-ku-xigeenka Wasaaradda Gaashaandhigga
Md. Axmed Maxamed Filanwaa oo shalay xafiiskiisa ugu warramay
warbaahinta dawladdu maamusho, waxaannu asxaabta siyaasiga ah ugu
baaqay in wixii ciidammada ka gala ay u soo maraan wasaaradda, isaga
oo booqashadii KULMIYE ku tegay xeryaha ciidammada ku tilmaamay
waxyeello qaran oo shaki lagu kala dhex dhigayo ciidammada iyo
dawladda.
“Taliyaha Ciidanka Qaranka waxaan ku wargelinayaa axsaabta siyaasiga
ah ma iman karaan xeryaha ciidammada mar dambena ciidanka qaranka
uma iman karaan, soomana geli karaan, axsaabtana waxaan leeyahay
annaga ayaa idin khusayna ee noo kaalaya wixii imanka ka dambeeya,
arrintaasina waa waxyeelo qaran iyo fowdo, loomana baahna.
Tallaabadii Sababtii uu ku tagay xisbiga KULMIYE xeryaha ciidammada
waxay ahayd mid fool xun oo khalad iyo meel-ka-dhac ah, waa gef, waa
wax aan u bannaanayn axsaabta siyaasiga ah ee qaranka sida xogyaha
xisbiga UDUB iyo xubnihiisa ka hooseeya, Guddoomiyaha xisbiga
KULMIYE iyo xubnihiisa ka hooseeya iyo Guddoomiyaha xisbiga UCID iyo
xubnihiisa ka hooseeya xeryaha ciidammada ma tagi karaan, shaqana
kuma laha oo ma khusayso, ciidammadana siyaasaddu ma khusayso ee way
ka madaxbannaan yihiin. Maalintii dhaweyd ee xisbiga KULMIYE xeryaha
ciidammada tagay waxay ahayd wasaaradaha inay tagaan, anigu
Wasaaradda ayaanu joognay way na garab mareen oo war kamaanu haynin,
annaga ayey wixii siyaasad ah na khusaysaa laakiin ciidammada shaqo
kuma laha inay dhexgalaan, waxaanse arrintaas u arkaynaa qalalaase
gelinta KULMIYE ku hayo qaranka, wuxuu doonayaa inuu shaki kala
dhexgeliyo dawladda iyo ciidammada,” ayuu yidhi Filanwaa.
Waxaanu wasiir-ku-xigeenku intaa ku daray in fikradda xisbiga
KULMIYE ku tagay xeryaha ciidammada uu iska lahaa Dr.Maxamed Cabdi
Gabboose, isaga oo sheegay in Dr. Gabboose ka been sheegay
waxyaabihii ay ciidammada ku wada hadleen, isla markaana ay arintaas
ku soo taagayaan maxkamad, isaga oo arintaa ka hadlayana waxa uu
yidhi;
“Axmed Siilaanyo xeryaha ciidammada muu tegi jirin ee waxa geeyey
Gabboose, haddiiba KULMIYE tagay xeryaha ciidammada oo lala kulmay
ninkii habeen hore [Jimcihii] ka hadlayey Tv-ga ee Gabboose muu
sheegin wixii ay la tageen iyo wixii loogu jawaabay midna ee wax
kale oo aan jirin ayuu sheegay. Waxa loogu jawaabay ‘annagu waxaannu
nahay ciidammo, waajibka qaranka ayaanu fulinaa ee siyaasad shaqo
kuma lihin.’
Gabboose wuxuu yidhi ciidammada waanu is afgaranay in aannu arrimaha
dhinac uga soo wada jeedsano oo aannu markaanu doono u tango, waa
been arrintaasi. Waxaan leeyahay Gabboose haddii ay run kaa tahay
bal car berri tag. Waxaan leeyahay Gabboose siyaasiyiintii aad
xisbiga KULMIYE ugu tagtay weligood ciidanka qaranka kumay tilmaamin
been-abuur, weligoodna xeryaha ciidammada may tagin, waa run wixii
run ah waa la sheegaaye. Arrintaasi waa gef iyo meel-ka-dhac,
waxaanuna u gudbin doonaa Maxkamadda kana hadhimayno.
Xeer-ilaaliyaha Guud ee ciidammada qalabka sida waxaan farayaa inuu
diyaargareeyo dacwad oo ku soo oogo Gabboose, falalka uu ka
tilmaamayo ciidammada ee warbaahinta intuu ka jeediyey adduunka iyo
shacabkaba ku fidiyey ee beenta ah inaad isla markaana u gudbiso
maxkamadda awoodda u leh, taliyaha ciidanka qarankana waxaan farayaa
inuu jawaab cad ka bixiyo waxa uu ka baahiyey warbaahinta Gabboose.”
Waa markii u horreysay oo xukuumadda Rayaale ee uu kalsoonidii kala
noqday mucaaridku ay si rasmi ah uga hadasho kulamadii kala duwanaa
ee toddobaadkii hore hoggaanka sare ee xisbiga KULMIYE la yeeshay
taliyeyaasha ciidammmada qaranka iyo booliska.
Jamhuuriya Online
|