Xisbiga KULMIYE Oo
Meel Banaan Xaflad Ugu Qab tay Taageeryaal Ku Soo Biiray Markii
Xukuumada Somaliland Ka Hor-joogsatay
Huteeladii
Xisbiga mucaaridka ah ee KULMIYE ayaa maanta xaflad balaadhan uu ku
soo dhaweynayay Taageereyaal ku biiray ku qabtay Huteelka Crown ee
magaalada Hargeysa hortiisa ka dib markii xukuumada Somaliland ay u
diiday xisbigaasi inay wax shirar ah ay ku qabsadaan Hudheelada
waaweyn ee Caasimada muddo laba cisho ah.
Xafladan loo sameeyay taageereyaal tiro badan oo ka soo jeeda beesha
Nuux Ismaaciil, oo ka mid ah beelaha waqooyiga Hargeysa, waxa ka soo
qeyb galay Hoggaanka xisbiga KULMIYE iyo siyaasiyiinta iyo
Xildhibaanada Golaha Wakiilada kaga jira xisbigaasi.
Dr Maxamed Cabdi Gaboose oo xafladaasi ka hadlay ayaa wuxuu yidhi
“Wallaalayaal, waxaan aaminsan nahay in dawladan hadhaaga ahi ay noo
hiilisay, waxay inoogu hiilisay qol xidhan inaynu ku shirno ayay
inoo diiday oo dibada ayay inoo soo saartay Geed walba waa qol,
Banaan waliba waa qol,markaa guul baan taagan nahay. Waxaan mahad u
celinayaa abaabuleyaasha shirkan oo markii albaabka laga xidhay aan
kala tagin ee ku dhacay oo dibada iskugu keenaan yeedhay.”
“Waxaanan dhawaan rajaynaynaa inagoo xaafad walba ka nimid aynu
meelo ka waaweyn iskugu nimaadno halkan,waxaan idiin sheegayaa oo
sharciyadii dalkan lagu tuntay, oo aanay xukuumad sharci ahayni ka
dhisnayn wixii ka dambeeya 6-da bishan April,”Ayuu Yidhi Md Gaboose.
Dr Gaboose wuxuu sheegay in badhasaabada Goboladuna ay noqonayaan
wakiilada xisbiga hubaysan ee UDUB.
“Dastuurka dalka ayaa noo fasaxaya inaan shucuurteena muujino, oo
aan iskugu soo baxno si salmi ah,waxaan idiin sheegayaa xisbiga
KULMIYE cidna uga hamran maayo cidna ku tixgelin maayo inuu dibada u
soo baxo oo uu taageereyaashiisu iskugu soo baxaan banaan bax,”ayuu
intaasi raaciyay Dr Gaboose.
Guddoomiye ku xigeenka koowaad ee Xisbiga mucaaridka ah ee KULMIYE
Md Muuse Biixi Cabdi, oo xafladaasi ka hadlay ayaa sheegay inaanu
wax dhibaato ah u arkayn in laga horjoogsado Huteelada ay xafladaha
ku qabsanayaan, isagoo arrintaa ka hadlayayna wuxuu yidhi “Malaa dad
badan baa cadhaysan oo Huteel baa la inoo diiday iyo wax lehe’e
horta Anigu cadho-na ma qabo ciilna ma qabo.oo Anigu dad aan isku
xayd-xaydaba ku arki maayo qolada waraaqahan hudheelka la inoogu
diiday soo qoray iyo ayaan arkayaa waxba uma arkayo , markaa waxaan
leeyahay waxaan u arkaa carruur igu khaldantay.”
Muuse Biixi wuxuu ammaanay taageereyaasha ku soo biiray oo ah beel
ka mid ah beelaha waqooyiga Hargeysa oo uu aad u bogaadiyay kana
war-bixiyay taariikhdoodii, isagoo soo qaatay tixo gabay ah oo hore
loogu tiriyay Beesha Nuux Ismaaciil.
Guddoomiye Ku Xigeenka Koowaad ee KULMIYE oo ka hadlayay xaalada
siyaasadeed ee dalka ka jirta wuxuu yidhi “Dawlada maanta joogta
wada hadalnay oo waxaan leeyahay, horta waxaan la yaaban nahay UDUB
waxa doorashadii Madaxtooyada u coddeeyay 42% , KULMIYE-na waxa u
coddeeyay 42% lix sano ka hor oo way is le'ekaayeen, waxaan leeyahay
lixdaa sanadood dadkii u coddeeyay KULMIYE, muddaas waxay ku jireen
waan ku xidhayaa, shaqada ayaan kaa eryayaa, qaran diid baad tahay,
iyo Hudheel aad ku shirtaan idiinma ogolin.”
“Intaas oo dhan waxaanu leenahay dawlada ilmaadeereyaal maxaad
leedihiin? Oo waanu baryaynay walina baryaddii kama aanu daallin oo
dhawaan baanu soo saarnay go’aankayagii oo waliba waxaanu ogol nahay
wadahadal, haddii wax lagu helaayo. Horta dad isle'eg ayaa ina
doortaye haddii aanu idin ixtiraamnay oo ay shan sanadood dhammaatay
oo aanu kordhinay, oo waliba aanu idin leenahay ammaanaddii inaga
dhexaysay aan ka tashanee badka soo dhiga. Haddii Aad diidaan sidii
ay idinla noqoto anagana waa naga guddoon nina yay la xumaanin,”Ayuu
Yidhi Muuse Biixi.
Guddoomiyaha Xisbiga KULMIYE Md Axmed Maxamed Maxamuud [Siilaanyo],
oo xafladaasi hadal dheer ka jeediyay ayaa tilmaamay in uu ku
faraxsan yahay inuu xafladaasi qiimaha leh oo meel banaan lagu
qabtay uu ka qeyb galo. Waxaanu si weyn ugu mahadnaqay
taageereyaasha ku soo biiray oo waliba Xisbigaas ugu deeqay qaadhaan
toban kun oo Dollar ah.
Guddoomiyaha KULMIYE oo ka hadlayay mawqifka Xisbigaasi wuxuu yidhi
“Waxaan doonayaa in aan eray ka idhaahdo xaalada maanta Xisbiga
KULMIYE halka uu taagan yahay waynu og-nahay waynu aragnaa oo
xisbiga KULMIYE waxa lagu haystaa iyadoo loo diidan yahay
Hudheeladii iyo banaanadii kale. Iyadoo shirarkooda ogol inay meel
walba ku qabsadaan. Waxay og-yihiin in shacbiga Somaliland iyo
ummadda reer Hargeysa ay taageersan yihiin oo ay ku kalsoon yihiin
Xisbiga KULMIYE. Xisbigani wuxuu u dagaalamayaa xorriyada, horumarka
iyo sharafka dalkan”
“Xilkii Daahir Rayaale Kaahin iyo ku xigeenkiisu berrito ayay
dhammaanayaan waxaanu halkan ka caddeynaynaa inaan maalintaa wax ka
dambeeya u aqoonsan doonin inuu Madaxweyne Dalkan ka yahay, xisbiga
KULMIYE wuxuu diyaar u yahay doorasho xor iyo xalaal ah marka ugu
horreysa ee ay qabsoonto uu isku taago waxaanu ku kalsoon yahay
xoogga iyo kalsoonida taageerada dadweynaha uu haysto, marna ma
aanaan diidin, Daahir Rayaaale Kaahin kalsooni darro uu ka qabo
xisbiga KULMIYE inuu maanta yidhaahdo Hudheeladii xorta ahaa ma geli
karaan” ayuu yidhi Md. Axmed Siilaanyo.
Guddoomiyuhu wuxuu sheegay in marka ugu horreysa ee ay munaasib
noqoto ay Taageereyaasha KULMIYE isugu soo baxayaan mudaharaad salmi
ah oo uu ku dooday in dastuurku uu u baneynayo.
Md. Siilaanyo wuxuu tilmaamay in 6-da bishan April ay tahay
maalintii la aasaasay Ururkii SNM, waxaanu yidhi “Berrito waa
maalintii SNM la aasaasay waxay ahayd in la isugu yimaado fagaaraha
beerta xoriyada, markii la ogaaday in shacbigu halkaasi isugu
imanayo oo KULMIYE tagayo, maanta warka soo baxayaa wuxuu leeyahay
xafladii halkaa lagu qaban maayo, taas macnaheedu waxa weeye
Halgankii ayaa halkaasi lagu dafiray oo cabudhiya ayaa la is
leeyahay, cabudhis yeeli mayno mudaharaad sharci ah ayaanu
sharaftayada iyo dareenkayaga ku muujinaynaa, waxaan leeyahay Daahir
Rayaale ha dhaco”
Guddoomiyuhu wuxuu cambaareeyay go’aankii muddo kordhinta Golaha
Guurtidu u sameeyeen Madaxweyne Rayaale Kaahin iyo xukuumadiisa.
Sidoo kale, waxa xafladaasi ka hadlay Md. Maxamed Cabdi Iskeerse,
Maxamed Cabdi Arabay, Maxamuud Dhoola-dahable, iyo Axmed Yuusuf Nuur
oo isagu ku hadlayay magaca taageerayaasha ku soo biiray xisbiga
siyaasiga ah ee KULMIYE.
Ramaasnews
|