Xus Balaadhan Oo Loo Sameeyay Maalinta Shuhadada SNM Ee 17 October 1984-kii Ee Dhacdadii Burca-duuray

Munaasibad Lagu Xusayay Sanad-guuradii 24 Ee maalinta Shuhadada SNM, ayaa xalay lagu qabtay magaalada Hargeysa.

Xuskan oo uu soo qabanqaabiyay urur wadani ah oo lagu magacaabo SRC (Somaliland Reseach Centre), waxa ka qaybgalay qaar ka mid ah saraakiishii SNM, xubno ka socday ururada bulshada Rayid ah iyo marti sharaf kale.

Mujaahid Maxamed Kaahin Axmed oo ka mid ahaa saraakiishii u horeysay ee u talaaba SNM oo hadal-dheer halkaa ka jeediyay ayaa ka waramay dagaalkii 17 October 1984 tuulada Burco-duuray ku dhexmaray mujaahidiintii ururkii dhaqdhaqaaqa wadaniga Soomaaliyeed (SNM)oo u hogaaminayay Muj. Maxamed Xaashi Diiriye (Lixle) iyo ciidamadii dawladdii Maxamed Siyaad Barre, waxaanu sheegay in xuska maalintaasi kulansaday inuu ahaa dagaalkii ciidamadoodu ugu dhimashada badnaayeen wixii waqtigaa ka horeeyay iyo xuska Muj. Lixle iyo sodon kale oo kaga dhintay.

Muj. Maxamed Kaahin waxa uu ka hadlay sababihii dhaliyay burburkii Jamhuuriyaddii Soomaaliya, taasoo uu ku tilmaamay inay ku timi markii maamulkii Maxamed Siyaad Barre xaqiray dadkii taariikhda lahaa ee Soomaaliyeed. Waxa uu ka hadlay sababaha Manhajka waxbarashada Somaliland looga saaray taariikhda SNM, waxaanu sheegay inay sabab u tahay xukuumadda Rayaale oo aan jeclayn taariikhda ururkii SNM.

Berigii dhawayd waxa laga murmayay Manhajka waxbarashada ma lagu daraa. Waad maqlayseen qolada Wasaaradda Waxbarashada iyo dooddii ka dhashay. Arrintaasi maaha taariikhdii SNM oo la waayaye waxa weeye; raga xukuumadda maanta joogta ayaan jeclayn taariikhda SNM-ta.

Waanu garanaynine, taariikhdii shalay la soo maray hadduu diido, isaguna beri bilaa taariikh buu noqonayaa, waana inuu taariikhdaa qiraa.” Sidaa ayuu yidhi Maxamed Kaahin, waxaanu intaa raaciyay oo uu yidhi, “Taariikhda SNM way qormaysaa, waa la qorayaa, nin walba Indhisiisa oo shan ah baa la qorayaa oo dalka nin-na marti looga noqon maayo.

Waxa uu sheegay inay gacan u siinayaan ururinta taariikhdii halganka ururka SRC oo sheegay inuu ururin doono, waxaanu tilmaamay inuu jiro kayd-taariikheed door ah oo ka hadlaya halgankii SNM, oo ay hayaan shaqsiyaad muwaadiniin ah oo ururintiisa isku hawlay, isaga oo arrintaa ka hadlayana waxa uu yidhi, “Marka aynu doonayno inay taariikhda halkeedii marino, sida aynu u doonayno inaynu u marino go’aankeedii qaybtaad leedihiine waa inaad ku talaabsataan…. Siciid Xaaji Axmed Qulumbe (Guddoomiyaha ururka TOGGA) in door ah buu ururiyay, saddex sanno ka horna in badan buu ururiyay Cabdiweli Faarax Jaambiir (Suxufi ka tirsan wargeyska Ogaal), oo laga sii dayn jiray Telefishanka Madaxabanaan ee Hargeysa.”Muj. Cabdikariim Xaashi Cilmi oo isna halkaa ka hadlay ayaa ku dheeraaday dhacdadii 17 October, 1984-kii oo loo aqoonsaday maalinta Shuhadada Mujaahidiintii SNM iyo taariikhdii Muj. Maxamed Xaashi Diiriye (Lixle).

Farxiya Jaamac Xuseen oo ka mid ahayd kalkaaliyeyaashii Caafimaad ee SNM oo iyaduna halkaa ka hadashay ayaa ka warantay doorkii haweenku ku lahaa halgankii SNM.Maxamuud Sheekh Cumar oo isna ka mid ahaa halgamayaashii SNM ayaa qaybo ka mid ah taariikhdii SNM ku wareejiyay ururka SRC ee xuskaa soo qabanqaabiyay, kaasoo sheegay inuu ku hawlan yahay ururinta taariikhdii ururkii Dhaqdhaqaaqa wadaniga Soomaaliyeed (SNM).

Faysal Cali Sheekh oo ka mid ahaa ciidamadii SNM, haatana ah Guddoomiyaha Wargeyska Madaxabanaan ee Jamhuuriya oo isna hadal kooban halkaa ka jeediyay, ayaa sheegay inay haboon tahay in ururin iyo qoritaan lagu sameeyo guud ahaan taariikhda halgankii SNM, kaasoo uu xusay inay muhiimad weyn u leedahay da’yarta Somaliland.Sidoo kale, xubno door ah oo ka tirsanaa SNM oo halkaa ka hadlay waxay isku raaceen ahmiyada ay leedahay kaydin iyo qoritaan sugan oo dheelitiran oo lagu sameeyo sooyaal-taariikheedka halgankii SNM.

Hadaladaas ka hor, waxa munaasibadaa lagu soo bandhigay filim muuqaal ah iyo kayd taariikheed sawiro ah oo la xidhiidha halgamayaashii iyo dhacdooyinkii ururkii SNM.

Waxa kale oo lagu soo bandhigay bandhig-faneed iyo suugaan xuska maalintan iyo taariikhda SNM ka hadlaya oo dhextaal looga dhigay munaasibadaas.
 

Source: Wargeyska Ogaal