Xukuumadda Somaliland Oo Hawadeeda Ka Mamnuucday Duulimaadyada
Qaramada Midoobay, Kuwa Fadhiyana Amartay In Aanay Duuli Karin.
Hadalkan oo jawaab u ahaa Qaramada Midoobay iyo Hay’adeeda UNDP oo
hoos geeyeen dawladda Federalk Somaliya......
Hargeysa (TNN):-Wasiirka Wasaaradda Duulista iyo Hawada Somaliland
Maxamuud Xaashi Cabdi ayaa ku dhawaaqay Somaliland in ay Hawadeeda
ka mamnuucday Duulimaadyada Qaramada Midoobay, kuwa hada ku sugan
garoomada Somaliland-na aanay kici Karin ilaa amar danbe ka soo
baxayo.
“Laga bilaabo beri lixda
Subaxnimo Duulimaadyada Qaramada Midoobay ma soo geli karaan Hawada
Somaliland, kuwa hada fadhiya madaaraduna saacadaas laga bilaabo
kama duuli karaan Garoomadda ilaa iyo inta amar danbe laga soo
saarayo” ayuu yidhi wasiirku
Sidaas waxa uu wasiirka Duulista Hawadu ku sheegay shir jaraa’id oo
uu warbaahinta goor dhaweyd ugu qabtay madaarka Hargeysa, isagoo ka
jawaabayay go’aankii ay shalay Qaramada Midoobay iyo Hay’adeeda UNDP
ku hoos geeyeen dawladda Federalk Somaliya maamulida madaarada iyo
Hawada Dalkii laysku odhan jiray Somaliya .
Maxamuud Xaashi Cabdi waxa kale oo uu warfidiyeenada u sheegay in
laga bilaabo 25/7/2013 Somaliland si toos ah u maamulan doonto
Hawadeeda iyo madaaradeeda, isagoo sheegay wixii xisaab hore ah ee
ay Somaliland u haysay qaramada Midoobay iyo hay’adda IYATO inay
kala xiisaabtami doonaan.
Sidoo kale wasiirka wasaaradda Duulista Hawada Somaliland waxa uu
Amar ku bixiyay laga bilaabo bisha Juun ee sanadkan in ay Somaliland
qaadan doonto Duulimaadyada Hawadeeda Dulmara iyo kuwa ka duulaya
madaaradeedaba, isagoo ku wargeliyay shirkadaha Duulimaadyada in ay
sidaas ula socdaan.
Waxaana uu Xukuumadda Somaliya uga digay in ay ku talaabsato
go’aanka ay qaadatay ee ay ku dalbatay in hawada Somaliland ay
maamulato, isagoo uga digay cawaaqib xumada ay arrintaasi ku keeni
doonto wadahadaladii u socday Somaliland iyo Somaliya.
Wasiirka Wasaaradda Duulista Hawadu waxa uu sheegay Somaliland in ay
guul daro kala kulantay mashruucii hay’adda ICAO ee ay Qaramada
Midoobay u dhiibtay maamulka Hawada Somaliya, isagoo sheegay
Somaliland in aanay ka soo gaadhi jirin wax muuqda dhaqaalaha ay u
qaadi jireen, marka laga reebo afartameeye shaqaale ah oo mushahar
laga siin jiray, isagoo ku qiyaasay lacagta sanadkii ka soo xeroon
jirtay in ay gaadhaysay toban Milyan oo Doolar.
Wasiirka wasaaradda Duulista Hawadu waxa uu sheegay in ay Qaramada
Midoobay ay iska indho tirtay Heshiiskii Somaliland iyo Dawladdii
Federalaka u dhaxeeyay ee ay iyaguna qaybta ka ahaayeen ee labada
Dal loogu sameeyay Guddidii wadajirka ahayd ee la ogayd maamulka
Hawada Somaliya iyo Somaliland, taasina ay tahay in ay ka leexatay
wadadii saxda ahayd ee hawsha Duulimaadyada fududaynaysay.
Wasiir Maxamud waxa uu sheegay Somaliland in ay ka digtoon tahay
talaabo kasta oo lagu carqaladayanayo Qaranimda Soamliland, isla
markaana ay awood u leeyihiin in ay maamushaan Hawadooda iyo
khayraadka kale ee ay leedahay Somaliland, cid kale oo uga talin
kartaana aanay jirin.
Timacade News Desk
Hargeysa,Somaliland
|